il libri dal emanuel
PRIME PART
La glorie di Gjerusalem
35 1 Che s’indalegrin il desert e la pustote,
ch’e gjoldi e ch’e florissi la tiere arsinide.
2 Come il gi ch’al florìs di ogni bande,
che si jempli di gjonde e di ligrie.
I è stade dade la glorie dal Liban,
il sflandôr dal Carmêl e di Saron.
A viodaran la glorie dal Signôr,
il sflandôr dal nestri Diu.
3 Rinfuarçait lis mans ch’a colin,
dait vigorie ai genôi ch’a clopin.
4 Disêt ai cûrs sconsortâts:
“Coragjo! No stait a vê pôre,
ve il vuestri Diu!
Al ven cul svindic,
e je la pae di Diu,
lui al ven e us salvarà”.
5 In chê volte si spalancaran i vôi dai vuarps,
e lis orelis dai sorts si vierzaran.
6 In chê volte il çuet al saltarà tant che un cerf,
e la lenghe dal mut e scriularà di gjonde,
parcè che lis aghis a spissularan tal desert
e i riui te pustote.
7 Il teren arsinît al deventarà un palût,
e chel sec dut fodrât di risultivis di aghe,
tai lûcs ch’a levin a covâsi i siacai
la jerbe e deventarà cjane e vencjâr.
La procession dai sfrancjâts
8 E sarà une strade monde,
che i disaran “Strade sante”;
nissun soç nol passarà par li;
e nancje chei cence sintiment no si pierdaran.
9 Nol sarà plui il leon,
nissune bestie salvadie no fasarà chê strade,
ma a cjaminaran par li i salvâts.
10 A tornaran par li i sfrancjâts dal Signôr,
e a jentraran in Sion berlant di gjonde;
une contentece eterne e splendarà sul lôr cjâf,
ligrie e contentece ur coraran daûr,
biel che l’aviliment e il gemit a scjamparan.