A son 20 agns che o vin publicade sul nestri sît la Bibie voltade par furlan, te edizion dal 1997, cu la autorizazion dall’Istitût Pio Paschini pe storie de Glesie in Friûl.

Tal 2011, di domenie 3 a sabide 9 di Avrîl, Glesie Furlane e à promovude la leture continue de Bibie par furlan, te edizion dal 1997, cul jutori de ARLeF, in colaborazion cu la Arcidiocesi di Udin, la Provincie di Udin e il patrocini dal Comun di Udin, mobilitant 1200 letôrs.

Cheste iniziative e je stade un fat storic, plui unic che râr e di grant valôr eclesiâl e culturâl.

O sin une vore braurôs di podê presentâju in cheste gnove sezion dal nestri sît.

No podevin lassâ lâ in dismentie un event cussì impuartant pe nestre storie. O riproponìn i filmâts, pensant che i protagoniscj, e no dome, a vedin plasê di riviodi; ma ancje cui che al à dificoltât di lei che al puedi scoltâ la bielece de Peraule di Diu te nestre lenghe mari.