il libri dal emanuel
PRIME PART
Il re messianic de pâs
11 1 Ma un sfiol al saltarà fûr dal tronc di Jesse
e une menade e vignarà fûr des sôs lidrîs.
2 Sore di lui si poiarà il spirt dal Signôr,
spirt di sapience e di inteligjence,
spirt di consei e di coragjo,
spirt di cognossince e di timôr dal Signôr.
3 Al cjatarà la sô contentece tal timôr dal Signôr.
Nol judicarà seont lis aparincis
e nancje nol fasarà sentence par sintût a dî;
4 ma al judicarà i misars cun justizie
e al cjaparà decisions justis pai puars de tiere;
al pacarà il prepotent cu la vuiscje de sô bocje
e al fasarà murî il trist cu la soflade dai siei lavris.
5 La justizie e sarà la fasse dai siei ombui
e la fedeltât la cengle dai siei flancs.
6 Il lôf al vivarà insieme cul agnel
e la pantere si distirarà insieme cul cjavret;
il vidiel e il leon a passonaran insieme,
un frutut piçul ju menarà.
7 La vacje e l’ors a passonaran,
i lôr piçui si distiraran insieme,
il leon al mangjarà stranc a usance il bo.
8 Il frutut di tete al matearà su la buse dal sarpint
e il canai al metarà la man te cove de lipare.
9 No si fasarà mâl ni dam di sorte
sun dute la mê sante mont,
parcè che la tiere e sarà incolme
de cognossince dal Signôr,
come che lis aghis a cuviergin il mâr.
Si torne dal esili
10 In chê dì al sucedarà
che la lidrîs di Jesse
si alçarà sù tant che bandiere pai popui;
i forescj a coraran viers di jê,
e la sô cjase e sarà plene di glorie.
11 E in chê dì al sucedarà
che il Signôr al slungjarà di gnûf la sô man
par sfrancjâ il rest dal so popul,
restât de Assirie e dal Egjit,
di Patros, de Etiopie e di Elam,
di Senaar e di Amat e des isulis dal mâr.
12 Lui al alçarà une bandiere viers dai forescj
e al tirarà dongje i dispierdûts di Israel,
al metarà adun dai cuatri cjantons dal mont
i sparniçâts di Gjude.
13 La gjelosie di Efraim e sarà gjavade,
e i nemîs di Gjude a saran fruçâts;
Efraim nol invidiarà plui Gjude
e Gjude nol varà plui rusin cuintri di Efraim.
14 Ma ur plombaran intor ai filisteus a soreli a mont
e insieme a dispuearan i fîs de jevade;
Edom e Moab a saran lôr paronance
e i fîs di Amon a saran lôr sotans.
15 Il Signôr al secjarà la lenghe dal mâr dal Egjit
e al scjassarà la sô man sul flum
cu la fuarce dal so spirt,
e lu spartissarà in siet riui
di rivâ a passâlu ancje cui sandui.
16 E a sarà une strade pal rest dal so popul,
di ce che si salvarà de Assirie,
come ch’e je stade par Israel
cuant che al è saltât fûr de tiere dal Egjit.