GJENEALOGJIE DI ADAM A DAVID
CAMPAGNIS VITORIOSIS DI DAVID
Vueris di David
18 1 Plui in ca, David al batè i filisteus, ur fasè sbassâ la creste e ur puartà vie Gat cui borcs dulintor. 2 Podopo al batè i moabits, ch’a deventarin sotans di David e i paiarin lis tassis. 3 David al batè ancje Adad-Ezer, re di Zobe, des bandis di Amat, cuant ch’al marçave viers dal flum Eufrât par slargjâ la sô paronance fintremai ventilà. 4 David i puartà vie mil cjars, sietmil cjavalîrs e vincj mil soldâts a pît. David ur fasè cjonçâ i sghirets a ducj i cjavai, salvant dome un centenâr.
5 I arameus di Damasc a lerin a dâi une man a Adad-Ezer, re di Zobe, ma David ant copà vincjedoimil. 6 David al metè sorestants in Aram di Damasc; i arameus a deventarin sotans di David e i paiarin lis tassis. Il Signôr al fasè vinci David pardut là ch’al leve. 7 David ur strafuì ancje i scûts d’aur ai graduâts di Adad-Ezer e ju puartà in Gjerusalem. 8 Di Tibcat e di Cun, citâts di Adad-Ezer, David al strafuì un disordin di bronç, che dopo Salomon al fasè la concje di bronç, lis colonis e dut il furniment di bronç.
9 Tou re di Amat, savût che David al veve fiscât dut l’esercit di Adad-Ezer re di Zobe, 10 al mandà so fi Adoram a saludâ il re David e a indalegrâsi cun lui par vie ch’al veve tacât e vinçût Adad-Ezer, dal moment che Tou al jere simpri in vuere cun Adad-Ezer; Adoram al puartave daûrsi robe d’aur, d’arint e di bronç. 11 Ancje cheste robe David je consacrà al Signôr insieme cul aur e l’arint che ur veve puartât vie a ducj chei altris popui, ven a stâi a Edom, a Moab, ai amonits, ai filisteus e ai amalecits.
12 Abisai, fi di Zeruià, al fruçà te concje dal Sâl disevotmil idumeus. 13 Al metè vuarnigjons in Edom; ducj i idumeus a deventarin sotans di David. Il Signôr al faseve vinci David in ogni sô iniziative.
Ministrazion dal ream
14 David al regnà parsore di dut Israel e al fasè justizie cui siei judizis a dut il so popul.
15 Joab, fi di Zeruià, al jere sorestant dal esercit; Gjosafat fi di Achilud al jere archivist. 16 Zadok fi di Achitub e Abimelec fi di Ebiatar a jerin predis; Savse al jere scriturist. 17 Benaià fi di Joiadà al veve il comant dai creteus e dai peleteus; i fîs di David a jerin i prins dongje dal re.