Preambul
6 1 Par chel, lassant di bande l’insegnament elementâr sun Crist, passìn a ce ch’al è plui complet, cence tornâ a butâ lis fondis de rinuncie a lis oparis muartis e de fede in Diu, 2 de dutrine dai batisims, dal meti lis mans sul cjâf, de resurezion dai muarts e dal judizi eterni. 3 O fasarìn cussì, se Diu vûl.
4 Chei che di fat a àn viodude une volte la lûs, ch’a àn cerçât il regâl dal cîl, a son za a part dal Spirtu Sant 5 e a àn gjoldude la buine peraule di Diu e i spetacui dal mont a vignî. 6 Se però a son colâts, no si pò tornâju a fâ gnûfs une seconde volte puartantju a la conversion, dal moment che, par chel che ju rivuarde, a tornin a meti in crôs il Fi di Diu e lu sblefin denant di ducj. 7 Di fat une tiere imbombade de ploe ch’e ven jù dispès parsore di jê, s’e bute jerbe buine par chei che le lavorin, e à la benedizion di Diu; 8 se invezit e bute spinis e baraçs, no vâl nuie e e je prossime a la maludizion: tal ultin e sarà arsinide dal fûc.
9 Par chel che us rivuarde, miei cjârs, ancje s’o fevelìn cussì o sin sigûrs che vualtris o sês tune cundizion plui buine e plui vicine a la salvece. 10 Parcè che Diu nol è tant injust di dismenteâ ce ch’o vês fat e l’amôr ch’o vês palesât pal so non cul jutori ch’o vês dât e ch’o dais orepresint ai sants. 11 Dome ch’o vin voe che ognidun di vualtris al palesi la stesse passion par che la sô sperance e rivi al so colm fint insom 12 e par che no deventais pegris ma che invezit o ledis daûr di chei che, midiant di une fede che no clope, a son fats erêts des promessis.
13 Di fat cuant che Diu i à fate la promesse a Abram, no podint zurâ par un plui grant di sè, al à zurât par se stes, 14 disint: Ti benedissarai e ti fasarai deventâ une vore grant. 15 Cussì, tignint dûr Abram al à vude la colme de promesse. 16 I oms di fat a zurin par cualchidun plui grant di lôr e la garanzie dal zurament e siere ogni cuistion fra di lôr. 17 Par chel Diu, volint mostrâur plui a clâr ai erêts de promesse che nol sarès tornât indaûr de sô decision, al à fat un zurament 18 par che, cun doi ats che no si pò tornâ indaûr e là che Diu nol pò mancjâ di peraule, nô ch’o vin cirût ripâr in lui o vessin un bon sburt a grampâsi cun fuarce tor de sperance che nus è stade esibide. 19 O vin parie come un’ancure te nestre vite, sigure e che no mole, ch’e va in dentri fintremai di là dal vêl dal santuari, 20 là che Gjesù al è jentrât prin di nô e par nô, sint deventât prin predi par simpri sul stamp di Melchisedek.