PRIN DISCORS DI MOSÈ
PART PRIME
Muart di Mosè su la mont dal Nebo
34 1 Alore, partint des pradariis di Moab, Mosè al lè su la mont dal Nebo, su la spice dal Pisghe, ch’e je ripet di Gjeric. Il Signôr i fasè viodi dute la tiere: Galaad fint a Dan, 2 dut Neftali, la tiere di Efraim e di Manasse, dute la tiere di Gjude fint al mâr Mediterani, 3 il Negheb, il distret de valade di Gjeric, citât di palmârs, fintremai a Zoar. 4 Il Signôr i disè: “Ve la tiere che ur ài imprometude par zurament a Abram, a Isac e a Jacop: je darai a la tô dissendence. Te ài fate viodi cui tiei vôi ma però no tu rivarâs gran”.
5 Mosè, famei dal Signôr, al murì venti sù te tiere di Moab, seont il comant dal Signôr. 6 Lu soterarin te valade, te tiere di Moab, in face di Bet-Peor. Fin cumò nissun nol à cjatât fûr il so tombâl. 7 Mosè al veve cent e vincj agns cuant che al murì; il so voli nol jere lafè distudât ni la sô vigurie smavide. 8 I fîs di Israel a faserin corot par Mosè tes pradariis di Moab par trente dîs. Po i dîs che si vaive pal corot di Mosè a finirin. 9 Gjosuè, fi di Nun, al jere incolm di spirt di sapience, parcè che Mosè al veve metût lis mans parsore di lui. E i fîs di Israel i ubidirin a lui lant daûr dal ordin che il Signôr i veve dât a Mosè.
10 No ’nd è stât plui in Israel un profete compagn di Mosè – lui che il Signôr i fevelave muse a muse – 11 par ducj i segnâi e i spiei che il Signôr lu veve mandât a fâ te tiere dal Egjit cuintri dal faraon, cuintri dai siei fameis e cuintri di dute la sô tiere, 12 e pe man potente e pal grant terôr che Mosè al veve metût tes sôs voris denant di dut Israel.