LIBERAZION DAL EGJIT
ISRAEL IN EGJIT
Viers il mâr
14 1 Il Signôr i fevelà a Mosè cussì: 2 “Dîsiur ai fîs di Israel di tornâ indaûr e di campâsi denant di Pi-Achirot, jenfri Migdol e il mâr, in face di Baal-Zefon; si camparês rimpet di li, ad ôr dal mâr. 3 Il faraon al disarà dai israelits: Veju là, che a van indenant a sorte e che il desert ju taiarà fûr! 4 Jo o indurirai il cûr dal faraon e no i pararà vere di corius daûr. Jo mi ingloriarai a spesis dal faraon e di dut il so esercit, e i egjizians a savaran che jo o soi il Signôr”.
5 A pene che i contarin al re dal Egjit che il popul al jere scjampât, il cûr dal faraon e dai siei fameis al gambià di cussì a cussì a rivuart dal popul. A diserin: “Ce vino fat mo a lassâ che Israel si sfrancjàs de nestre paronance!”.
6 Il faraon al fasè preparâ il so cjar e al tirà dongje dutis lis sôs schiriis. 7 Al cjolè cun sè siscent dai miôrs cjars e ducj i cjars dal Egjit, ognidun cuntun graduât parsore. 8 Il Signôr al indurì il cûr dal faraon, re dal Egjit, che si metè a coriur daûr ai israelits. Ma i fîs di Israel a saltarin fûr cun man fuarte. 9 I egjizians si butarin daûrjur e ju brincarin cuant che a jerin campâts sul ôr dal mâr: ducj i cjavai dal faraon, i siei cjars, i siei cjavalîrs e lis sôs schiriis si cjatarin dongje di Pi-Achirot, in face di Baal-Zefon.
10 Viodût che il faraon al rivave, i israelits e alçarin i vôi e a vioderin che i egjizians ur corevin daûr. I israelits a cjaparin un spac e a berlarin viers dal Signôr. 11 I diserin a Mosè: “No ’nd jerino tombâi ventijù pal Egjit, che tu nus âs menâts a murî tal desert? Parcè nus âstu fats saltâ fûr dal Egjit? 12 Tal vevin pursì dit ancjemò in Egjit: Lassinus restâ sot dai egjizians, che o vin miôr stâ sot dai egjizians che no murî tal desert?”. 13 Dissal Mosè a la int: “No stait a vê pôre! Tignît dûr e o viodarês ce che al sarà bon di fâ cumò il Signôr par salvânus, parcè che i egjizians che o viodês vuê no ju viodarês altri. 14 Il Signôr si metarà de vuestre bande; vualtris o vês dome di stâ cuiets”.
A passin il mâr
15 Il Signôr i disè a Mosè: “Parcè berlistu viers di me? Dîsiur ai israelits di lâ indenant. 16 Alce il to baston, slungje la man sul mâr e dividilu, par che i israelits a puedin jentrâ tal mieç dal mâr cence bagnâsi i pîts. 17 Jo o indurissarai il cûr dai egjizians; lôr us coraran daûr e jo mi cjamarai di glorie a spesis dal faraon, di dutis lis sôs schiriis, dai siei cjars e dai siei cjavalîrs. 18 I egjizians a palparan che jo o soi il Signôr cuant che jo mi sarai jemplât di glorie a spesis dal faraon, dai siei cjars e dai siei cjavalîrs”.
19 L’agnul dal Signôr, che al cjaminave denant dal campament di Israel, si displaçà di li e si metè par daûr di lôr e la colone dal nûl, ch’e jere par denant, si plaçà par daûr, 20 e si metè fra i egjizians e il campament di Israel. Il nûl al jere scûr penç e la gnot e passà cence che un al podès lâ dongje di chel altri par dute la gnot.
21 Mosè al alçà la man sul mâr e il Signôr al fasè cessâ il mâr dute la gnot midiant di un grant aiaron de jevade; lu suià e dutis lis aghis si dividerin. 22 I fîs di Israel a jentrarin tal mieç dal mâr a pît sut e lis aghis ur fasevin di murae a drete e a çampe. 23 I egjizians ur corerin daûr e ducj i cjavai dal faraon, i siei cjars e i siei cjavalîrs a jentrarin tal mieç dal mâr par coriur daûr.
24 Te vilie di buinore, il Signôr, stant te colone di fûc e di nûl, al cjalà jù tal campament dai egjizians e ur fasè pierdi il cjâf. 25 Al ingredeà lis ruedis dai cjars, che a levin indevant a sun di vitis. A diserin i egjizians: “Scjampìn denant di Israel, parcè che il Signôr al combat de lôr bande cuintri dai egjizians!”.
26 Dissal il Signôr a Mosè: “Slungje la tô man sul mâr: che lis aghis a glotin i egjizians, i lôr cjars e i lôr cjavalîrs”.
27 Mosè al slungjà la man sul mâr e, sul crichedì, il mâr al tornà te sô place. I egjizians, che a scjampavin, a lerin juste a petâi intor e il Signôr al savoltà i egjizians tal mieç dal mâr. 28 Lis aghis a tornarin e a gloterin ducj i cjars e i cjavalîrs de armade dal faraon, che a jerin jentrâts tal mâr par coriur daûr. No ’nt restà un di numar. 29 I israelits, invezit, a lerin indenant a pît sut tal mieç dal mâr e lis aghis ur fasevin di murae a drete e a çampe. 30 In chê dì il Signôr al gjavà Israel des sgrifis dai egjizians e Israel al viodè i egjizians muarts su la rive dal mâr. 31 Israel al viodè che il Signôr al jere stât di peraule cuintri dai egjizians. Il popul al cjapà pôre dal Signôr, al crodè tal Signôr e in Mosè so famei.