il libri dal emanuel
PRIME PART
Cjante di salvece
12 1 In chê dì tu disarâs:
“Ti laudi, Signôr; tu sês stât inrabiât cuintri di me;
ma la tô rabie si è bonade e tu mi âs consolât.
2 Ve, Diu al è la mê salvece,
mi fidi e no ài pôre;
parcè che la mê fuarce e il gno cjant al è il Signôr;
al è lui la mê salvece.
3 O urissarês aghe cun gjonde
a lis risultivis de salvece”.
4 E in chê dì o disarês:
“Laudait il Signôr, berlait il so non;
fasêt cognossi framieç dai popui lis sôs robonis;
berlait che il so non al è grant cence fin.
5 Cjantait al Signôr parcè che al à fatis robis maraveosis,
e chest lu sa il mont intîr”.
6 Scriule e berle di gjonde, int di Sion,
parcè che al è grant framieç di te il Sant di Israel!