Preambul
4 1 O vin duncje di vê pôre che, biel ch’e vâl ancjemò la promesse di jentrâ te sô pâs, cualchidun di vualtris nol sedi condanât a stâ fûr. 2 Parcè che ancje a nô, al impâr di lôr, nus è stade contade une buine gnove: a lôr, magari cussì no, la peraule ch’a àn scoltade no ur à zovât nuie, par vie che no son restâts unîts te fede cun chei ch’a vevin scoltât. 3 Di fat nô, ch’o vin crodût, o podìn jentrâ ta chê polse, come ch’al à dit:
Par chel, te mê rabie, o ài zurât:
No jentraran gran te mê polse.
E chest seben che lis sôs voris a jerin stadis finidis ancjemò di cuant ch’al veve fat il mont. 4 Di fat si dîs indalgò a rivuart de setime zornade: E Diu al polsà te setime zornade di dutis lis sôs voris. 5 E ancje, in chest toc: No jentraran gran te mê polse. 6 Stant duncje che cualchidun al à ancjemò di jentrâ ta chê polse e che chei che par prins a àn vude la buine gnove no jentraran par colpe de lôr disubidience, 7 lui al distine di gnûf une zornade, vuê , disint un grum di timp dopo, in David:
Vuê, s’o scoltais la mê vôs,
no stait a indurî i vuestris cûrs.
8 Se Gjosuè ju ves fats jentrâ ta chê polse, Diu nol varès fevelât, plui in ca, di un’altre zornade. 9 Pal popul di Diu e je riservade duncje ancjemò une polse, chê de setime zornade. 10 Parcè che chel ch’al è jentrât te sô polse, ancje lui al polse des sôs voris, come Diu des sôs.
11 Spesseìn duncje a jentrâ ta chê polse, par che nissun nol coli te stesse disubidience.
La peraule di Diu
12 Di fat la peraule di Diu e je vive, fuarte, e e çoncje plui di ogni spade a dopli tai; e va in dentri fintremai là che si zontin la vite e il spirt, lis comissuris e la medole, e e scrutine lis ideis e i pinsîrs dal cûr. 13 No ’nd è creature ch’e puedi platâsi denant di lui, ma dut al è crot e distaponât pai siei vôi e a lui o vin di rindii cont.
Esortazion a jessi fedêi e a fidâsi
14 Stant duncje ch’o vin un prin predi ch’al à travanât i cîi, Gjesù, Fi di Diu, tignìn salde la nestre fede. 15 Di fat no vin un prin predi che nol sedi bon di vê dûl des nestris pecjis, sint stât provât ancje lui in dut come nô, fûr che tal pecjât. 16 Svicinìnsi duncje cun plene fiducie a la sente de gracie, par vê la remission, par cjatâ gracie e par jessi judâts tal moment just.