LIBERAZION DAL EGJIT
ISRAEL IN EGJIT
I lavorents dal santuari
31 1 Il Signôr i fevelà a Mosè cussì: 2 “Viôt mo: o ài sielzût personalmentri Bezaleel, fi di Uri, fi di Cur, de tribù di Gjude. 3 Lu ài jemplât dal spirt di Diu par cont di mistîr, di cjâf e di pratiche in ogni sorte di voris; 4 par improntâ un progjet e metilu in vore, sedi in aur, sedi in arint o in bronç; 5 par picâ lis pieris di incjastrâlis; par lavorâ il len e par fâ ce cu sedi lavôr. 6 I met par dongje Ooliab, fi di Achisamac, de tribù di Dan, e ur ài zontât altri sintiment tal cûr di ducj i oms che a valevin, par che a rivin adore di fâ dut ce che ur ài ordenât di fâ: 7 la tende de cunvigne, l’arcje dal pat, il propiziatori che al è parsore cun ducj i siei furniments e dut il furniment de tende; 8 la taule e dut il so furniment, il cjandelîr pûr e dut il so compagnament, l’altâr dai bonodôrs, 9 l’altâr dai olocauscj cun ducj i siei furniments, la concje e il çocul; 10 i paraments, la munture benedide dal predi Aron, i vistîts pai siei fîs, par che a puedin funzionâ; 11 il vueli de unzion e l’incens profumât pal santuari. Par ogni vore, a fasaran ce che ti ài ordenât”.
La polse de sabide
12 Il Signôr i fevelà a Mosè cussì: 13 “Dîsiur chest ai fîs di Israel: O rispietarês come cu va lis mês sabidis, parcè che al è un segnâl fra me e vualtris par dutis lis gjenerazions, par che si sepi che jo o soi il Signôr, chel che us fâs sants. 14 O rispietarês la sabide, ch’e je une zornade sante par vualtris. Chel che no le rispietarà al sarà copât; chel che al fasarà in chê dì cualchi vore al sarà taiât fûr dal so popul. 15 Par sîs dîs si fasaran dutis lis voris, ma la setime dì e sarà une dì di polse complete, consacrade al Signôr. Chel che al lavorarà di sabide al sarà copât. 16 I fîs di Israel a rispietaran la sabide e le rispietaran di gjenerazion in gjenerazion: al è un pat par simpri. 17 Al è un segnâl fra me e i fîs di Israel che al durarà par simpri, parcè che in sîs dîs il Signôr al à fat i cîi e la tiere, ma la setime dì al à polsât e tirât il flât”.
18 Finît di fevelâ cun Mosè su la mont dal Sinai, i consegnà lis dôs lastris de leç, lastris di piere scritis cul dêt di Diu.