CLAMADE DI GJEREMIE
SOT IL REAM DI GJOSIE
Ristaurazion e gnûf pat
31 1 In chê volte, – sentence dal Signôr! –
jo o sarai Diu par dutis lis fameis di Israel
e lôr a saran il gno popul”.
2 Il Signôr al dîs cussì:
“Al à cjatade gracie tal desert
un popul di scjampâts a la spade.
Israel al va viers de sô polse”.
3 Il Signôr mi à comparît di lontan:
“Ti ài volût ben cuntun amôr eterni,
par chel ti ài compagnade cun amôr.
4 O tornarai a fâti sù di gnûf e tu sarâs tornade a fâ sù,
fantate di Israel,
tu tornarâs ancjemò a furnîti cui tiei tamburei
e tu jessarâs framieç dai balarins plens di ligrie.
5 Tu plantarâs indaûr vignâi
su lis monts di Samarie;
chei ch’a plantaran, a cjaparan ancje sù.
6 Propit! E vignarà chê dì ch’a berlaran lis vuaitis
su la mont di Efraim:
Jevait in pîts e anìn sù in Sion,
viers dal Signôr, nestri Diu!”.
7 Propit! Il Signôr al dîs cussì:
“Dait sù cjantis di gjonde par Jacop
e scriulait pe prime des gjernaziis.
Fasêtlu sintî, scriulait e berlait:
Il Signôr al à salvât il so popul,
il rest di Israel”.
8 Ve chi ch’o soi: o tornarai a menâju dongje
de tiere de tramontane,
ju met adun dai ultins confins dal mont.
Framieç di lôr al è il vuarp e il strupiât,
la femine ch’e spiete insieme cu la parturient:
e je une fulugne di int ch’e torne chenti.
9 A son partîts vaint,
ju torni a menâ dongje consolâts:
ju torni a menâ ad ôr dai riui di aghe
par une strade plane, là che no si inçopedaran,
parcè che jo o soi un pari par Israel
e Efraim al è il gno primarûl.
10 Scoltait, forescj, la peraule dal Signôr,
e contaitle fin tes isulis lontanis.
Disêt: “Chel ch’al à dispierdût Israel, lu tire dongje
e lu vuardee tant che il pastôr cul so trop”.
11 Propit! Il Signôr al à sfrancjât Jacop
e lu à svindicât di une man plui fuarte di lui.
12 A vignaran e si indalegraran sul çuc di Sion,
a coraran a pleton viers de gjonde dal Signôr:
viers dal forment e dal most e dal vueli,
e viers i piçui dal trop e il besteam;
la lôr vite e sarà tant che un zardin bagnât
e no varan plui ce penâ.
13 In chê volte la fantate si indalegrarà balant,
zovins e viei a saran contents,
parcè che o tramudarai il lôr corot in gjonde,
ju confuartarai e ju indalegrarai, pai lôr patiments.
14 O passarai cence culumie l’anime dai predis,
e il gno popul si sacearà cu la mê gjonde.
– Sentence dal Signôr! –
La vaiude di Rachêl e la sô consolazion
15 Il Signôr al dîs cussì:
“Si à sintût un berli in Rame,
lament e vaiude plene di marum.
Rachêl e vai pai siei fîs,
e no vûl jessi confuartade
pai siei fîs che no son plui!”.
16 Il Signôr al dîs cussì:
“Straten la tô vôs dal vaî
e i tiei vôi dal lagrimâ,
parcè che e je une pae pes tôs penis:
– sentence dal Signôr! –
di fat a tornaran de tiere dal nemì.
17 And è ancjemò sperance pe tô dissendence,
– sentence dal Signôr! –
parcè che i tiei fîs a tornaran jenfri dai lôr confins.
18 O scolti atent Efraim che si lamente.
Tu mi âs cjastiât e o soi stât cjastiât,
tant che un manzut nancjemò domât.
Fasimi tornâ, o vuei tornâ.
Propit! Tu tu sês il Signôr, il gno Diu.
19 Propit! Dopo tornât dongje, jo mi soi pintût
e dopo di vê fate sperience
mi soi patafât l’ombul.
Mi vergogni e o deventi ros
parcè che o puarti intor la vergogne de mê zoventût.
20 Isal duncje Efraim un fi cjâr par me,
o un frut gjoldibil,
che ogni volte ch’o feveli cuintri di lui
lu ricuardi simpri cun afiet?
Par chel lis mês vissaris si ingropin par lui,
di lui o ài grant dûl”.
– Sentence dal Signôr! –
21 Fasiti tirâ sù cualchi colonel,
fasiti meti cualchi segnâl,
cjale ben il troi,
la strade che tu sês passade.
Torne, fantate di Israel,
torne in chestis tôs citâts!
22 Fin cuant larâstu pelandonant,
fie cjaviestre?
Propit! Il Signôr al à creade une robe gnove inte tiere:
la femine i starà daprûf al om!
Restaurazion di Gjude e di Israel
23 Il Signôr des schiriis, Diu di Israel, al dîs cussì: “Si tornarà a dî ancjemò cheste robe te tiere di Gjude e tes sôs citâts, cuant che o varai sledrosât il lôr distin: Che il Signôr ti benedissi, cjase di justizie, mont sante! 24 Aventi si sistemaran Gjude insieme cun dutis lis sôs citâts, i contadins e chei ch’a menin a passon il trop. 25 Di fat jo o ristorarai l’anime sfinide e o sostentarai ogni anime inflapide”.
26 Par chel mi soi sveât e o ài cjalât: ve il gno sium al jere dolç par me!
27 “Ve: a vignaran dîs – sentence dal Signôr – che jo o semenarai la cjase di Israel e la cjase di Gjude cun semence di om e cun semence di besteam. 28 E al sucedarà che come ch’o ài veglât sore di lôr par dislidrisâ, par sdrumâ e par butâ jù, par fiscâ e par fâ dam, cussì o veglarai sore di lôr par fâ sù e par plantâ”. – Sentence dal Signôr! –.
La ricompense e je personâl
29 “In chei dîs no si disarà plui:
i paris a àn mangjât il gherp
e i dincj dai fîs si son peâts.
30 Ma ognidun al murarà par colpe de sô tristerie: chel ch’al mangjarà il gherp, al varà lui i dincj peâts”.
Il gnûf pat
31 “Ve: a vignaran dîs – sentence dal Signôr! – ch’o fasarai cu la cjase di Israel e cu la cjase di Gjude un pat gnûf. 32 No come il pat ch’o ài fat cui lôr vons la dì che ju ài cjapâts pe man par fâju saltâ fûr de tiere dal Egjit, parcè che lôr a àn tradît il gno pat, cun dut che jo o jeri il lôr Signôr – sentence dal Signôr! –. 33 Ma il pat che jo o fasarai cu la cjase di Israel sul finî di chei dîs al sarà chest – sentence dal Signôr! –: o metarai la mê leç dentri di lôr e ur e scrivarai sul lôr cûr; jo o sarai il lôr Diu e lôr a saran il gno popul. 34 E no si inscuelaran plui un cul altri disint: Ricognossêt il Signôr!, parcè che ducj mi ricognossaran, dal plui piçul al plui grant di lôr – sentence dal Signôr! – parcè che jo o perdonarai la lôr tristerie e no mi impensarai plui dai lôr pecjâts”.
Stabilitât di Israel
35 Cussì al dîs il Signôr,
ch’al dà il soreli pal lusôr dal dì,
leçs a la lune e a lis stelis pal lusôr de gnot,
ch’al alce il mâr e al fâs mungulâ lis sôs ondis,
e che il so non al è il Signôr des schiriis:
36 “Se chestis leçs a vessin di sparî
de mê presince, – sentence dal Signôr! –
ancje la semence di Israel e finissarès,
no sarès plui par me une gjernazie, par in secula”.
37 Il Signôr al dîs cussì:
“Se si rivàs a misurâ il cîl adalt
o a splorâ lis fondis de tiere abàs,
alore jo o butarai di bande dute la semence di Israel
par dut ce ch’e à cumbinât” – sentence dal Signôr! –.
Grandece e ricostruzion di Gjerusalem
38 Ve: a vignaran dîs – sentence dal Signôr! – che la citât dal Signôr e sarà tornade a fâ sù de toresse di Cananeel fintremai a la puarte dal Cjantonâl. 39 La cuarde par misurâle e saltarà fûr denant di jê: e larà sù sul çuc di Gareb e e voltarà de bande di Goe. 40 Dute la concje, i cadavars e la cinise e i cjamps fint al riul dal Cedron, fint al cjanton de puarte dai Cjavai a soreli jevât, al sarà dut consacrât pal Signôr. No si butarà jù plui e no si sdrumarà plui: par in secula”.