la glesie framieç dai ebreus
Pauli a Efeso
19 1 Biel che Apol al jere a Corint, Pauli, passant pe Alte, al rivà a Efeso. Al cjatà un troput di dissepui 2 e ur disè: “Vêso vût il Spirtu Sant cuant ch’o vês acetade la fede?”. I rispuinderin: “Po no vin nancje mai sintût a dî ch’al è un Spirtu Sant!”. 3 E lui: “Ma ce batisim vêso vût?”. I rispuinderin: “Il batisim di Zuan”. 4 Alore Pauli ur disè: “Zuan al à batiât cuntun batisim di conversion, disint al popul di crodi in chel ch’al sarès vignût daûr di lui, ven a stâi in Gjesù”. 5 Sintint cussì, si faserin batiâ tal non dal Signôr Gjesù 6 e cuant che Pauli ur metè lis mans sul cjâf, ur vignì intor il Spirtu Sant e si meterin a fevelâ lenghis e a profetâ. 7 And jere, in dut, un dodis.
A fondin la glesie di Efeso
8 Lant te sinagoghe, Pauli al fevelà franc par trê mês, resonant dal ream di Diu e cirint di persuadi chei che lu scoltavin. 9 Ma cualchidun di lôr, dûr di cûr e cence nissune voe di crodi, a slengonavin in public cheste gnove dutrine. Alore ju lassà stâ par cont lôr e al cjapà in bande i siei dissepui. Ogni dì ju inscuelave te scuele di Tiran. 10 E cussì par doi agns di file, di mût che dute la int de Asie, gjudeus e grêcs, a verin la pussibilitât di scoltâ la peraule dal Signôr.
Meracui di Pauli. Esorciscj giudeus
11 Diu al faseve, midiant di Pauli, meracui no tant piçui, 12 al pont ch’al bastave poiâ sui malâts façolets o peçots ch’a vevin tocjât il so cuarp e lis malatiis a sparivin e i spirts triscj a fuivin.
13 Un trop di gjudeus ch’a levin ambulants a parâ fûr i spirts, a provarin ancje lôr a clamâ il non dal Signôr Gjesù sun chei ch’a vevin intorsi spirts soçs disint: “Us sconzuri par chel Gjesù che lu predicje Pauli”. 14 Chest lu faserin siet fîs di un cert Seve, prin predi gjudeu. 15 Ma il spirt trist ur rispuindè: “O sai cui ch’al è Gjesù e o sai ancje cui ch’al è Pauli; ma vualtris, cui sêso?”. 16 E l’om ch’al veve intorsi il spirt trist si butà parsore di lôr e ju sdrondenà tant ch’a scjamparin di chê cjase crots e plens di pachis. 17 Il fat a vignirin a savêlu dute la int di Efeso, gjudeus e grêcs. E ducj a vevin tante pôre e il non dal Signôr Gjesù al jere puartât che mai. 18 Une vore di chei ch’a vevin cjapade la fede a vignirin a contâ denant di ducj i striaments ch’a vevin fat 19 e chei ch’a jerin lâts daûr dai strolegheçs a puartarin i lôr libris par brusâju presince di ducj. A faserin il cont di dut e si rivà a cincuantemil dracmis d’arint. 20 Cussì la peraule dal Signôr e cresseve e e cjapave pît propit ben.
Progjets di Pauli
21 Dopo di chestis robis, Pauli al pensà di passâ pe Macedonie e pe Acaie e di lâ a Gjerusalem. Al diseve: “Dopo di jessi stât là, o ài di lâ ancje a Rome”. 22 Alore al mandà in Macedonie doi di chei che i davin une man, Timoteu e Erast, e al restà ancjemò un trat di timp te provincie de Asie.
Il ribalton di Efeso
23 In chel fratimp si invià un grant ribalton a rivuart de gnove dutrine. 24 Un cert Demetri, ch’al jere oresin e al faseve templuts di Artemide d’arint, ur dave di vivi pulît ancje ai artesans. 25 Ju clamà dongje insieme cun altris ch’a fasevin il stes mistîr e ur disè: “Compagns, o savês che nô o vin fate furtune cun chest mistîr culì. 26 O vês savût e viodût che no dome a Efeso ma in dute l’Asie chest Pauli, par cantins siei, al à tirâts daûrsi int a pleton, disint che no son dius chei ch’a saltin fûr de man dal om. 27 Une robe dal gjenar no dome nus cjol credit tal nestri mistîr, ma i puarte prejudissi ancje al santuari de grande dee Artemide e e finissarà cul ridusi a nuie chei che le prein par dute l’Asie e tal mont intîr”.
28 Sintint cussì, si invelegnarin e a scomençarin a berlâ: “L’Artemide dai efesins e je grande!”. 29 Si invià un davuei disordenât in dute la citât e a plombarin insieme tal teatri, strissinantsi daûr Gaio e Aristarc, macedonês, compagns di mission di Pauli. 30 Pauli al voleve frontâ la int, ma i siei dissepui no lu lassarin gran. 31 Ancje cualchidun dai sorestants de provincie, ch’a vevin fate amicizie, a mandarin a sconzurâlu di no lâ a cirîsi displasês presentantsi tal teatri. 32 Intant un al berghelave une robe e un un’altre; la semblee e jere te confusion plui grande e la pluritât di lôr no savevin nancje la reson che si jerin dâts dongje. 33 Un pôcs di lôr a faserin lâ sù un cert Alessandri, che i gjudeus lu vevin sburtât indenant, e chel, fat segnâl cu la man, al voleve sclarî lis sôs resons denant de int. 34 Ma co si inacuargerin ch’al jere gjudeu, a tacarin ducj a sberghelâ par scuasit dôs oris: “L’Artemide dai efesins e je grande!”. 35 Finalmentri il cancelîr al rivà a bonâ la int e al disè: “Int di Efeso, cui no saial che la citât di Efeso e à in consegne il templi de grande Artemide e de sô statue vignude jù dal cîl? 36 Stant che chest nissun no lu met in dubit, o vês di stâ bogns e di cirî di no fâ ce che nol va fat. 37 O vês menâts chi chescj oms. Poben, no si pues dâur la colpe ni di vê fat sacrilegji ni di vê blestemât cuintri de nestre dee. 38 Che se Demetri e i siei lavorents a àn cantins cuintri di cualchidun, a son i tribunâi par chel cont e a son i proconsui. Che si fasin clamâ fra di lôr. 39 S’and è alc altri di dî, si lu sclarissarà te semblee ordenarie. 40 Cun ce ch’al è sucedût vuê, al è pericul di sei incolpâts di disordins, stant che no ’nd è resons par spiegâ cheste semblee”. 41 E cun chestis peraulis al sierà la cunvigne.