CLAMADE DI GJEREMIE
SOT IL REAM DI GJOSIE
Nabucodonosor al cjape Gjerusalem e al libere Gjeremie
39 1 Tal nono an di Sedecie, re di Gjude, tal decim mês, al rivà cuintri di Gjerusalem Nabucodonosor, re di Babilonie, cun dutis lis sôs schiriis e le sidiâ di ogni bande. 2 Tal undicesim an di Sedecie, tal cuart mês, ai nûf dal mês, al fo fat un slambri te citât, 3 a jentrarin ducj i princips dal re di Babilonie e si stabilirin dongje de puarte di Mieç: Nergal-Sarezer di Sin-Magir, Nebosar-Sechim sorestant dai cjamerârs, Nergal-Sarezer sorestant des trupis di confin e ducj chei altris princips dal re di Babilonie.
4 A pene che ju viodè, Sedecie, re di Gjude, e ducj i oms di vuere a scjamparin e a jessirin de citât in plene gnot pal troi dal zardin dal re, pe puarte ch’e je jenfri dai doi mûrs. A saltarin fûr duncje de bande de Arabe. 5 Ma i soldâts dai caldeus ur corerin daûr e a brincarin Sedecie te pustote di Gjeric. Lu gafarin e lu menarin di Nabucodonosor, re di Babilonie, a Rible te tiere di Amat, là ch’al fasè sentence cuintri di lui. 6 Podopo il re di Babilonie al fasè taiâ il cuel ai fîs di Sedecie in Rible, sot dai siei vôi; po il re di Babilonie ur fasè taiâ il cuel a ducj i sorestants di Gjude. 7 Po i gjavà i vôi a Sedecie e lu fasè peâ cun cjadenis par menâlu a Babilonie. 8 I caldeus i derin fûc a la cjase dal re e a lis cjasis dal popul e a sdrumarin lis muris di Gjerusalem, 9 biel che Nabuzardan, sorestant des vuaitis, al menà in esili dut il popul ch’al jere restât in citât, chei che si jerin butâts cun lui e ce ch’al jere restât dal popul. 10 Rivuart al popul dai puars, che no jerin parons di nuie, Nabuzardan, sorestant des vuaitis, lu fasè restâ te tiere di Gjude e in chê ocasion ur dè vignâi e cjamps.
11 Rivuart a Gjeremie, invezit, Nabucodonosor, re di Babilonie i dè chest ordin a Nabuzardan, sorestant des vuaitis: 12 “Cjapilu e tenlu di voli, ma no sta fâi malegraciis; anzit tratilu daûr che ti disarà lui”. 13 Alore i dè l’incariche a Nabuzardan, sorestant des vuaitis, e a Nabusazban, sorestant dai funzionaris, e a Nergal-Sarezer, sorestant des trupis di confin, e a ducj i grancj dal re di Babilonie 14 e lôr a mandarin a cjoli Gjeremie tal curtîl des vuaitis e jal consegnarin a Godolie, fi di Achikam, fi di Safan, par che lu menàs cjase. Cussì lui al restà framieç dal popul.
Sentence par Ebed-Melec
15 La peraule dal Signôr i je stade dite a Gjeremie, biel ch’al jere presonîr tal curtîl des vuaitis, cussì: 16 “Va e dîsii cussì a Ebed-Melec il kussit: Il Signôr des schiriis, Diu di Israel, al dîs cussì: Ve chi ch’o soi! O stoi par meti in vore lis mês peraulis cuintri di cheste citât, di disgracie e no di ben; e in chê dì a deventaran sot i tiei vôi. 17 Ma jo in chê dì ti salvarai – sentence dal Signôr! – e no tu sarâs consegnât tes sgrifis di chei oms che tu tu âs terôr di viodiju. 18 Propit! Ti salvarai di sigûr e no tu colarâs di spade, ma la tô vite e sarà par te il to rafât, parcè che tu ti sês fidât di me”. – Sentence dal Signôr! –.