CLAMADE DI GJEREMIE
SOT IL REAM DI GJOSIE
I doi geis di fîcs: spieli e spiegazion
24 1 Il Signôr mi à fat viodi e ve: doi geis di fîcs a jerin metûts denant dal templi dal Signôr, dopo che Nabucodonosor, re di Babilonie, al veve depuartât Jeconie, fi di Joiakim, re di Gjude e i sorestants di Gjude e i faris e i grancj di Gjerusalem e ju veve menâts in Babilonie. 2 Il prin gei al veve fîcs une vore bogns, come lis flôrs, biel che il secont gei al veve fîcs une vore triscj, di no rivâ a mangjâju di tant ch’a jerin triscj.
3 Alore il Signôr mi à dite: “Ce viodistu po, Gjeremie?”. I ài rispuindût: “Fîcs! Fîcs bogns cence fin e fîcs triscj che mai, di no rivâ a mangjâju di tant triscj ch’a son”.
4 Alore la peraule dal Signôr mi è stade dite cussì: 5 “Il Signôr, Diu di Israel, al dîs cussì: Come che si ten cont di chescj fîcs bogns, cussì jo o tignarai cont dai depuartâts di Gjude che ju ài parâts vie di chest lûc inte tiere dai caldeus, pal lôr ben. 6 Jo o metarai il gno voli sun lôr pal lôr ben e o tornarai a menâju in cheste tiere; ju sistemarai e no ju fruçarai, ju plantarai e no ju dislidrisarai. 7 Po ur darai un cûr par cognossimi, parcè che jo o soi il Signôr; lôr a saran il gno popul e jo o sarai il lôr Diu, parcè che a tornaran di me cun dut il cûr. 8 Rivuart po ai fîcs triscj, di no rivâ a mangjâju di tant triscj ch’a son, il Signôr al dîs: Cussì o fasarai cun Sedecie, re di Gjude, e cui siei princips e cul rest di Gjerusalem ch’al restarà in cheste tiere e ch’a vivin te tiere dal Egjit. 9 O fasarai di lôr une robe ch’e fâs spavent par ducj i reams de tiere; une vergogne e un spieli, une sblefe e une maludizion in ducj i lûcs pardut là che ju varai dispierdûts. 10 O mandarai cuintri di lôr la spade, la fan e la peste fin che no saran svinidrîts de tiere che ur ài dade a lôr e ai lôr vons”.