LIBERAZION DAL EGJIT
ISRAEL IN EGJIT
Scalvitût dai ebreus
L’arcje
37 1 Bezaleel al fasè l’arcje di len di agace. E jere lungje doi comedons e mieç, largje un comedon e mieç e alte un comedon e mieç. 2 Le riviestì di aur rût par dentri e par difûr e al fasè torator une curnîs d’aur. 3 Al fondè, pe arcje, cuatri anei d’aur, tai cuatri pecoi: doi anei di une bande e doi di chê altre. 4 Al fasè stangjis lungjis di len di agace e lis riviestì d’aur. 5 Po al metè dentri lis stangjis tai anei plaçâts di ca e di là de arcje par puartâle.
6 Al fasè un propiziatori di aur rût, lunc doi comedons e mieç e larc un comedon e mieç. 7 Al fasè doi cherubins di aur ribatût e ju metè insomp e dapît dal propiziatori: 8 un cherubin ta cheste estremitât e un cherubin ta chê altre; al fasè fâ bloc ai cherubins cul propiziatori insomp e dapît. 9 I cherubins a vevin lis alis spalancadis par in sù e cu lis lôr alis a protegevin il propiziatori, muse cun muse; lis musis dai cherubins a jerin voltadis de bande dal propiziatori.
La taule cui pans de ufierte
10 Al fasè la taule di len di agace; e jere lungje doi comedons largje un e alte un e mieç. 11 Le riviestì di plachis d’aur e i fasè un ôr di aur torator. 12 Al fasè, torator, une curnîs largje une cuarte e al fasè un ôr di aur torator de curnîs. 13 Al fondè, pe vore, cuatri anei di aur e al metè i anei tai cuatri cjantons dai cuatri pecoi. 14 I anei a jerin metûts dongje de curnîs e a jerin par meti dentri lis stangjis che a coventavin par puartâ la taule. 15 Al fasè lis stangjis di len di agace e lis riviestì d’aur. 16 Al fasè ancje ducj i imprescj che a coventavin su la taule: i plaçs, i bocâi, lis anfuris e lis tacis pe libagjon, dut in aur rût.
Il cjandelîr
17 Al fasè il cjandelîr di aur rût. Al fasè di aur ribatût il cjandelîr, il çocul e il mani. I siei cjaliçs, bocui e flôrs, a jerin dut un bloc cun lui. 18 Di ca e di là a partivin sîs braçs: trê braçs dal cjandelîr di une bande e trê braçs dal cjandelîr di chê altre. 19 Il prin braç al veve trê cjaliçs a forme di flôrs di mandolâr, cun bocul e flôr. Il secont braç al veve trê cjaliçs a forme di flôr di mandolâr, cun bocul e flôr. Compagn ducj i sîs braçs che a partivin dal cjandelîr. 20 Ancje il cjandelîr al veve cuatri cjaliçs a forme di flôr di mandolâr, cun bocul e flôr: 21 un bocul sot dai doi prins braçs che a partivin dal cjandelîr, un bocul sot dai doi seconts braçs che a vignivin daspò e un bocul sot dai ultins braçs: sichè in dut a partivin sîs braçs. 22 I bocui e i braçs a fasevin bloc cul cjandelîr e dut al jere fat di un bloc di aur rût ribatût. 23 Po al fasè lis siet lampadis, cui lôr smocjadôrs e i lôr platei di aur rût. 24 Par fâ il cjandelîr cun ducj i siei furniments i lè un talent di aur rût.
L’altâr dai bonodôrs. Vueli de unzion e bonodôrs
25 Al fasè l’altâr dai bonodôrs di len di agace, lunc cinc comedons, larc cinc, ven a stâi cuadrât, e alt trê; i siei cuars a fasevin bloc cun lui.
26 Lu riviestì di plachis di aur rût, la part parsore, lis parêts torator e i cuars, e al fasè une curnîs d’aur torator. 27 I metè doi anei d’aur sot de curnîs, di ca e di là, des dôs bandis, par podê sistemâ lis stangjis che a vevin di puartâlu. 28 Al fasè lis stangjis di len di agace e lis riviestì di aur.
29 Al fasè ancje il vueli de sacre unzion e l’incens profumât, precîs di chei che a fasin profums di mistîr.