SENTENCIS CUINTRI DI ISRAEL
Promessis di rEstaurazion
Salvece pes monts di Israel
35 1 Mi rivà la peraule dal Signôr: 2 “Fi dal om, volte la muse de bande de mont di Seir e profete cuintri di jê. 3 Dîsii: Il Signôr, gno Diu, al dîs cussì:
Ve chi ch’o soi cuintri di te, mont di Seir;
o slungjarai cuintri di te il gno braç
e ti fasarai deventâ une desolazion e un desert.
4 O fasarai des tôs citâts un grum di maseriis,
tu sarâs une desolazion
e tu ricognossarâs che jo o soi il Signôr.
5 Parcè che tu âs clocide un’asse eterne e tu âs butâts i fîs di Israel intor de spade intant dal fruç, cuant che la colpe e rivà al colm. 6 Pa la cuâl, pe mê vite – sentence dal Signôr, gno Diu – ti met di bande pal sanc e il sanc ti perseguitarà. Po sigûr: tu ti sês pastrocjade di sanc e il sanc ti perseguitarà. 7 O fasarai deventâ la mont di Seir une desolazion e un desert e o cjonçarai vie chel ch’al va e chel ch’al ven. 8 O jemplarai lis tôs monts di ferîts; sui tiei çucs, tes tôs concjis e in dutis lis tôs valadis a colaran i ferîts cu la spade. 9 Ti fasarai deventâ une desolazion eterne e tes tôs citâts nol larà a stâ plui nissun. Cussì o ricognossarês che jo o soi il Signôr. 10 Za che tu âs dit: Lis tôs gjernaziis e lis tôs tieris a son mês – ju àn cjapâts in ereditât seben che li al veve stât il Signôr – 11 poben, pe mê vite – sentence dal Signôr, gno Diu – ti tratarai cu la rabie e cu la invidie che tu âs palesade inte tô asse cuintri di lôr. O sarai ricognossût di lôr dal mût che ti judicarai 12 e tu ricognossarâs che jo, il Signôr, o ài sintudis dutis lis tôs ofesis; di fat tu âs dit cuintri des monts di Israel: A son desoladis, nus es dan a nô par che lis mangjìn. 13 Si sês sglonfâts cuintri di me, cu la vuestre bocje mi vês subissât di peraulis. O ài sintût, propit! 14 Il Signôr, gno Diu, al dîs cussì: O fasarai di te une desolazion, cun grande gjonde di dute la tiere. 15 Za che tu âs gjoldût pe ereditât de cjase di Israel, parcè che e je desolade, cussì ti tratarai te: tu deventarâs une desolazion, tu, mont di Seir, e dut Edom e ancje lôr a ricognossaran che jo o soi il Signôr”.