il libri dal emanuel
PRIME PART
La manifestazion dal Salvadôr
9 1 Il popul ch’al leve indenant tal scûr
al à viodude une grande lûs;
sun chei ch’a jerin a stâ tune tiere scure
e à lusît une lûs.
2 Tu âs moltiplicade la gjonde
tu âs fate cressi la ligrie.
A gjoldin denant di te
come che si gjolt tal seselâ,
come che si scriule
cuant che si spartìs la prede.
3 Parcè che il so jôf ch’al sfracaiave,
la scorie su lis sôs spalis,
il baston dal so vuardean
tu tu lu âs crevât come te dì di Madian.
4 Parcè che ogni cjalçadure ch’e baline te confusion
e ogni manteline rodolade tal sanc
e sarà brusade,
diluviade dal fûc.
5 Parcè che nus è nassût un frut,
nus è stât dât un fi;
su lis sôs spalis al polse il comant;
e si clamilu par non:
Conseîr maraveôs, Diu potent,
Pari par simpri, Princip de pâs,
6 par ch’al puedi slargjâ la paronance
e par une pâs cence fin,
su la sente di David e sul so ream,
par stabilîlu e par rinfuarçâlu
midiant dal dirit e de justizie
di cumò e par simpri.
Chest lu fasarà la passion dal Signôr des schiriis.
Cuintri dal Ream dal nord
7 Il Signôr al à mandade une peraule cuintri di Jacop
e e je colade parsore di Israel.
8 Le à savude dut il popul, Efraim e la int de Samarie,
ch’a disevin te lôr supierbie
e te rogance dal cûr:
9 “I modons a son colâts,
ma nô o tornarìn a fâ sù cui claps,
i sicomôrs a son stâts taiâts,
ma nô o metarìn impen i cedris”.
10 Cuintri di lui il Signôr al à fat vignî i siei nemîs
e al à stiçât i siei aversaris,
11 Aram a jevade
e i filisteus a soreli a mont,
e a àn glotût Israel a plene bocje.
Cun dut a chel la rabie dal Signôr no si bone
e la sô man e je ancjemò slungjade.
12 Ma il popul nol è tornât a di chel che lu à pestât,
e nol à cirût gran il Signôr des schiriis.
13 Pa la cuâl il Signôr al à cjonçât di Israel cjâf e code,
palme e vencjâr tune sole dì.
14 L’anzian e il grant a son il cjâf,
il profete, mestri di falsetât, al è la code.
15 Chei ch’a vevin di indreçâ chest popul lu àn fat straviâ,
e chei che si son lassâts menâ si son pierdûts.
16 Par chel il Signôr nol varà remission dai zovins
e nol varà dûl dai vuarfins e des veduis;
parcè che a son ducj cence fede e cjamâts di tristerie
e ogni bocje e bute fûr infametâts.
Cun dut a chel la rabie dal Signôr no si bone
e la sô man e je ancjemò slungjade.
17 Propit, la tristerie e bruse tant che il fûc
e e glot spinis e baraçs,
e arsinìs il folt dal bosc,
e di li e va sù tant che une colone di fum.
18 Pe rabie dal Signôr des schiriis
la tiere e sta brusant
e il popul al è tant che lescje pal fûc,
nissun nol à remission di so fradi.
19 Si cjonce a gjestre, si è plens di fan,
si pare jù a çampe e no si è passûts,
ognidun al mangje la cjar dal so prossim.
20 Manasse al glot Efraim,
e Efraim Manasse;
e ducj i doi a son cuintri di Gjude.
Cun dut a chel la rabie dal Signôr no si bone
e il so braç al è ancjemò slungjât.