PRIME PART
La piçule apocalÌs
I popui a judizi
34 1 Sdongjaitsi, forescj, par scoltâ,
e vualtris, popui, stait atents.
Ch’e scolti la tiere e dut ce ch’e à intorsi,
il mont e dut ce ch’al prodûs.
2 Parcè che il Signôr si è inrabiât cuintri di ducj i forescj,
si è disdegnât cuintri di ducj i lôr esercits,
ju à condanâts al svinidriment,
ju à distinâts al maçalizi.
3 La lôr int, passade fûr par fûr, e je stade sgurlade lontan,
e dai lôr cadavars e salte fûr la puce.
Lis monts si son imbombadis dal lôr sanc.
4 Si sfante dute la schirie dal cîl,
i cîi si rodolin sù tant che un libri,
dutis lis lôr schiriis a colaran,
come ch’e cole la fuee de vît,
usance lis fueis inflapidis dal fiâr.
Cjastic di Edom
5 La mê spade si è incjocade tal cîl,
ve, e plombe jù cuintri di Edom,
e cuintri di un popul che lu ài avodât al svinidriment.
6 La spade dal Signôr e je incolme di sanc,
e je fodrade di gras,
dal sanc dai agnei e dai becs,
dal gras dai budiei dai rocs,
parcè che il Signôr al ufrìs un sacrifici in Bozre,
un maçalizi di chei fenomenâi te tiere di Edom.
7 Dutune cun lôr a colin bisonts,
mangis insieme cun taurs;
la lôr tiere e je imbombade di sanc,
e il lôr pulvin al è fodrât di gras.
8 Parcè che e je la dì dal svindic dal Signôr,
l’an de pae par chel ch’al à difindût Sion.
9 I siei riui si mudaran in pês,
il so pulvin in solfar,
la lôr tiere e deventarà une pês ch’e art.
10 Ni di dì ni di gnot no si distudarà,
il so fum al larà sù par simpri;
e restarà deserte di ete in ete,
nissun nol passarà plui par li.
11 Le paronaran il pelican e la çuvite,
a laran a lozâsi il çus e il corvat.
Il Signôr i tirarà parsore vie la cuarde dal desert
e il nivel dal vueit.
12 A laran a stâ i satirs,
e i siei grancj no staran plui li;
no si nomenarà plui nissun re
e ducj i siei princips a saran fruçâts.
13 Tai siei palaçs a cressaran i baraçs,
tes sôs fuartecis urtiis e buralis;
e deventarà la tane dai siacai,
il sierai dai strus.
14 Cjans salvadis si incuintraran cu lis jenis,
e i satirs si clamaran un cul altri;
ventilà si sistemarà ancje Lilit,
cjatant un lûc di polse.
15 Aventi e fasarà il nît la lipare, e poiarà jù i siei ûs,
ju clucissarà, ju fasarà viergi ta l’ombrene;
li si daran dongje ancje i voltoris,
nissun nol pierdarà il so compagn.
16 Cirît tal libri dal Signôr e leiêt:
nissun di lôr nol mancjarà,
parcè che la sô bocje lu à ordenât,
e al è il so spirt che ju dà dongje.
17 Lui al tirarà a bruscjete par lôr;
la sô man ur à spartide la tiere seont misure,
le paronaran pe eternitât,
a vivaran li di ete in ete.