PRIN DISCORS DI MOSÈ
PART PRIME
Fiestis: pasche e pan cence levan
16 1 Rispiete il mês di Abib e fâs la pasche in onôr dal Signôr to Diu, parcè che al è tal mês di Abib che il Signôr to Diu, vie pe gnot, ti à fat saltâ fûr dal Egjit. 2 Tu i sacrificarâs al Signôr to Diu une pasche di besteam grant e minût, tal lûc sielzût dal Signôr to Diu par fâ stâ il so non. 3 No tu mangjarâs, cu la vitime, pan jevât; par siet dîs tu mangjarâs parie pan cence levan, pan di miserie, parcè che o vês lassât l’Egjit di dute presse. Cussì tu ti visarâs ducj i dîs de tô vite de zornade che tu sês saltât fûr de tiere dal Egjit. 4 Par siet dîs no si viodarà levan in cjase tô, sun dute la tô tiere, e de cjar che tu varâs ufierte la sere de prime zornade nol à di restâ nuie pal indoman. 5 No tu podarâs ufrî la pasche intune des citâts che il Signôr to Diu ti varà dadis 6 ma tal lûc sielzût dal Signôr to Diu par meti il so non tu ufrissarâs la pasche, sore sere, sul lâ a mont dal soreli, su l’ore che tu sês saltât fûr dal Egjit. 7 Tu le fasarâs cuei e tu le mangjarâs tal lûc sielzût dal Signôr to Diu; podopo, a buinore, tu tornarâs indaûr e tu ti ’nt larâs tes tôs tendis. 8 Par sîs dîs tu mangjarâs pan cence levan; la setime dì si fasarà une grande semblee pal Signôr to Diu e no tu fasarâs nissune sorte di vore.
Fiestis: setemanis e tendis
9 Tu contarâs siet setemanis. Cuant che il falcet al varà tacât a taiâ i spîs, alore tu scomençarâs a contâ chestis siet setemanis. 10 Tu fasarâs pal Signôr to Diu la fieste des setemanis, cu l’ufierte libare ch’e fasarà la tô man, daûr che il Signôr to Diu ti varà benedît. 11 Tu t’indalegrarâs denant dal Signôr to Diu, tal lûc sielzût dal Signôr to Diu par fâ stâ il so non: tu, to fi e tô fie, il to famei e la tô sierve, il levit che al è tes tôs citâts, il forest, il vuarfin e la vedue che a vivin framieç di te. 12 Tu ti impensarâs che tu âs stât in sclavitût te tiere dal Egjit e tu rispietarâs chestis leçs e tu lis metarâs in pratiche.
13 Tu fasarâs la fieste des tendis par siet dîs, cuant che tu tirarâs dentri il racolt de tô arie e dal to turcli. 14 Tu ti ristorarâs te tô fieste, tu, to fi e tô fie, il to famei e la tô sierve, il levit e il forest, il vuarfin e la vedue che a son tes tôs citâts. 15 Par siet dîs tu i fasarâs fieste al Signôr to Diu tal lûc sielzût dal Signôr; parcè che il Signôr to Diu ti benedissarà in ducj i racolts e in dutis lis tôs voris, par che tu sedis content ad implen. 16 Trê voltis ad an, ducj i mascjos si presentaran denant dal Signôr to Diu tal lûc che al varà sielzût: pe fieste dal pan cence levan, pe fieste des setemanis e pe fieste des tendis. Nissun no si presentarà denant dal Signôr a mans spacant 17 ma ognidun al darà a carat de benedizion che il Signôr to Diu ti varà dade.
II. LEÇS CIVÎLS
I judiçs des citâts
18 Tu metarâs judiçs e scrituriscj in ogni citât che il Signôr to Diu ti dà, par dutis lis tribûs; a judicaran il popul cun sentencis justis. 19 No tu fasarâs lâ fûr di troi il dirit, no tu varâs preferencis pes personis e no tu acetarâs regâi di sorte, parcè che il regâl al svuarbe i vôi dai sapients e al pare in fruç lis causis dai galantoms. 20 Tu cirarâs la justizie plui strete, se tu vuelis vivi e paronâ la tiere che il Signôr to Diu al sta par dâti.
Deviazions dal cult
21 No tu plantarâs nissun pâl sacrâl, di nissune sorte di len, dongje dal altâr dal Signôr to Diu che tu varâs fat sù, 22 e nancje no tu metarâs colonei, robe che il Signôr to Diu nol podarà concepîle.