Ultimis racomandazions
13 1 Continuait tal volêsi un ben di fradis. 2 No stait a dismenteâsi di viergiur la puarte a ducj; fasint cussì, cualchidun al à lozât, cence savêlu, i agnui. 3 Visaitsi di chei ch’a son in preson come s’o fossis lôr compagns di preson, e di chei ch’a patissin, stant che ancje vualtris o sês tun cuarp distinât a murî. 4 Il matrimoni ch’al sedi rispietât di ducj e il jet nuviçâl ch’al sedi cence magle. Chei ch’a fasin porcariis o adulteri a saran judicâts di Diu.
5 Tignît lontane de vuestre vite l’avarizie; contentaitsi di chel ch’o vês, parcè che Diu al à sigurât: No ti lassarai e no ti bandonarai gran. 6 Cussì o podìn dî cun fiducie:
Il Signôr al è il gno jutori, no varai nissune pôre.
Ce podaraial fâmi mo l’om?
7 Visaitsi dai vuestris sorestants, che us àn contade la peraule di Diu; viodint ce esit ch’al à vût il lôr mût di vivi, cirît di vê une fede compagne de lôr. 8 Gjesù Crist al è simpri chel: îr, vuê e simpri! 9 No stait a lassâsi menâ fûr di strade di dutrinis diferentis e straniis, parcè che al è ben che il cûr al sedi sostentât de gracie, no di mangjativis che no ur àn zovât mai a di chei che lis àn paradis jù. 10 Nô o vin un altâr che no àn nissun dirit di mangjâ chei ch’a servissin la tende. 11 Di fat i cuarps dai nemâi, che il prin predi al puarte il lôr sanc tal santuari pai pecjâts, a vegnin brusâts fûr dal campament. 12 Par chel ancje Gjesù, volint fâ sant il so popul midiant dal so sanc, al à patît fûr des puartis de citât. 13 Saltìn fûr mo ancje nô dal campament e anìn viers di lui puartant la sô infametât, 14 parcè che nô no vin ca jù une citât di stâ simpri ma o cirìn chê a vignî. 15 Ufrin alore di un continui a Diu, midiant di lui, un sacrifici di laude, ven a stâi ce ch’al salte fûr dai lavris ch’a laudin il so non.
16 No stait a dismenteâsi di fâ dal ben e di spartî la vuestre robe cun chei altris, parcè che a son chescj i sacrificis che Diu al à a grât.
17 Ubidît ai vuestris sorestants e stait sot di lôr, parcè che lôr a veglin sore di vualtris come un ch’al à di rindi cont; ubidît, par ch’a fasin chest cun gjonde e no gemint; che no us zovarès nancje a vualtris.
Conclusion
18 Preait par nô; o crodìn di vê la cussience a puest e o vin voe di compuartâsi ben in dut. 19 Us invidi a fâlu ancjemò di plui, par ch’o puedi jessius tornât il plui prest pussibil.
20 Il Diu de pâs, ch’al à fat tornâ dai muarts il grant pastôr des pioris, midiant dal sanc di un pat eterni , il Signôr nestri Gjesù, 21 che us rifinissi in dut ce ch’al è ben par ch’o podês fâ la sô volontât e puartâ indenant in vualtris ce che lui al à a grât midiant di Gjesù Crist. A lui la glorie tai secui dai secui. Amen.
22 Us prei, fradis: acetait cheste peraule di racomandazion: ancje par chel no le ài fate lungje. 23 O vês di savê che il nestri fradi Timoteu al è stât liberât; s’al rive in curt, us viodarai insieme cun lui. 24 Saludait ducj i vuestris sorestants e ducj i sants. Us saludin chei da l’Italie. La gracie ch’e sedi cun ducj vualtris.