CLAMADE DI GJEREMIE
SOT IL REAM DI GJOSIE
Indaûr promessis di restaurazion
33 1 La peraule dal Signôr i je stade dite a Gjeremie un’altre volte, intant ch’al jere ancjemò sierât tal curtîl des vuaitis: 2 “Cussì al dîs il Signôr, ch’al à fate la tiere, che le à poleade e rinsaldade, che il so non al è Signôr: 3 Clamimi e ti rispuindarai e ti contarai robis grandis e che no si rive mai a font, che no tu lis cognossis. 4 Propit! Il Signôr, Diu di Israel, al dîs cussì sul cont des cjasis di cheste citât e sul cont des cjasis dai rês di Gjude, ch’a saran sdrumadis dai grums di tiere e de spade, 5 lis cjasis di chei ch’a laran a combati cuintri dai caldeus, ma par jemplâlis cui cadavars dai oms che jo o varai pestâts inte mê rabie e inte mê ire, parcè che o ài platade la mê muse denant di cheste citât par colpe di dute la lôr tristerie. 6 Ve chi ch’o soi! O fasarai sierâ la lôr feride e ju medearai e ju vuarissarai; dopo ju inondarai cun bondance di pâs e di sigurece. 7 O fasarai tornâ dongje i esiliâts di Gjude e i esiliâts di Israel e ju tornarai a meti in pîts come tal imprin. 8 Ju smondearai di ogni lôr inicuitât che a àn pecjât cuntri di me e ur perdonarai dutis lis lôr inicuitâts che si son rivoltâts cuintri di me. 9 E cheste e sarà par me une reson di gjonde, di laut e di glorie denant di ogni gjernazie de tiere, cuant che a vignaran a savê dut il ben che jo ur fasarai vê; alore a varan teme e spavent par vie di dut il ben e di dute la pâs che jo i fasarai vê. 10 Il Signôr al dîs cussì: In chest lûc,– che vualtris o disês in merit: Al è une ruvine, cence oms e cence nemâi; pes monts di Gjude e pes contradis di Gjerusalem, fiscadis, no ’nd è oms e no ’nd è int ni nemâi –, si sintarà indaûr 11 scriul di gjonde e scriul di ligrie, vôs di nuviç e vôs di nuvice, vôs di chel ch’al dîs, puartant sacrificis di laut te cjase dal Signôr : Laudait il Signôr des schiriis, parcè che il Signôr al è bon, parcè che il so boncûr al è par simpri . Propit! O tornarai a menâ dongje i esiliâts de tiere come tal imprin, al dîs il Signôr.
12 Il Signôr des schiriis al dîs cussì: In chest lûc sdrumât, – cence oms e cence nemâi - e in dutis lis sôs citâts, al sarà ancjemò passon pai pastôrs ch’a fasin polsâ lis pioris. 13 Par dutis lis citâts de mont, pes citâts de Sefele e pes citâts dal Negheb, pe tiere di Beniamin e pai contors di Gjerusalem e pes citâts di Gjude a passaran ancjemò lis pioris sot la man di chel che lis conte, al dîs il Signôr.
Il butul di justizie
14 Ve, a stan par rivâ dîs – sentence dal Signôr! – che jo o metarai in vore cheste promesse di ben che jo o ài fate a la cjase di Israel e a la cjase di Gjude. 15 In chei dîs e in chê volte o fasarai butâ a David un butul di justizie, ch’al metarà in vore il dirit e la justizie inte tiere. 16 In chê dì Gjude al sarà salvât e Gjerusalem e vivarà sigure e chest al è il non che le clamaran: Signôr-nestre-justizie.
17 Di fat il Signôr al dîs cussì: No i mancjarà a David chel che si sente su la sente de cjase di Israel; 18 e ai predis levits no ur mancjarà un ch’al ufrissi, denant di me, l’olocaust, ch’al fasi sprofumâ la ufierte e al fasi il sacrifici ogni dì”.
19 La peraule dal Signôr i je stade dite a Gjeremie cussì: 20 “Il Signôr al dîs cussì: Se si podès rompi il gno pat cul dì e il gno pat cu la gnot, di mût che nol sedi plui dì e gnot tal moment just, 21 alore al colarès ancje il gno pat cun David, gno servidôr, di mût che nol vedi plui un fi ch’al regni su la sô sente e ancje cui predis levits miei fameis. 22 Come che no si rive a contâ lis schiriis dal cîl e no si rive a contâ il savalon dal mâr, cussì o moltiplicarai la dissendence di David, gno servidôr, e i levits miei fameis”.
23 Al è capitât ancjemò che la peraule dal Signôr i je stade dite a Gjeremie cussì: 24 No âstu fat câs di ce che chest popul al è lât ator disint: Lis dôs fameis che il Signôr al veve sielzudis lis à ancje svinidridis. Cussì a dispresein il gno popul come che nancje nol fos par lôr une gjernazie?”. 25 Il Signôr al dîs cussì: “Se nol esistès il gno pat cul dì e cu la gnot, se no ves stabilidis leçs cul cîl e cu la tiere, 26 ancje la gjernazie di Jacop e di David, gno famei, le butarès di bande, par no cjapâ sù de sô dissendence chei ch’a paronaran su la gjernazie di Abram, di Isac e di Jacop. Ma jo o fasarai tornâ dongje i lôr esiliâts e o varai dûl di lôr”.