IL REAM DI SALOMON
Riforme religjose
15 1 Il spirt di Diu si poià sore di Azarie, fi di Obed, 2 che i le incuintrii a Ase e i disè: “Ase e ducj vualtris di Gjude e di Beniamin, scoltaitmi! Il Signôr al sarà cun vualtris se vualtris o sarês cun lui; se lu cirarês lui si lassarà cjatâ di vualtris, ma se lu bandonarês lui us bandonarà. 3 Par tant timp in Israel nol jere il vêr Diu, ni un predi ch’al insegnàs, ni une leç. 4 Ma, te streme, al è tornât dal Signôr, Diu di Israel; lu àn cirût e lui si à lassât cjatâ di lôr. 5 In chê volte no ’nd jere pâs par nissun, parcè che and jere grancj ribaltons in dute la int di dutis lis tieris. 6 Un popul si scuarnave cuintri di un altri, une citât cuintri di chê altre, parcè che Diu ju lambicave cun tribulazions di ogni sorte. 7 Vualtris però stait salts e lis vuestris mans no àn di clopâ, parcè che e sarà una pae pe vuestre vore”.
8 Cuant che Ase al sintì chestis peraulis e la profezie, al cjapà spirt. Al fasè sparî i dius di dute la tiere di Gjude e di Beniamin e des citâts ch’al veve cjapadis su lis monts di Efraim; i tornà a fâ al Signôr un altâr, ch’al jere in face dal antîl dal Signôr. 9 Al clamà dongje dute la int di Gjude e di Beniamin e chei che, rivâts di Efraim, di Manasse e di Simeon, a vivevin framieç di lôr tant che forescj; di fat di Israel and jere vignûts di lui a pleton, parcè che si jerin sancirâts che il Signôr al jere cun lui.
10 Si derin dongje in Gjerusalem tal tierç mês dal an cuindicesim dal ream di Ase. 11 In chê dì i sacrificarin al Signôr part dal rafât ch’a vevin puartât dongje: sietcent bûs e siet mil pioris. 12 Si oblearin cun tant di pat a cirî il Signôr, Diu dai lôr vons, cun dut il cûr e cun dute l’anime. 13 Ducj chei, grancj o piçui, oms o feminis, che no vessin cirût il Signôr, Diu di Israel, a vevin pronte la muart. 14 I zurarin al Signôr ad alte vôs e cun berlis, fra sunôrs di trombis e di cuars. 15 Dut Gjude al fo in gjonde par vie dal zurament, parcè che a vevin zurât cun dut il cûr e a vevin cirût il Signôr cun dute la lôr passion e lui si jere lassât cjatâ di lôr e ur veve dade pâs ai confins.
16 Il re i gjavà la sô dignitât di regjine a Maache, mari di Ase, parcè che e veve fat sù une robate in onôr di Asere. Ase al sdrumà cheste porcarie, le parà a tocs e le brusà tal riul dal Cedron. 17 Ma però no sparìrin di Israel i lûcs alts, seben che il cûr di Ase al restà just par dute la vite. 18 Al fasè puartâ tal templi lis robis di avôt ch’al veve metudis di bande so pari e chês che lis veve metudis di bande ancje lui, dute robe di arint, di ram e creps. 19 Fintremai al an trentecinchesim dal ream di Ase no si savè ce ch’e jere la vuere.