IL REAM DI SALOMON
REAM DI GJOSAFAT
Celebrazion de pasche
30 1 Ezechie al mandà mes par dut Israel e par Gjude e ur scrivè ancje letaris a Efraim e a Manasse par clamâju ducj tal templi di Gjerusalem a fâ la pasche in onôr dal Signôr, Diu di Israel. 2 Il re, i siei graduâts e dute la semblee di Gjerusalem a distinarin di fâ la pasche tal secont mês, 3 parcè che no vevin podût fâle cuant che e scjadeve par vie che no si jerin smondeâts avonde i predis e il popul no si jere dât dongje in Gjerusalem. 4 La propueste i semeà juste al re e a dute la semblee. 5 A distinarin di mandâ fûr un befel par dut Israel, di Bersabee a Dan, par che ducj a vignissin in Gjerusalem a fâ la pasche in onôr dal Signôr, Diu di Israel, stant che une vore di lôr no vevin rivât a fâle come ch’al jere stât ordenât. 6 I cursôrs, cun tant di letare dal re e dai siei graduâts, a passarin dut Israel e Gjude, berlant par ordin dal re: “Fîs di Israel, tornait dal Signôr, Diu di Abram, di Isac e di Israel, e lui al tornarà di ducj vualtris, ch’o sês scjampâts des mans dal re de Assirie. 7 No stait a lâ daûr dai vuestris paris e dai vuestris fradis, ch’a àn butât di bande il Signôr Diu dai lôr vons e ancje lui ju à bandonâts a la disperazion, come ch’o podês viodi. 8 No stait a jessi dûrs di cjâf come i vuestris paris; slungjait la man viers il Signôr; vignît tal santuari che lui al à fat sant par simpri. Servît il Signôr vuestri Diu e la sô fumate sbrovent si slontanarà di vualtris. 9 Di fat, s’o tornarês dal Signôr, i vuestris fradis e i vuestris fîs a cjataran remission tal cûr di chei che ju àn menâts vie; a tornaran in cheste tiere, parcè che il Signôr, vuestri Diu, al à dûl e al perdone, e nol voltarà la sô muse di vualtris, se vualtris o tornarês di lui”.
10 I cursôrs a passarin di citât in citât te tiere di Efraim e di Manasse fint a Zabulon, ma la int ju sbeleave e ur sghignive in muse. 11 Dome un troput di Aser, di Manasse e di Zabulon si umiliarin e a vignirin a Gjerusalem. 12 Invezit in Gjude si palesà la fuarce dal Signôr, che ur dè un cûr sôl tal meti in vore l’ordin dal re e dai siei graduâts seont la peraule dal Signôr. 13 Si dè dongje in Gjerusalem un disordin di int par fâ la fieste dal pan cence levan tal secont mês; e fo une semblee cun tante intone. 14 A scomençarin a butâ jù i altârs ch’a jerin in Gjerusalem, a sdrumarin ancje i altârs dai bonodôrs e ju butarin tal riul dal Cedron.
15 A sacrificarin la pasche ai cutuardis dal secont mês; i predis e i levits, plens di rivuart, si smondearin e po a presentarin i olocauscj tal templi. 16 Ognidun al le te sô place, seont lis regulis distinadis par lôr te leç di Mosè, om di Diu. I predis a sborfavin cul sanc che lu cjapavin des mans dai levits 17 parcè che une vore di lôr, te semblee, no si jerin smondeâts. I levits a proviodevin a copâ i agnei de pasche par chei che no vevin la mondisie ch’e coventave par ufrîjai al Signôr. 18 In efiets la pluritât de int di Efraim, di Manasse, di Issacar e di Zabulon, no si jerin smondeâts; a mangjarin la pasche cence fâ ce ch’al è comandât. Ezechie al preà par lôr: “Il Signôr, ch’al è bon, ch’al vedi remission 19 di ducj chei ch’a àn un cûr disponût a cirî Diu, ven a stâi il Signôr, Diu dai lôr vons, ancje cence la mondisie ch’e covente pal santuari”. 20 Il Signôr al scoltà Ezechie e al sparagnà il popul.
21 Cussì i fîs di Israel ch’a jerin in Gjerusalem a faserin la fieste dal pan cence levan par siet dîs, cun grande gjonde, intant che i predis e i levits a laudavin ogni dì il Signôr cui struments ch’a sunavin in so onôr. 22 Ezechie ur dè spirt a ducj i levits, parcè che a vevin palesât un grant sintiment tal servî il Signôr; par siet dîs a cjaparin part al grant gustâ, a ufririn sacrificis di comunion e a laudarin il Signôr, Diu dai lôr vons.
23 Dute la semblee e decidè di fâ fieste par altris siet dîs; e cussì a passarin ancjemò siet dîs di ligrie. 24 Di fat il re Ezechie ur veve regalât a la int mil taurs e siet mil pioris; ancje i sorestants i vevin regalade a la int mil manzuts e dodis mil pioris. Si jerin smondeâts une vore di predis. 25 Dute la semblee di Gjude, i predis e i levits, dut il trop vignût di Israel, i forescj vignûts de tiere di Israel e chei ch’a jerin a stâ in Gjude a forin colmâts di ligrie. 26 E fo une gjonde straordenarie in Gjerusalem, parcè che dai timps di Salomon fi di David, re di Israel, no jere sucedude une robe compagne in Gjerusalem.
27 I predis e i levits a jevarin in pîts par segnâ il popul; la lôr vôs e fo scoltade e la lôr preiere e rivà fin te sante cjase di Diu, tal cîl.