DISTRIBUZION DE TIERE IMPROMETUDE
Regjons ancjemò di cjapâ
13 1 Intant Gjosuè al jere deventât vieli, e indenant cui agns. Il Signôr i disè: “Viôt trop vieli che tu sês e cetant in sù cui agns, e cun dut chest ti reste di cjapâ ancjemò un disordin di tieris. 2 Ve dutis lis tieris che ti restin: ducj i distrets dai filisteus e dute la regjon dai ghesurits; 3 di Sicor, in face dal Egjit, fint al confin di Ekron par disore, che al sarès dai cananeus; i cinc princips dai filisteus a son chel di Gaze, chel di Asdod, chel di Ascalon, chel di Gat e chel di Ekron; i avits a son 4 disot; dute la regjon dai cananeus e Are, ch’e je dai sidonês, fint a Afek e fint al confin cui amoreus; 5 po la regjon di Biblos, cun dut il Liban a soreli jevât, di Baal-Gad dapît de mont Ermon finamai a la jentrade di Amat. 6 Dute la int des monts dal Liban fint a Misrefot-Maim, ducj i sidonês, mi tocje a mi di fâju cori denant dai israelits. Tu tu âs dome di dividi il paîs e di dâlu in ereditât ai israelits come che jo ti ài ordenât.
Lis tribûs de Transgjordanie
7 Al è rivât il moment di dividi cheste regjon e di spartîle fra lis nûf tribûs e miege tribù di Manasse”. 8 Cheste miege tribù di Manasse, insieme cui fîs di Ruben e di Gad, e veve bielzà vude la sô part, ce che Mosè ur veve dât di là dal Gjordan, a soreli jevât, come che Mosè, famei di Diu, al veve dit in chê volte; 9 scomençant di Aroer, ad ôr de valade dal Arnon, cu la citât ch’e je tal font de valade e dute la plane di Madabe fint a Dibon; 10 dutis lis citâts di Sicon, re dai amoreus, che al veve regnât a Chesbon, fint al confin cui amonits. 11 E ancjemò il Galaad e la regjon dai ghesurits e dai maacatits, cun dute la mont dal Ermon e dut il Basan, fint a Sacle; 12 e tal Basan, dut il ream di Og, che al veve regnât a Astarot e a Edrei, che al fo ancje l’ultin restât dai refaims. Mosè al veve vinçût e spodestît chescj rês. 13 Ma i israelits no rivarin adore di parâ fûr ni i ghesurits ni i maachetits, pa la cuâl Ghesur e Maache a son ancjemò framieç di Israel. 14 La tribù di Levi e fo l’uniche che no i derin un toc: la sô ereditât a son i sacrificis consumâts dal fûc pal Signôr Diu di Israel, come che i veve dit il Signôr.
15 Mosè ur veve dât a la tribù dai fîs di Ruben une part daûr des lôr fameis. 16 Ur tocjà partant di Aroer, ad ôr de valade dal Arnon cu la citât ch’e je tal font de valade, dute la plane fint a Madabe, 17 Chesbon cun dutis lis citâts che a son su la plane, Dibon, Bamot-Baal, Bet-Baal-Meon, 18 Jaas, Kedemot, Mefaat, 19 Kiriataim, Sibme e, su la mont de Arabe, Zeret-Sacar; 20 Bet-Peor, lis clevis bagnadis dal Pisghe, Bet-Jesimot, 21 dutis lis citâts de plane e dut il ream di Sicon, re dai amoreus, che al regnà a Chesbon, che al jere stât batût di Mosè dutune cui princips di Madian, Evi, Rekem, Zur, Cur, Rebe, sotans di Sicon, che a jerin a stâ aventi. 22 Rivuart a Balaam, fi di Beor, l’induvinin, i israelits lu vevin passât a fîl di spade cun ducj chei che ju vevin fats fûr. 23 E cussì il confin dai rubenits al jere il Gjordan e il so teritori. Cheste e fo la ereditât dai fîs di Ruben daûr des lôr fameis: lis citâts cui lôr borcs.
24 Mosè ur veve dât a la tribù di Gad, ai fîs di Gad, un toc daûr des lôr fameis. 25 Ur tocjà Jazer, dutis lis citâts di Galaad, miege la regjon dai amonits fint a Aroer, in face di Rabe, 26 e di Chesbon finamai a Ramat-Mizpe e Betonim; tacant di Macanaim fint a la regjon di Lodebar, 27 e te valade: Bet-Aram, Bet-Nimre, Sucot, Zafon, ce che al jere vanzât dal ream di Sicon, re di Chesbon, il Gjordan e dut il toc che al leve fin dapît dal mâr di Gjenezaret, di là dal Gjordan, a jevade. 28 Cheste e fo la ereditât dai fîs di Gad, daûr des lôr fameis: lis lôr citâts cui lôr borcs.
29 Mosè i veve dât a la miege tribù di Manasse une part daûr des lôr fameis. 30 Ur tocjà, tacant di Macanaim, dut il Basan, dut il ream di Og, re di Basan, dutis lis borgadis di Jair che a son in Basan, vadì sessante citâts. 31 Mieç Galaad, dutune cun Astarot e Edrei, citâts regâls di Og in Basan, ur lerin ai fîs di Machir, fi di Manasse, anzit a mieçs dai fîs di Machir, daûr des lôr fameis.
32 Ve ce che Mosè ur veve dât in ereditât tai passons di Moab, di là dal Gjordan, in face di Gjeric, a jevade. 33 A la tribù di Levi però Mosè no i veve lassade nissune part: al è il Signôr, Diu di Israel, la sô legjitime, daûr che al à dit lui.