Direzion
1 Pauli, presonîr di Crist Gjesù, e il fradi Timoteu al cjâr Filemon e nestri colaboradôr, 2 a la sûr Apie, a Archip nestri compagn di batae e a la glesie che si dà dongje a cjase tô. 3 Gracie a vualtris e pâs de bande di Diu nestri Pari e di Gjesù Crist Signôr.
Ringraciament a Diu pal amôr e pe fede di Filemon
4 Ogni volte che m’impensi di te tes mês preieris, o ringracii il gno Diu 5 parcè che o sint a fevelâ dal to amôr e de fede che tu âs pal Signôr Gjesù e par ducj i sants. 6 La solidarietât de tô fede ch’e deventi simpri plui fuarte midiant di une cognossince plui plene di dut il ben che si fâs framieç di nô pal Crist. 7 Di fat o ài provade une profonde contentece e consolazion par vie dal to amôr, parcè che il cûr dai sants si è ricreât par merit to, fradi.
Une gracie par Onesim
8 Par chel, seben che o podarès comandâti cun dute libertât in Crist ce che tu âs di fâ, 9 o preferìs preâti in non dal amôr, cussì come ch’o soi jo, Pauli, vieli e in plui cumò presonîr di Crist Gjesù. 10 Ti prei duncje par gno fi, che lu ài parturît framieç des cjadenis, Onesim, 11 chel che une volte no ti à zovât nuie e che cumò mi zove a mi e a ti. 12 Tal mandi indaûr, propit lui, ven a stâi il gno cûr.
13 O varès vût gust di tignîmal cun me, par che mi servìs tal to puest cumò ch’o soi in cjadenis par colpe dal vanzeli, 14 ma no ài volût decidi cence che tu lu savessis ancje tu, par che la tô opare di ben no sedi sfuarçade ma spontanie. 15 Salacor ti è stât cjolt par pôc timp, par che tu podessis tornâlu a vê par simpri, 16 no plui come un sclâf ma come alc di plui di un sclâf, come fradi une vore cjâr a mi e, cun plui reson, a ti seont il mont e seont il Signôr.
17 Se duncje tu mi ritegnis par to amì, fâsii chel acet che tu mi fasaressis a mi in persone. 18 Se po ti ves fat cualchi dam o s’al ves alc di rifonditi, metilu sul gno cont. 19 Jo, Pauli, lu scrîf cu la mê man: o paiarai jo in persone. A ti però no ti dîs di ce che tu sês in debit cun me ancje de tô persone! 20 Propit cussì, fradi! Ch’o puedi servîmi di te tal Signôr! Ricree il gno cûr in Crist!
21 Ti scrîf parcè che o ài fiducie te tô ubidience, sigûr che tu fasarâs ancjemò di plui di ce ti domandi.
Salûts finâi
22 Preparimi di chê strade ancje un sotet, parcè che o speri, in gracie des vuestris preieris, di podê jessius tornât.
23 Ti salude Epafre, gno compagn di preson in Crist Gjesù, 24 Marc, Aristarc, Deme e Luche, miei colaboradôrs.
25 La gracie dal Signôr Gjesù Crist ch’e sedi cul vuestri spirt.