il libri dal emanuel
PRIME PART
Ciro l’onzût dal Signôr
45 1 Cussì i dîs il Signôr al so onzût,
a Ciro, che lu à cjapât pe gjestre,
par sdrumâ denant di lui i forescj
e par dispeâ i cinturons dai ombui dai rês,
par spalancâ denant di lui lis antis
e par che lis puartis no restin sieradis.
2 “Jo o marçarai denant di lui,
o splanarai lis rivis,
o fruçarai i puartons di bronç
e o crevarai i gàtars di fier.
3 Ti consegnarai tesaurs platâts
e dipuesits ben scuindûts,
par che tu sepis che jo o soi il Signôr,
che ti clami par non, il Diu di Israel!
4 Par amôr dal gno servidôr Jacop,
e di Israel, gno elet,
ti ài clamât par non,
ti ài dât un titul cuant che tu no tu mi cognossevis.
5 Jo o soi il Signôr, no ’nd è altris;
denant di me nol è nissun diu!
Ti ài peât cuant che tu no tu mi cognossevis,
6 par ch’a sepin dal jevâ al lâ a mont dal soreli
che denant di me al è il nuie;
jo o soi il Signôr e no ’nd è altris.
7 Jo o fâs la lûs e o crei il scûr,
o fâs il ben e o crei il mâl,
jo, il Signôr, o fâs dut chest.
8 Risinait jù, cîi, di adalt,
e i nûi ch’a fasin plovi la justizie!
Che si spreci la tiere e ch’e florissi la salvece
e ch’e butuli insieme la justizie.
Jo, il Signôr, o ài creât chest”.
Cui puedial sfidâ il Signôr?
9 Puar mai lui chel che i contint a di chel che lu à dât dongje,
al vâs ch’al cuistione cun chei ch’a polein il crep!
I disie forsit l’argile al vasâr:
“Ce fâstu? La tô vore e je cence mantiis”?
10 Puar mai lui chel che i dîs a so pari: “Ce âstu metût al mont?”
e a la mari: “Ce âstu parturît?”.
11 Cussì al dîs il Signôr,
il Sant di Israel, chel che lu à dât dongje:
“Sêso forsit vualtris che mi interpelais sui miei fîs
e che mi dais ordins a rivuart de vore des mês mans?
12 Jo o ài fate la tiere,
e o ài creât l’om parsore di jê;
jo, lis mês mans, a àn slargjât i cîi
e ur comandi a dutis lis lôr schiriis.
13 Jo lu ài burît fûr pe justizie
e o ài splanadis dutis lis sôs stradis.
Lui al tornarà a fâ sù la mê citât
e al tornarà a mandâ indaûr i miei depuartâts,
no par bêçs ni par regâi”,
al dîs il Signôr des schiriis.
Conversion dai popui
14 Il Signôr al dîs cussì:
“I prodots dal Egjit e il vuadagn di Kus
e i sabeus, oms di alte stature,
a passaran de tô bande e a saran tiei,
a marçaran daûr di te incjadenâts,
si butaran in genoglon denant di te,
e ti prearan:
Dome cun te al è Diu, no ’nd è altris,
no ’nd è dius”.
15 Tu sês propit un Diu che si plate,
Diu di Israel, salvadôr!
16 A saran incolms di vergogne e sblefâts ducj insieme,
a cjaminaran tal disonôr chei ch’a fasin dius.
17 Israel al sarà salvât dal Signôr
cuntune salvece eterne;
no sarês incolms di vergogne e ni di disonôr
par in eterni.
18 Parcè che cussì al dîs il Signôr,
ch’al à creâts i cîi,
lui ch’al è Diu,
ch’al à dade dongje e fate la tiere;
lui le à saldade,
no le à creade vueide,
ma le à dade dongje par ch’e sedi a stâ int:
“Jo o soi il Signôr e no ’nd è altris.
19 Jo no ài fevelât di scuindon,
tun cjanton di une tiere scure.
No ur ài dit a la gjernazie di Jacop:
Cirîmi dibant.
Jo o soi il Signôr, ch’o dîs ce ch’al è just,
ch’o conti robis veris.
20 Daitsi dongje e vignît,
svicinaitsi insieme,
vualtris ch’o sês restâts dai forescj!
A son ignorants chei ch’a puartin ator
la lôr statue di len
e a prein un diu
che nol pò salvâ.
21 Contait, puartait fûr lis provis,
conseaitsi ancje fra di vualtris!
Cui vevial fat capî dut chest inmò tai timps,
cui lu vevial contât inmò d’in chê volte?
No soio forsit jo, il Signôr?
E no ’nd è altri diu denant di me,
un Diu just e ch’al salve,
no ’nd è denant di me!
22 Voltaitsi de mê bande e o sarês salfs,
ducj vualtris confins dal mont!
Parcè che jo o soi Diu
e no ’nd è altris!
23 O ài zurât sun me,
de mê bocje e je saltade fûr la justizie,
une peraule che no sarà ritirade:
Propit, denant di me si plearà ogni genoli,
sun me e zurarà ogni lenghe,
24 disint: Dome tal Signôr si cjate
la justizie e la fuarce”.
A vignaran di lui incolms di vergogne
ducj chei che si jerin scjaldâts cuintri di lui.
25 Midiant dal Signôr e sarà juste e si tignarà in bon
dute la gjernazie di Israel.