LIBERAZION DAL EGJIT
ISRAEL IN EGJIT
Cjant di vitorie
15 1 Alore Mosè e i fîs di Israel a derin sù chest cjant in onôr dal Signôr:
“O cjanti pal Signôr
che si è cuviert di glorie,
che al à strucjât
cjaval e cjavalîr tal mâr.
2 Il Signôr al è la mê fuarce e il gno cjant;
se le ài puartade fûr al è merit so.
Al è lui il gno Diu e jo lu cjanti;
il Diu di gno pari,
e jo o dîs ben di lui.
3 Il Signôr al è potent in vuere;
il so non al è Signôr!
4 I cjars dal faraon e dutis lis sôs schiriis
lui ju à strucjâts tal mâr;
la sbrume dai siei uficiâi
il mâr le à glotude.
5 Il gorc ju à tirâts sot,
a son lâts jù tal font dal abìs tant che un clapon.
6 La tô gjestre, Signôr,
e à fat robonis cu la sô fuarce,
la tô gjestre, Signôr,
e fâs a tocs il nemì.
7 Cuant che tu vûs fâ viodi trop grant che tu sês,
tu strucjis i tiei nemîs,
tu discjadenis la tô rabie
e tu ju paris jù come il stranc.
8 Cuant che tu soflis cu lis tôs narilis,
lis aghis si ingrumin di fâ pôre,
lis ondis a petin sù
come une murae,
i mulignei si dan dongje
tal mieç dal mâr.
9 Il nemì al veve dit:
Ur corarai daûr, ju brincarai,
o dividarai dut ce che o rasparai,
mi passarai avuâl dal cuel,
o sfodrarai la mê spade
e ju scjafoiarai cu lis mês mans!
10 Tu âs dade une soflade
e il mâr ju à tirâts sot,
a son lâts sot come il plomp
e lis aghis ju àn disfats.
11 Di ducj i dius, là si cjatial un compagn di te, Signôr?
Là esal un come te,
grant par santitât,
trement cuant che si met, bon di fâ spiei?
12 Tu âs slungjade la tô gjestre
e la tiere ju à glotûts.
13 Al è stât il to boncûr a indreçâ
chest popul che tu âs sfrancjât,
la tô fuarce lu à menât
te tô sante cjase.
14 I popui a àn sintût, si voltin di sanc,
chei de Filistee a stan mâl di murî.
15 I sorestants di Edom a pierdin il cjâf cul spac,
ai princips di Moab la pôre ur cjonce lis gjambis,
ducj chei di Canaan a restin.
16 Il terôr e la pôre
ur plombe intor;
la fuarce dal to braç
ju lasse di clap,
fin che nol passe il to popul, Signôr,
fin che nol passe chest popul
che tu tu âs cuistât.
17 Tu ju menarâs tu e tu ju sistemarâs
su la mont de tô ereditât,
tal lûc che tu, Signôr, tu sês a stâ,
tal santuari, Signôr,
che a àn preparât lis tôs mans.
18 Il Signôr al regnarà
par simpri e in eterni”.
19 E di fat, la cjavalarie dal faraon cui siei cjars e i siei cjavalîrs no jere dibot nancje jentrade tal mâr, che il Signôr al veve fat tornâ indaûr lis aghis dal mâr parsore di lôr, a la cuâl che i israelits a jerin lâts indenant tal mieç dal mâr cence nancje bagnâsi i pîts. 20 Miriam, la profetesse, sûr di Aron, e cjapà in man un tamburel e dutis lis feminis, i lerin daûrij cui tamburei, cjantant e balant. 21 E Miriam e dè sù par lôr:
“Cjantait pal Signôr
si è vuluçât di glorie:
al à strucjât tal mâr
cjaval e cjavalîr”.
LA MARCE PAL DESERT
Mare
22 Mosè al dè a Israel l’ordin di partî dal mâr des Cjanussis. Si inviarin de bande dal desert di Sur e a cjaminarin trê dîs tal desert cence cjatâ une gote di aghe. 23 Ma cuant che a rivarin a Mare, no poderin bevi l’aghe di Mare parcè che e jere masse mare; par chel i meterin non al lûc Mare. 24 Il popul se cjapà cun Mosè e i diserin: “E cumò ce bevìno?”. 25 Mosè al berlà viers Diu e Diu i mostrà un toc di len. Mosè lu butà ta l’aghe e l’aghe si indolcì. Al è li che ur à dât un statût e un dirit, al è li che ju à metûts a lis provis. 26 Po al disè: “Se tu scoltis la vôs dal Signôr to Diu e tu fasis ce che al va ben par lui, se tu starâs atent ai siei comandaments e tu metarâs in vore ducj i siei ordins, ducj i mâi che ur ài mandât al Egjit a ti no tai mandarai, parcè che jo o soi il Signôr, chel che ti vuarìs”. 27 A rivarin a Elim, là che a son dodis risultivis e setante palmis e li si camparin torator da l’aghe.