LA SAPIENCE DI DIU TE VITE DAL OM
Preambul dal tradutôr grêc
Gjosie, ultims res di Gjude, Gjeremie
49 1 Il ricuart di Gjosie
al è tant che une misture di incens
prontade cul ingegn dal espert di bonodôrs;
e je dolce, in ogni bocje, come la mîl,
e je come la musiche tun gustâ cul vin.
2 Al à volude la riforme dal popul, ch’e jere juste,
al à sdrumadis lis porcariis ch’a jerin cuintri de leç.
3 Al à vût il cûr dret cul Signôr,
cuant che e regnave l’inicuitât al à cirude la religjon.
4 Se si lasse fûr David, Ezechie e Gjosie,
a son stâts ducj triscj;
vint butade di bande la leç dal Altissim,
i res di Gjude e àn vude la fin ch’a mertavin.
5 E àn consegnât il lôr podê in mans di chei âtris,
la lôr glorie a di un popul forest,
6 che i à dât fûc a la sitât elete dal templi
e ch’al à fatis deventâ desertis lis sôs contradis,
7 seont la professie fate di Gjeremie.
Difat lu àn maltratât,
lui, profete consacrât inmò tal grim
par svinidrî, par sdrumâ e par fiscâ,
ma ancje par fâ sù e par plantâ.
Di Ezechiel a Neemie. Lis lidrîs
8 Ezechiel al à vude la vision de glorie
puartade sul cjâr dai cherubins.
9 Diu si è visât dai nemîs mandant il burlaç,
ma al à salvât chei ch’a van indenant pe strade drete.
10 Ch’a puedin i vues dai dodis profetis
butâ fûr dal lôr tombâl,
parcè che e àn confuartât Jacop,
lu àn sfrancjât cu la lôr sperance plene di fede.
11 Cemût podìno onorâ Zorobabel,
ch’al è tant che un sigjl su la man gjestre?
12 Cun lui al jere Gjosuè, fi di Jozedek;
tai lôr dîs e àn fate sù la cjase,
i àn tirât sù un templi sant al Signôr,
distinât a di une glorie cence fin.
13 Une vore grant al è il ricuart di Neemie
ch’al à tornât a fâ sù lis nestris muris sdrumadis,
ch’al à metudis lis puartis e i clostris,
ch’al à fat tornâ a vignî sù lis nestris cjasis.
14 Nissun nol è stât creât su la tiere a pâr di Enoc,
par chel al è stât fat lâ sù de tiere.
15 E nancje nol è mai nassût un om come Josef,
sorestant dai fradis e fuarce dal popul,
che parfin i siei vues e àn vût onôr.
16 Sem e Set e àn vude grande glorie framieç dai oms,
ma plui di ducj i vivents al lûs, te creazion, Adam.