LA SAPIENCE DI DIU TE VITE DAL OM
Preambul dal tradutôr grêc
Gjosuè e Caleb
46 1 Gjosuè, fi di Nun, al è stât fuart in vuere
e al à cjapât il puest di Mosè te incariche profetiche.
Al è stât degn dal non ch’al puartave
come grant salvadôr dal popul elet;
lui al cjastiave i nemîs che si rivoltavin
par fâi vê a Israel la sô ereditât.
2 Cetant splendit ch’al jere cuant che al alçave lis sôs mans
par slungjâ la spade cuintri des sitâz!
3 Cui esal stât compagn di lui prime di lui?
Difat lui al à combatudis lis vueris dal Signôr.
4 No esal stât tignût fêr il soreli midiant de sô man,
par che une dì e deventas dôs?
5 Lui al à clamât l’Altissim ch’al pò dut
cuant che i nemîs lu strengevin di ogni bande;
il Signôr, il grant, lu à scoltât
cuntune tampiestade di clapons mai viodûts.
6 Si è butât sul popul nemî e tal lâ jù al à fruçâts i ribei;
par che i forescj a viodessin la fuarce des sôs armis
e si rindessin cont di combati cuintri dal Signôr;
che difât lui al marçave daûr dal Altissim.
7 Tai dîs di Mosè al à fat un at di religjon,
lui e Caleb, fi di Jefune;
si son metûts cuintri de semblee
par stratignî il popul dal pecjât,
par cjonçâ il bruntulâ fûr di puest.
8 Dome lôr doi si son salvâz
su siscentmil oms a pît;
par fâ jentrâ il popul te ereditât,
te tiere ch’al scôr lât e mîl.
9 Il Signôr i à dade à Caleb une vigorie
che i è restade fintremai ch’al jere vieli,
cuant che al à invadude la mont de regjon
par che i restas di legjtime a la sô dissendence.
10 Cussì ch’a viòdin ducj i fîs di Israel
ch’al è ben lâ daûr dal Signôr.
I judiçs, Samuel
11 Podopo a son i judiçs, ognidun cul so non,
che no àn insoçât il lôr cûr te idolatrie
e no si son slontanâts dal Signôr;
la lôr memorie ch’e sedi in benedizion!
12 I lôr vues ch’a dedin fûr de tombe
e i lôr fîs ch’a puedin fâ i lôr stes sflandôrs
che i oms a ricuàrdin in ben.
13 Benvolût dal Signôr e so profete,
Samuel al à metude in pîs la monarchie
e al à onzût princips sul popul.
14 Al à judicât la comunitât cu la leç dal Signôr
e cussì il Signôr al à judât Jacop.
15 Pe sô fedeltât al è stât ricognossût profete
e pes sôs peraulis si è palesât par un ch’al viôt just.
16 Al à clamât il Signôr ch’al pò dut
cuant che i nemîs lu strengevin toratôr,
cul sacrifici di un agnel di lat.
17 Il Signôr al à tonât dal cîl,
al à fate sintî la sô vôs cun grant sunsûr,
18 al à fiscâts i sorestants dai nemîs
e ducj i princips dai filisteos.
19 Prin di lâ a polsâ par simpri al à podût testemoneâ
denant dal Signôr e dal so onzût:
“No i ài cjolt nuje a dinissun,
nancje un pâr di sandui”.
E nissun nol à podût incolpâlu.
20 Dopo che si jere indurmidît vie al à profetisât ancjemò
e i à mostrade al re la sô fin;
ancje de tiere al à alçade la sô vôs
par parâ jù cu la professie la tristerie dal popul.