Preambul
1 1 Diu, ch’al veve za fevelât tai timps antîcs une vore di voltis e in cetancj mûts ai paris midiant dai profetis, 2 in chescj dîs, ch’a son i ultins, nus à fevelât a nô midiant dal Fi, che lu à metût erêt di dut e che midiant di lui al à fat ancje il mont. 3 Chest Fi, ch’al è il sflandôr de sô lûs e il stamp dal so jessi e ch’al ten sù dut cu la fuarce de sô peraule, dopo di vênus smondeâts dai pecjâts, si è sentât a la gjestre de maiestât adalt tai cîi, 4 e al è deventât tant plui grant dai agnui come che plui grant dal lôr al è il non ch’al à ereditât.
La superioritât di Gjesù sui agnui
5 Di fat a cuâl dai agnui Diu i àial mai dit:
Tu tu sês gno fi; jo vuê ti ài fat nassi?
E ancje:
Jo o sarai par lui pari
e lui al sarà par me fi?
6 E ancjemò, cuant ch’al presente il prin fi tal mont, al dîs:
Lu adoraran ducj i agnui di Diu.
7 Dai agnui invezit al dîs:
Lui al fâs i siei agnui come i aiars,
e i siei servidôrs come lis flamis dal fûc,
8 e dal Fi al dîs:
La tô sente, Diu, e je salde in eterni
e:
Il baston dal comant dal to ream al è un baston just;
9 tu âs amade la justizie e odeade l’inicuitât,
par chel Diu, il to Diu, ti à onzût
cun vueli di ligrie a preference dai tiei compagns.
10 E ancjemò:
Tu, Signôr, dal principi tu âs fondade la tiere
e i cîi a son opare des tôs mans.
11 Lôr a laran in nuie, ma tu tu restis;
s’invecjissaran ducj tant che un vistît.
12 Tu ju vuluçarâs come une manteline,
come une munture e a saran mudâts;
tu invezit tu restis simpri compagn, e i tiei agns no varan fin.
13 A cuâl dai agnui i àial dit mo:
Sentiti a la mê gjestre,
fin che no varai metût i tiei nemîs sot dai tiei pîts?
14 Po no sono ducj spirts ai siei ordins, mandâts par servî chei ch’a àn di ereditâ la salvece?