CLAMADE DI GJEREMIE
SOT IL REAM DI GJOSIE
Promessis fatis a Baruc
45 1 Cheste e je la peraule che Gjeremie il profete i à dite a Baruc, fi di Nerie, cuant che al scriveve chestis peraulis tal libri, par ordin di Gjeremie, tal cuart an di Joiakim, fi di Gjosie, re di Gjude: 2 “Il Signôr, Diu di Israel, al dîs cussì sul to cont, Baruc: 3 Tu tu disis: Puar mai me! Parcè il Signôr reongial il gno dolôr cui fastidis? Tal gno gemi o soi cjamât di fastidis e no cjati recuie. 4 Il Signôr al dîs: Ve, ce ch’o vevi fat sù jo lu sdrumi e ce ch’o vevi plantât jo lu gjavi di lidrîs, vadì dute la tiere. 5 Ma tu tu pretindis par te robonis. No sta pretindi, parcè che ve chi ch’o soi: Jo o stoi par fâ plombâ la disgracie sore di ogni om, – sentence dal Signôr! –; ma a ti ti ài lassade la vite come rafât, pardut là che tu larâs”.