LA CONCUISTE DE TIERE IMPROMETUDE
La tribù di Efraim
16 1 Il lot dai fîs di Josef al partive dal Gjordan dongje di Gjeric e si slargjave de bande des aghis di Gjeric a soreli jevât, confinant il desert che, pe mont, al va sù di Gjeric a Betel. 2 Po il confin al partive di Betel-Luze e al passave pe frontiere dai archits e Atarot; 3 al leve jù a soreli a mont de bande dal confin dai jafletits fint al confin di Bet-Coron disot e fint a Ghezer e al rivave fint al mâr. 4 I fîs di Josef, Manasse e Efraim, a cjaparin ognidun la lôr ereditât.
5 Chest al jere il lot dai fîs di Efraim, daûr des lôr fameis. Il confin de lôr ereditât al jere, a soreli a mont, Atarot-Coron disore; 6 po al leve jù fint al mâr, de bande di soreli a mont, viers di Micmetat par in sù; al voltave a jevade viers di Taanat-Silo e i passave par denant a soreli jevât di Janoac. 7 Di Janoac si sbassave fint a Atarot e a Naare, al tocjave Gjeric par lâ a finîle ad ôr dal Gjordan. 8 Di Tapuac, il confin al leve, a mont, fin tal riul di Kane e al finive tal mâr. Cheste e fo la ereditât de tribù dai fîs di Efraim, daûr des lôr fameis, 9 comprendudis lis citâts, dutis lis citâts cui borcs, risiervadis pai fîs di Efraim framieç de ereditât dai fîs di Manasse.
10 No rivarin a parâ vie i cananeus che a jerin a stâ a Ghezer; i cananeus a àn vivût framieç di Efraim fintremai a vuê, condanâts a lis voris plui griviis.