La fedeltât di Gjesù e la sô superioritât su Mosè
3 1 Par chel, fradis sants, vualtris ch’o cjapais part di une clamade dal cîl, cjalait ben Gjesù, l’apuestul e il grant predi de fede ch’o predicjìn; 2 lui al è fedêl a di chel che lu à metût, come ch’al è stât Mosè in dute la sô cjase . 3 Ma al à mertade une glorie plui grande di chê di Mosè, come che la glorie di chel ch’al fâs sù une cjase e je plui grande de cjase stesse. 4 Ogni cjase, in efiets, e je fate sù di cualchidun, e chel ch’al à fat dut al è Diu. 5 Mosè al è stât fedêl in dute la sô cjase sicu servidôr , par fâ di testemoni di ce ch’al veve di jessi contât plui indenant; 6 Crist invezit al è stât sicu fi, a cjâf de sô cjase. E la cjase o sin nô, s’o tignìn cont de libertât e de sperance che si vantìn di vê.
Esortazion a jessi fedêi a Crist
7 Par chel come ch’al dîs il Spirtu Sant:
Vuê s’o scoltais la sô vôs
8 no stait a indurî i vuestris cûrs come te dì che si sês ribelâts,
la dì de tentazion tal desert,
9 là che i vuestris vons mi àn tentât metintmi a lis provis,
seben ch’a vevin viodût par corant’agns lis mês voris.
10 Par chel le ài vude fisse cun chê gjernazie
e o ài dit: A àn mo simpri il cûr fûr di strade;
no àn cognossudis lis mês stradis.
11 Alore, te mê rabie, o ài zurât:
No jentraran gran te mê polse.
12 Fradis, stait duncje atents che nissun di vualtris no si cjati un cûr cussì trist e cence fede che si slontani dal Diu vîf. 13 Fasêtsi fuarce invezit un cul altri ogni dì, fintremai ch’al dure chest vuê , par che nissun di vualtris no s’indurissi imbroiât dal pecjât. 14 Parcè che o sin deventâts part di Diu, a pat ch’o tignìn salde fin tal ultin la fiducie ch’o vin vude tal imprin. 15 Cuant che duncje si dîs:
Vuê, s’o scoltais la sô vôs
no stait a indurî i vuestris cûrs come te dì che si sês ribelâts,
16 cui sono stâts chei che, dopo di vê scoltade la sô vôs, si son ribelâts? No sono stâts ducj chei ch’a jerin saltâts fûr dal Egjit menâts di Mosè? 17 E cuâi sono stâts chei che le à vude fisse cun lôr par corant’agns? No sono stâts chei ch’a vevin pecjât e che dopo a jerin colâts muarts tal desert? 18 E a di cui àial zurât che no saressin jentrâts te sô polse , se no a di chei che no vevin crodût? 19 Di fat o viodìn che no àn podût jentrâ par vie che no vevin fede.