LA CONCUISTE DE TIERE IMPROMETUDE
La tiere ancjemò di spartî
18 1 La trope dai fîs di Israel si dè dongje in semblee a Silo, là che a vevin montade la tende de cunvigne; dut ce che a vevin denant dai vôi e jere robe lôr. 2 A restavin però, framieç dai israelits, siet tribûs che no vevin vude la lôr part. 3 Alore Gjosuè ur disè ai israelits: “Trop us covential ancjemò prin di lâ a cjapâ paronance de tiere che us à dade il Signôr, Diu dai nestris vons? 4 Tiraitsi fûr trê oms par tribù, che ju mandarai a dâi une cjalade a dute la regjon par savêmi a dî in merit a la division; daspò a tornaran di me. 5 A dividaran la tiere in siet parts. Gjude al restarà sul so toc par disot, e chei de cjase di Josef a restaran sul lôr toc adalt. 6 O segnarês i siet tocs e mai puartarês a mi, che o puedi tirâ a bruscjete par vualtris culì, denant dal Signôr nestri Diu. 7 Par chel che al rivuarde i levits, no varan nissun toc framieç di vualtris: la lôr legjitime e sarà chê di fâ i predis dal Signôr. Gad, Ruben e miege tribù di Manasse a àn za vude la lôr part di là dal Gjordan, a jevade, chê che ur e à lassade Mosè, famei dal Signôr”.
8 Chescj oms si cjaparin sù e a partirin. A chei che a vevin di lâ a fâ la division, Gjosuè ur dè chest ordin: “Lait, passait la regjon fûr par fûr e segnaitle; po o tornarês di me e jo o tirarai la bruscjete culì, danant dal Signôr, a Silo”. 9 Chei oms a partirin, a traviersarin la regjon e le dividerin par citâts in siet parts, segnant suntun libri, po a tornarin di Gjosuè tal campament di Silo. 10 Gjosuè al tirà a bruscjete fra i fîs di Israel daûr che ur tocjarin i tocs.
Teritori di Beniamin
11 Il prin lot i tocjà a la tribù dai fîs di Beniamin, daûr des lôr fameis: il lôr toc al jere plaçât fra i fîs di Gjude e i fîs di Josef.
12 Il lôr confin de bande disore al partive dal Gjordan, al leve sù ad ôr di Gjeric e al finive tal desert di Bet-Aven. 13 Di li, il confin al rivave fint a Luz, ad ôr di Luz de bande disot, cumò Betel; al leve jù fint a Atarot-Adar su la mont ch’e je a misdì di Bet-Coron disot.
14 Il confin al voltave, cjalant a mont, par in jù, de mont ch’e je in face di Bet-Coron disot fintremai des bandis di Kiriat-Baal, cumò Kiriat-Jearim, citât dai fîs di Gjude. Chest al jere il confin a mont.
15 Ve il confin a misdì: de estremitât di Kiriat-Jearim, il confin al leve de bande di soreli a mont e al finive dongje de risultive des aghis di Neftoac; 16 po al leve jù dapît de mont ch’e je ripet de valade di Ben-Inom, te plane dai refaim; par disore al leve jù te valade di Inom fint ad ôr dai gjebuseus par disot, e si sbassave a En-Roghel. 17 Po al faseve un gîr par disore fint a En-Semes e al finive tal cercli di claps che al è in face de rive di Adumim; po si sbassave fin tal clapon di Bocam, fi di Ruben. 18 Al passave par Ketef ad ôr de Arabe da bande disore e al leve jù de bande de Arabe; 19 daspò il confin al passave ad ôr di Bet-Ogle adalt e al finive tal ricès dal mâr dal Sâl, a miegegnot, tal cjanton plui bas dal Gjordan. Chest al jere il confin par disot.
20 Il Gjordan al faseve di confin de bande de jevade.
Al è chest il toc dai fîs di Beniamin cui siei confins torator, daûr des lôr fameis.
21 Lis citâts de tribù dai fîs di Beniamin, daûr des lôr fameis, a jerin: Gjeric, Bet-Ogle, Emek-Kesis, 22 Bet-Arabe, Zemaraim, Betel, 23 Avim, Pare, Ofre, 24 Chefar-Amonai, Ofni, Ghebe: dodis citâts cui lôr borcs. 25 Gabaon, Rame, Beerot, 26 Mizpe, Chefire, Mose, 27 Rekem, Irpeel, Tareale, 28 Sele-Elef, Jebus, vadì Gjerusalem, Gabe, e Kiriat-Fearim: cutuardis citâts cui lôr borcs.
Cheste e fo la legjitime dai fîs di Beniamin daûr des lôr fameis.