LA CONCUISTE DE TIERE IMPROMETUDE
Liste dai rês vinçûts a jevade dal Gjordan
12 1 Ve chi i rês de regjon che i israelits ju baterin e che ur puartarin vie la tiere di là dal Gjordan, a jevade, dal riul dal Arnon fint a la mont dal Ermon, cun dute l’Arabe a soreli jevât.
2 Sicon, re dai amoreus, che al jere a stâ a Chesbon, al paronave di Aroer ad ôr de valade dal Arnon, comprendût ancje il font de valade, mieç Galaad fint al Jabok, il riul che al fâs di confin cui amonits; 3 l’Arabe fint al mâr di Chinarot a soreli jevât e fint al mâr de Arabe, vadì mâr Salât, a jevade, de bande di Bet-Jesimot e, par disot, dapît des clevis bagnadis dal Pisghe.
4 Og, re di Basan, un dai ultins refaims, che al jere a stâ a Astarot e a Edrei, 5 al paronave la mont dal Ermon e Salche, dut il Basan fint al confin cui ghesurits e cui maacatits, e mieç Galaad fint ai confins di Sicon, re di Chesbon. 6 Mosè, servidôr dal Signôr, e i israelits ju vevin vinçûts e Mosè, servidôr dal Signôr, ju veve dâts in paronance ai fîs di Ruben, di Gad e a miege tribù di Manasse.
7 Ve chi i rês de regjon che Gjosuè e i israelits ju baterin par di ca dal Gjordan a soreli a mont, di Baal-Gad, te valade dal Liban, fint a la mont di Calac de bande di Seir, e che Gjosuè ju passà in paronance, a lis tribûs di Israel daûr che si jerin dividudis: 8 su la mont e te concje, te Arabe e su lis clevis, tal desert e tal Negheb, là che a jerin i itits, i amoreus, i cananeus, i perissits, i eveus e i gjebuseus:
9 il re di Gjeric, un; il re di Ai, dongje di Betel, un;
10 il re di Gjerusalem, un; il re di Ebron, un;
11 il re di Jarmut, un; il re di Lachis, un;
12 il re di Eglon, un; il re di Ghezer, un;
13 il re di Debir, un; il re di Gheder, un;
14 il re di Corme, un; il re di Arad, un;
15 il re di Libne, un; il re di Adulam, un;
16 il re di Makede, un; il re di Betel, un;
17 il re di Tapuac, un; il re di Efer, un;
18 il re di Afek, un; il re di Sarom, un;
19 il re di Madon, un; il re di Cazor, un;
20 il re di Simron-Meron, un; il re di Acsaf, un;
21 il re di Tanac, un; il re di Meghido, un;
22 il re di Kades, un; il re di Jokneam tal Carmêl, un;
23 il re di Dor, su la cueste di Dor, un;
il re dai forescj in Galilee, un;
24 il re di Tirze, un.