Denêl tal palaÇ dal re di Babilonie
La resurezion finâl
12 1 In chê volte al jevarà sù Micjêl, il grant princip ch’al vegle sui fîs dal to popul. Al sarà un timp di tribulazion che no ’nd è stade di compagne di cuant che a son i popui fint in chel moment. In chê volte il to popul al sarà salvât, ducj chei che si cjataran scrits tal libri.
2 E une vore di chei ch’a duarmin te tiere dal pulvin si svearan: chescj pe vite eterne, ma chei altris pe vergogne, pe infametât eterne. 3 I savis a lusaran come il lusôr de volte dal cîl e chei ch’a varan menâts une vore di lôr su la strade de justizie a saran come lis stelis in eterni, par simpri.
4 E tu, Denêl, ten segretis chestis peraulis e sigjile il libri fintremai al timp de fin. Une vore di lôr a ciraran di lâ a font e la lôr cognossince e cressarà”.
Cuant la fin?
5 Jo Denêl o cjalavi. Ve altris doi ch’a stavin un di ca su la rive dal flum e un di là su chê altre rive dal flum. 6 Un i domandà al om vistût di fîl ch’al jere parsore des aghis dal flum: “Cuant sarae la fin di chestis robis cussì straordenariis?”. 7 Alore o sintii l’om vistût di fîl ch’al jere parsore des aghis dal flum a zurâ, cu la gjestre e la çampe alçadis viers dal cîl, par chel ch’al vîf in eterni: “Par un timp, par plui timps e par mieç timp. Cuant che si varà finît di fiscâ la fuarce dal popul sant, dutis chestis robis a rivaran al colm”. 8 O vevi sintût ben ma no vevi capît e alore o domandai: “Signôr gno, cuâl saraial il colm di dutis chestis robis?”. 9 Mi rispuindè: “Va, Denêl, parcè che lis peraulis a son stadis scritis e sigjiladis fintremai al timp de fin. 10 Une vore di lôr a saran smondeâts, lavâts, provâts; ma i triscj a restaran triscj; nissun trist nol capissarà, dome i sapients a capissaran. 11 Dal moment ch’al cessarà il sacrifici eterni e al sarà metût impen il disordin de tribulazion a saran mil dusinte e novante dîs. 12 Furtunât chel ch’al spietarà e ch’al rivarà a mil tresinte e trentecinc dîs. 13 Tu va indenant fintremai a la fin; tu polsarâs e po tu tornarâs a jevâ sù par cjapâ la tô part, a la fin dai dîs”.