PRIN DISCORS DI MOSÈ
PART PRIME
L’ufierte des primiziis
26 1 Cuant che tu rivarâs te tiere che il Signôr to Diu ti dà di legjitime, cuant che tu sarâs paron e che tu ti sarâs sistemât, 2 tu cjolarâs lis primiziis di dut ce che ti bute il teren de tiere che il Signôr to Diu ti dà, tu lis metarâs tun gei e tu larâs tal lûc sielzût dal Signôr to Diu par meti il so non. 3 Tu larâs a cjatâ il predi che al funzione in chel fratimp e tu i disarâs: vuê o diclari al Signôr gno Diu di jessi rivât te tiere che il Signôr al veve zurât di dâure ai miei vons. 4 Il predi ti cjolarà di man il gei e lu poiarà denant dal altâr dal Signôr to Diu. 5 Denant dal Signôr to Diu tu disarâs chestis peraulis: Gno pari al jere un arameu torseon; al lè jù in Egjit e a jerin in pôcs là jù prin che al deventàs un popul grant, fuart e numerôs. 6 I egjizians nus faserin malegraciis, nus tibiarin e nus meterin su pe schene une sclavitût di no crodi. 7 O vin ricorût al Signôr, Diu dai nestris vons. Il Signôr al à scoltade la nestre vôs, al à viodude la nestre streme, la nestre passion e la nestre sclavitût, 8 e il Signôr nus à fats saltâ fûr dal Egjit cun man fuarte e cun braç tindût, cun grant terôr, cun spiei e cun meracui. 9 Nus à menâts culì e nus à dade cheste tiere, tiere che a scorin a riui lat e mîl. 10 E jo cumò o puarti lis primiziis de tiere che tu mi âs dât, Signôr. Tu lis metarâs denant dal Signôr to Diu e tu ti ingenoglarâs denant dal Signôr to Diu. 11 Po tu ti indalegrarâs di dutis chestis robis buinis che il Signôr to Diu ti à colmât, tu e la tô cjase, tu e ancje il levit e il forest che al vîf cun te.
La decime dai trê agns
12 Il tierç an, an de decime, cuant che tu varâs finît di cjoli sù la decime di dute la robe e tu je varâs dade al levit, al forest, a la vedue e al vuarfin, che si saran ricreâts mangjant tes tôs citâts, 13 tu disarâs denant dal Signôr to Diu: O ài gjavât de mê cjase dut ce che al jere consacrât e jal ài dât al levit, al forest, al vuarfin e a la vedue seont i comants che tu mi âs dât, cence lâ plui in là dai tiei ordins e nancje dismenteâju. 14 No ài cerçade bocjade cuant che o fasevi corot, no ài tocjât nuie cuant che o jeri soç, no i ài dât nuie par un muart. O ài scoltade la vôs dal Signôr gno Diu e o ài agjît daûr che mi veve ordenât lui. 15 De cjase de tô santitât, dai cîi, cjale e benedìs il to popul Israel e ancje la tiere che tu nus âs dade come che tu ur vevis zurât ai nestris vons, tiere che a scorin a riui lat e mîl.
SECONT DISCORS DI MOSÈ
PART SECONDE
Esortazion conclusive
16 Il Signôr to Diu vuê ti ordene di meti in pratiche chestis leçs e usancis; tu lis tignarâs a ments e tu lis metarâs in vore cun dut il to cûr e cun dute la tô anime. 17 Tu âs otignût che vuê il Signôr ti disès clâr e net che al sarà il to Diu, a pat però che tu ledis indenant pai siei trois, che tu rispietis lis sôs leçs, i siei comants e lis sôs usancis e che tu scoltis la sô vôs. 18 E il Signôr al à otignût vuê di te chest impegn, che tu sarâs il so popul, par so cont, come che tal à dit, a pat però che tu metis in vore i siei comants. 19 Alore ti alçarà parsore di ducj i popui che al à fat, par cont di onôr, di bon non e di glorie, e tu sarâs un popul consacrât al Signôr to Diu, come che lui tal à imprometût.