SENTENCIS CUINTRI DI ISRAEL
Lamentazions di Tîr
27 1 Mi rivà la peraule dal Signôr: 2 “Fi dal om, dà sù un lament par Tîr. 3 Dîsii a Tîr: Tu che tu paronis biel jentrant dal mâr, che tu trafichis cui popui e cun tantis isulis:
Il Signôr, gno Diu, al dîs cussì:
Tîr, che ti disevin nâf di une bielece uniche.
4 I tiei confins a son tal cûr dal mâr,
chei che ti àn fate
ti àn fate di une bielece uniche.
5 Di ciprès di Senir
a àn fatis dutis lis tôs çatis,
a àn cjolt cedri dal Liban
par fâti l’arbul mestri.
6 Cui rôi di Basan
a àn fats i tiei rems,
il sotet tal àn fat d’avori,
la gabine cul peç des isulis dai chitims.
7 Di fîl colorât dal Egjit
e jere la tô vele, ch’e jere une bandiere,
di purpure viole e scarlate
des isulis di Elisà
e jere la tô tende.
8 I rês di Sidon e di Arvad
a remavin par te,
i tiei savis, Tîr, a jerin li di te, a jerin i tiei pilotis.
9 I anzians di Gebal e i siei savis
a jerin li di te par comedâ lis tôs busis.
Dutis lis nâfs dal mâr e i lôr marinârs
a jerin li di te par sgambiâ lis tôs marcanziis.
10 Faras, Lud e Put a jerin tes tôs schiriis,
i tiei vuerîrs;
scût e elmet ju picjavin li di te;
a jerin la tô braure.
11 I fîs di Arvad a jerin ancje la tô schirie,
su lis tôs muris dulintor
e su lis tôs toressis a jerin i gamadim.
A picjavin i lôr scûts torator des tôs muris
e a rifinivin tune maniere uniche la tô bielece.
12 Tarsis al traficave cun te parcè che tu vevis di dut e sore dal arint, dal aur, dal stagn e dal plomp a puartavin ator i tiei prodots. 13 Javan, Tubal e Mesec a traficavin cun te; sore dai sclâfs e de robe di bronç a puartavin ator la tô marcanzie. 14 Chei di Bet-Togarmà, sore dai cjavai e dai cjavalîrs e dai mui, a puartavin ator i tiei prodots. 15 Ancje chei di Rodi a traficavin cun te, un slac di isulis a traficavin cun te, ti paiavin cun cuars di avori e cun ebin. 16 Aram al traficave cun te parcè che tu vevis di dut; sore des pieris preziosis, de purpure scarlate e colorade, dal fîl e dal corai ros e dai rubins a puartavin ator i tiei prodots. 17 Gjude e Israel a traficavin cun te. Sore dal forment di Minit, dai bonodôrs, de mîl, dal vueli e dal balsim a puartavin ator la tô marcanzie. 18 Damasc al traficave cun te parcè che tu vevis ogni sorte di voris, parcè che tu vevis di dut; pal vin di Chelbon e pe lane di Zacar 19 e pal vin di Uzal a puartavin ator i tiei prodots; a sgambiavin cu la tô marcanzie fier lavorât e cassie e canele. 20 Dedan al traficave cun te in cùssinis pai cjavai. 21 L’Arabie e ducj i princips di Kedar a traficavin cun te; a traficavin cun te in agnei, in rocs e in becs. 22 I marcjadants di Sabe e di Raemà a traficavin cun te; pes primiziis dal balsim e par ogni sorte di pieris preziosis e di aur a puartavin ator i tiei prodots.
23 Caran, Canè, Eden, i marcjadants di Sabe, Assur e Kilmad a traficavin cun te. 24 A traficavin cun te munturis di prime, mantelinis di purpure e pieçamente colorade, tapêts colorâts, cuardis inturtiçadis e fuartis. In dut chest a traficavin cun te. 25 Lis nâfs di Tarsis a jerin sot di te, pe tô marcanzie.
Tu ti sês jemplade e slargjade un disordin
tal cûr dal mâr;
26 ti àn fate navigâ tes grandis aghis
i tiei navigants.
L’aiar de jevade ti à fruçade
tal cûr dal mâr.
27 Lis tôs ricjecis e la tô robe,
la tô marcanzie, i tiei navigants e i tiei pilotis,
chei ch’a comedavin lis tôs busis
e chei ch’a traficavin la tô marcanzie
e ducj i tiei soldâts ch’a son li di te
e dute la sdrume di int ch’e je dentri di te
a colin tal font dal mâr
te dì de tô ruvine.
28 Sintint i berlis dai tiei navigants
a stan sbalsant di pôre lis localitâts confinants,
29 a dismontin des lôr nâfs
ducj chei ch’a àn in man il rem,
i navigants, ducj i pilotis dal mâr
si fermin a tiere
30 e a fasin sintî i lôr berlis sore di te;
a berlin plens di marum,
si butin il pulvin sul cjâf,
si vultulinin te cinise.
31 Si rochin i cjavei par te,
si vistissin di sac,
a cracin par te, cu l’anime mareose.
Un vaî mareôs!
32 Tal lôr gemi a dan sù par te un lament,
a fasin un lament sore di te:
Cui jerial compagn di Tîr,
une fuartece tal mieç dal mâr?
33 Discjamant dal mâr i tiei prodots,
tu âs saceâts une vore di popui,
cun dute la tobe che tu vevis e cu la tô marcanzie
tu âs fats plui contents i rês de tiere.
34 E cumò tu sês fiscade dal mâr,
tai abìs dal mâr,
la tô marcanzie
e dute la sdrume di int che tu vevis
e je lade sot.
35 I rês di dutis lis isulis
a son restâts scaturîts sul to cont,
ai lôr rês si ur son dreçâts i cjavei,
la lôr muse e je disperade.
36 I marcjadants dai forescj ti àn sivilade:
tu sês deventade un spavent
e no tu esistarâs par mai”.