IL REAM DI SALOMON
Ream di Roboam
11 1 Roboam, rivât in Gjerusalem, al clamà dongje lis tribûs di Gjude e di Beniamin, cent e otantemil vuerîrs di prime, par combati cuintri di Israel cul fin di tornâi il ream a Roboam. 2 Ma a Semaie i rivà cheste peraule di Diu: 3 “Dîsii a Roboam fi di Salomon, re di Gjude, e a ducj i israelits ch’a son in Gjude e in Beniamin: 4 il Signôr al dîs cussì: No stait a lâ a fâ vuere cuintri dai vuestris fradis. Ognidun ch’al torni cjase sô, parcè che cheste situazion le ài volude jo”. A scoltarin lis peraulis dal Signôr e a rinunziarin a marçâ cuintri di Gjeroboam.
5 Roboam si sistemà in Gjerusalem. Al rinfuarçà un pocjis di citâts di Gjude. 6 Al tornà a fâ sù Betlem, Etam, Tekoe, 7 Bet-Zur, Soco, Adulam, 8 Gat, Marese, Zif, 9 Adoraim, Lachis, Azeke, 10 Zoree, Aialon e Ebron; chestis fuartecis a jerin in Gjude e in Beniamin. 11 Al rinfuarçà chestis fuartecis, al metè comandants e al sistemà dipuesits di spese, di vueli e di vin. 12 In ogni citât al sistemà scûts e lancis, fasintlis deventâ une vore fuartis. I restarin fedêi Gjude e Beniamin.
13 I predis e i levits, ch’a jerin in dut Israel, si derin dongje di dut il teritori par butâsi de sô bande. 14 I levits a bandonarin i passons, la lôr robe e a lerin in Gjude e in Gjerusalem, parcè che Gjeroboam e i siei fîs ju vevin parâts fûr dal sacerdozi dal Signôr. 15 Gjeroboam al veve metût predis dai siei pai lûcs alts, pai demonis e pai vidiei ch’al veve fat fâ. 16 Alore, di dut Israel, ducj chei ch’a vevin distinât dentri di sè di restâ fedêi al Signôr Diu di Israel a lerin in Gjerusalem par fâi sacrificis al Signôr, Diu dai lôr vons. 17 Cussì a rinfuarçarin il ream di Gjude e i tignirin man par trê agns a Roboam fi di Salomon, parcè che par trê agns al le indenant pe strade di David e di Salomon.
18 Roboam al cjolè Macalat, fie di Jerimot, fi di David, e di Abiail fie di Eliab, fi di Jesse. 19 Jê i parturì i fîs Jeus, Semarie e Zaam. 20 Dopo di jê, al cjolè Maache fie di Assalon, che i parturì Abie, Atai, Zize e Selomit. 21 Roboam i volè plui ben a Maache fie di Assalon che no a dutis chês altris feminis e concubinis; al cjolè disevot feminis e sessante concubinis e i nasserin vincjevot fîs e sessante fiis. 22 Roboam al metè sorestant, vadì prin di ducj i siei fradis, Abie fi di Maache, parcè che al pensave di fâlu re. 23 Cun baronade al sparniçà in ducj i borcs di Gjude e di Beniamin, in dutis lis fuartecis, cualchidun dai siei fîs. Ju furnì di dute la mangjative ch’a volevin e ur proviodè ancje lis feminis.