LA SAPIENCE DI DIU TE VITE DAL OM
Preambul dal tradutôr grêc
Elie e Liseo
48 1 Alore al è vignût Elie, un profete come il fûc,
la sô peraule e ardeve tant che une flame.
2 Lui al à fat vignî sore di lôr la fan,
cu la sô passion ju à ridusûts di numar.
3 Cu la peraule dal Signôr al à sierât il cîl
e cussì al à fat vignî jù par tre voltis il fûc.
4 Tu às vude mo tante glorie, Elie, pai tiei meracui!
Cui puedial tignîsi in bon a pâr di te?
5 Tu às fat saltâ fûr un cadavar de muart
e di chel âtri mont, cu la peraule dal Altissim.
6 Tu às sburtâts res in te ruvine
e oms innomenâts jù dal lôr jet.
7 Tu às sintût tal Sinai la cridade
e tal Oreb il judissi di condane.
8 Tu às onzûts res pal svindic
e profetis par ch’a cjapassin il to puest.
9 Tu sês stât cjapât tun vuluç di fûc,
cuntun cjâr di cjavai infogâts.
10 Di te al è scrit ch’al vignarà il to timp,
par bonâ la rabie prin che si infoghi,
par pleâ il cûr dal pari viers dal fî
e par tornâ a meti in sest lis tribùs di Jacop.
11 Furtunâts chei che ti àn viodût
e ch’a son muarts tal amôr,
parcè che al è sigûr ch’o vivarin.
12 Cuant che Elie al è stât cuvierzût di un vuluç,
Liseo al è stât colmât dal so spirt;
tai siei dîs nol à trimât par nissun princip,
nissun nol à podût sumiergilu.
13 Nissune robe no jere grivie par lui;
ancje sot tiere il so cadavar al à profetisât.
14 In te sô vite al à fâts spiei
e dopo muart al à fatis robonis.
15 Cun dut a chel il popul no si è mendât,
no àn rinunciât ai lôr pecjâts,
fintremai che no son stâts socâts de lôr tiere
e ch’a son stâts dispierdûts in ogni gjernassie.
16 Al è stât lassât un piçul popul
e un princip te cjase di David.
Un pôs di lôr e àn fat ce che i plâs a Diu,
âtris e àn invessit moltiplicâts i lôr pecjâts.
Ezechie e Isaie
17 Ezechie al à rinfuarçade la sô sitât
e al à puartade l’aghe dentrivie,
al à sgjavât cul fiêr la crete,
al à fats poçs pa l’aghe.
18 Tai siei dîs al è vignût sù Senacherib,
che dopo al à mandât Rabsake;
al à alçade la man sore di Sion
e si è vantât te sô rogance.
19 Alore e àn trimât i lôr cûrs e lis lôr mans,
e àn vudis dois tant che lis parturienz;
20 e àn clamât il Signôr plen di boncûr
slungjant viers di lui lis lôr mans;
il Sant dal cîl ju à scoltâts dal moment,
ju à sfrancjâts midiant di Isaie.
21 Al à pestât il campament di chei di Assur,
il so agnul ju à netâts vie.
22 Parcè che Ezechie al à fat ce che i plâs al Signôr,
al è lât indenant pes stradis di so pari David,
come che i veve mostrât il profete Isaie,
grant e vêr in te sô vision.
23 Tai siei dîs il soreli al è tornât indaûr,
lui al à slungjade la vite dal re.
24 Cu la fuarce de ispirazion al à viodudis lis ultimis robis
e al à confuartât chei di Sion ch’a vaivin.
25 Al à pandût l’avignî fintremai a la fin,
lis robis platadis prime ch’a capitassin.