GJENEALOGJIE DI ADAM A DAVID
TRASFERIMENT DA L’ARCJE A GJERUSALEM
I prins antenâts
20 1 Sul scomençâ dal an dopo, cuant che i rês a vevin l’usance di lâ in vuere, Joab, al comant di un grant esercit, al fiscà la tiere dai amonits e po al lè a sidiâ Rabe, biel che David al jere restât in Gjerusalem. Joab al cjapà e al splantà Rabe. 2 David al cjolè dal cjâf di Milcom la corone; al viodè ch’e pesave un talent d’aur; e veve ancje une piere di grant valôr. La corone e fo metude sul cjâf di David. Lui al strafuì de citât un rafât fenomenâl. 3 Si menà daûrsi ancje dute la int, che le condanà a lavorâ cun seis, cun picons di fier e cun manariis. David al tratà compagn dutis lis citâts dai amonits. Podopo al tornà cun ducj i siei in Gjerusalem.
Vitoriis sui filisteus
4 Plui in ca, e sclopà une vuere cui filisteus, a Ghezer. Alore Sibecai di Cuse al copà Sipai de gjernazie dai refaim. I filisteus a deventarin sotans.
5 E sclopà un’altre vuere cui filisteus e Elkane, fi di Jair, al copà Lacmi, fradi di Golie di Gat; l’aste de sô lance e jere tant che il subli dal tiessidôr.
6 E sclopà un’altre vuere in Gat e un omenon alt di fâ pôre, ch’al veve i dêts a sîs a sîs – vadì in dut vincjecuatri –, ancje lui de gjernazie di Rafe, 7 al svilanà Israel; Gjonate, fi di Simee, fradi di David, lu maçà. 8 Chescj oms a jerin ducj dissendents di Rafe in Gat; a colarin par man di David e dai siei oms.