SENTENCIS CUINTRI DAI POPUI
Cuintri di Amon, di Moab, di Edom e dai filisteus
25 1 Mi rivà la peraule dal Signôr: 2 “Fi dal om, volte la tô muse de bande dai amonits e profete cuintri di lôr. 3 Dîsiur: Amonits, scoltait la peraule dal Signôr, gno Diu! Za che tu âs berlât: Vive!, al gno santuari cuant che lu àn profanât e a la tiere di Israel cuant che le àn fiscade e a la cjase di Gjude cuant che e je lade in esili, 4 poben:
Ve jo ti consegni in ereditât ai fîs de jevade.
A plaçaran li di te i lôr campaments,
li di te a plantaran lis lôr tendis;
a mangjaran i tiei prodots,
a bevaran il to lat.
5 O fasarai deventâ Rabe un stalaç di camêi
e i amonits une lobie pes bestiis.
Cussì o ricognossarês che jo o soi il Signôr”.
6 Propit! Il Signôr, gno Diu, al dîs cussì:
“Za che tu âs batudis lis mans
e pestâts i pîts
e che tu âs gjoldût tal to cûr
cuntune contentece orende cuintri de tiere di Israel,
7 poben ve:
o slungji il gno braç cuintri di te
e ti lassi rafâ dai forescj,
ti svinidrissarai dai popui,
ti pararai jù de tiere,
ti fruçarai.
E tu ricognossarâs che jo o soi il Signôr!
8 Il Signôr, gno Diu, al dîs cussì:
“Za che Moab e Seir a àn dit:
Ve, Gjude al è compagn di chei altris forescj,
9 poben jo o sbreghi la schene grumbulose di Moab,
ridusintlu cence citâts, cence lis sôs citâts,
scomençant dai siei confins,
de tiere splendide di Bet-Jesimot,
di Baal-Meon fint a Kiriataim.
10 Ur e darai in ereditât ai fîs de jevade,
in soreplui dai amonits,
e cussì no si le varà plui indiment framieç dai forescj.
11 O fasarai sentence cuintri di Moab
e a ricognossaran che jo o soi il Signôr”.
12 Il Signôr, gno Diu, al dîs cussì: “Za che Edom al è stât svindicatîf cu la cjase di Gjude, si è metût in colpe svindicantsi di jê, 13 poben il Signôr, gno Diu, al dîs cussì:
O slungji il gno braç cuintri di Edom
e o cjonçarai vie oms e nemâi
e o fasarai un fisc di Teman a Dedan;
a colaran di spade.
14 O fasarai il gno svindic sore di Edom
midiant dal gno popul, Israel.
Lôr a trataran Edom seont la mê rabie e la mê fumate.
A ricognossaran il gno svindic”.
Sentence dal Signôr, gno Diu.
15 Il Signôr, gno Diu, al dîs cussì:
“Za che i filisteus si son svindicâts cuntune contentece orende pal svinidriment, pocâts di une asse eterne, 16 poben il Signôr, gno Diu, al dîs cussì:
Ve: jo o slungji il gno braç cuintri dai filisteus,
o cjonçarai vie i cretês
e o pararai jù ce ch’al reste dal oramâr.
17 O fasarai cuintri di lôr un grant svindic,
cjastiantju di inrabiât.
A ricognossaran che jo o soi il Signôr
cuant che mi svindicarai sore di lôr”.