il libri dal emanuel
PRIME PART
Il re just
32 1 Ve, un re al regnarà seont justizie,
e i princips a rezaran seont il dirit.
2 Ognidun al sarà tant che un ripâr cuintri dal aiar,
e une paradane cuintri de tampieste,
tant che riui di aghe tune pustote,
tant che l’ombrene di une grande crete in tiere arsinide.
3 I vôi di chei ch’a viodin no saran plui sierâts,
e lis orelis di chei ch’a sintin a saran ativis.
4 Il cûr balarin al metarà riflès par capî,
e la lenghe dai barbots e spessearà a fevelâ pulît.
5 Il basoâl no i disaran plui nobil,
e nancje il furbo no i disaran grant.
6 Parcè che il basoâl al dîs robis cence dret,
e il so cûr al masane inicuitâts,
par podê fâ robatis
e dî robis fûr di plomp in merit al Signôr,
par tornâ a mandâ indaûr vueit il stomi di chel plen di fan
e lassâ cence un got di aghe chel plen di sêt.
7 Il furbo, orendis a son lis sôs furbetâts,
al masane porcariis,
par scjafoiâ i puars cun peraulis falsis,
intant che il puar al puarte indenant il so dirit,
8 cu la cuâl che il grant al progjete robis grandis,
e si jeve sù par fâ robis grandis.
Lis feminis cence fastidis
9 Feminis supierbeosis, jevait in pîts, scoltait la mê vôs; fiis plenis di braure, slungjait la orele a la mê peraule! 10 Di chi a un an e cualchi dì o trimarês, vualtris cussì braurosis, parcè che e je finide la vendeme e racolte no ’nt sarà plui. 11 Sgrisulaitsi, supierbeosatis; trimait, braurosatis! Gjavaitsi la munture, discrotaitsi, peaitsi i ombui. 12 Batêtsi il pet pai cjamps cussì biei, pai vignâi cussì bogns, 13 pe tiere dal gno popul, là ch’a cressaran spinis e baraçs, e ancje par dutis lis cjasis plenis di baldorie de citât ch’e pense dome a gjoldi. 14 Parcè che il palaç al è bandonât, la citât sunsurose e je deserte. L’Ofel e la toresse si ridusaran par simpri a landris, gjonde dai mus salvadis e passon dai trops.
Il ream a vignî
15 Ma tal ultin al sarà sborfât sore di nô il spirt di adalt;
il desert al deventarà un zardin,
e il zardin si tramudarà in bosc.
16 Tal desert al lozarà il dirit,
e la justizie e sarà a stâ tal zardin.
17 Efiet de justizie e sarà la pâs,
e il prodot dal dirit e sarà sigurece e pâs par simpri.
18 Il gno popul al vivarà tune cjase di pâs,
in cjasis siguris
e in lûcs cuiets.
19 E sarà tampieste, cuant che al colarà il bosc,
e la citât e sarà sbassade une vore.
20 Furtunâts vualtris ch’o semenarês ad ôr di dutis lis aghis,
e ch’o lassarês a slas i bûs e i mus.