Notiziis e avîs

O sin tal tierç aniversari che pre Antoni nus à lassâts e l’amicizie cu la fede nus invidin a ricuardâlu.

Vinars 23 e sarà celebrade une Messe a Visepente as 8.00 sore sere.

Domenie 25 si cjatarìn a Vençon as 5.00 sore sere.

O parteciparìn a la Rogazion di S. Marc.

L’apuntament al è in Domo e daspò, cjantant lis litaniis dai sants, o larìn viers la glesie di S. Catarine pe Messe.

Al ricuardarà pre Antoni Mauro Della Schiava, che al à discutude la tesi di lauree

“Restâ cu la int – l’esperience di Glesie Furlane”.

O varìn l’ocasion par gjoldi di une gnove publicazion de Opera omnia: “Riflessions di un predi cjargnel”.

Dal “Cumiât”:

…”Vivêt a lunc, vivêt cun dignitât, vivêt di furlans. Vivêt pal vuestri ben, vivêt pal ben de glesie, vivêt pal ben dal nestri Friûl. Cence fâ i prepotents e cence vendisi, lavorant e pratindint, galantoms cun Diu e cul mont.

Intun timp cussì birbant e galiot, us racomandi di no pierdi ni la memorie ni la tramontane ni la voe di fâ.

Se no rivais a gambiâ il mont, cirît che il mont no us gambii vualtris.

Se no rivais a salvâlu, metêtle dute par che no us sassini.

Che al puedi benedîus Diu e la storie, come che cumò us benedis pe ultime volte e cun dut il cûr il vuestri puar predi e fradi”…

pre Antoni

In chescj dîs si celebre la zornade mondiâl da l’aghe. Licio De Clara al à domandât di meti sul sît di Glesie Furlane chest document, come segno di adesion ancje nestre a cheste zornade e a chest problema che cul timp al sarà simpri plui grâf ancje culì di nô. E je une biele letare pastorâl dai vescui de Americhe Latine.

Luis Infanti de la Mora, vescul Vescul Vicjari Apostolic di Aysén Fradis e Sûrs miei cjârs: di visite ae comunitât di Villa O’Higgins la mê veture e veve sêt. Saceâ cheste sêt mi à costât 850 pesos par ogni litri di benzine. Ancje jo o vevi sêt. Ogni litri di AGHE mi à costât 900 pesos. No soi restât cuiet. Intal ream des aghis puris e di cristal, des nêfs eternis, dai salts di aghe plens di gracie, dai flums maestôs, come in Aysén, là che si pues bevi la aghe plui pure dal mont, e a gratis, la aghe in butilie e je plui cjare de benzine, dal lat, di un chilo di pan. E tant che tons di fûcs artificiâi il cjâf si à jemplât di “parcês”. O ai cirût, domandât, viodût, pensât, cjacarât…E je stade une rason in plui par scrivi cheste letare pastorâl, la prime intai miei 8 agns di servizi tant che vescul de regjon di Aysén de PATAGONIE.

Chest an la Provincie di Udin Provincie di Pordenon Comun di Gurize Consei di cuartîr di Lucinîs Istitût Ladin Furlan “Pre Checo Placerean” cu la partecipazion di Regjon Autonome Friûl Vignesie Julie, ARLEF – Diocesis di Gurize, Concuardie-Pordenon e Udin – Universitât dal Friûl, C.I.R.F. – Comun di Udin – Ufici scolastic regjonâl – Societât Filologjiche Furlane – Parochie di S. Zorç Martar di Lucinîs – Parochie e Borc di S. Roc, Gurize – Grop Folcloristic Danzerins di Lucinîs a organizin la fieste nazionâl dal Friûl. La provincie di Udine à preparât un prontuari par capî. Un librut sempliç che al vûl jessi un contribût pe comprension de Fieste dal Friûl. Pensât par judâ a capî il parcè de sô impuartance e di cemût che cheste ricorence e sedi un pont centrâl ancjemò valit par rinsaldâ i leams dai furlans cu la lôr tiere e la lôr lenghe. No dome, al serf ancje par dâ informazions sveltis su la atualitât dai valôrs identitaris e sui beneficis che a derivin sedi di un pont di viste sociâl che economic, ma ancje par visâ des manifestazions ator pal Friûl.

Vinars ai 13 di Novembar a lis 11.00 tal Salon dal Consei in palaç Belgrât si darà dongje l’incuintri viert a ducj par celebrâ i 25 agns de prime edizion de Bibie par furlan. Daspò salûts dal president on. Pietro Fontanini, dal vescul bonsignôr Andrea Bruno Mazzoccato, dai arcivescui emerits Pietro Brollo e Alfredo Battisti, dal president dal Arlef Lorenzo Zanon, a son previodûts i intervents di bonsignôr Marino Qualizza “Il coordenament di une grande opare”, dal professôr Giuseppe Bergamini “Criteris artistics de sielte iconografiche”, di bonsignôr Duilio Corgnali “La Bibie par un popul”, di Mario Ribis “Efiets di un progjet che al cjape dentri”, di pre Tonin Capellari “No crodevin in Lui”. Al fâs zirâ la peraule il gjornalist Silvano Bertossi.

Cjale…

Ai 29 di setembar dal 1974 – fieste di San Michêl, pre Antoni al finive di bati a machine 33 sfueis: sul devant di chest pacut di cjartis, a mût di cuviertine, al veve scrit a man “Per chi vuol sentire…Riflessioni Pastorali di un Curato di

montagna…dopo cena”.

Cjale…

La sere dal 27 di otubar passât te biblioteche di Codroip e je stade

presentade la gnove edizion de Trilogjie tormentade, opare di pre Antoni Beline,

premi San Simon 1999. Pre Antoni in chel libri al presente il torment e l’atualitât

di trê “sants laics”: don Lorenzo Milani, Oscar Wilde e Pier Pauli Pasolini; trê

oms condanâts ducj i trê sei de autoritât civîl che dai sorestants de glesie e de

opinion de int. Intal libri, pre Antoni si met cence miegis misuris de lôr bande.
Cjale…

Francesco Isola, quando l’austriacantismo

serviva ad eliminare persone scomode…

Cjale…

Glesie furlane (www.glesiefurlane.org) e continue la schirie di ativitâts che le viodin impegnade te valorizazion des lidrîs culturâls, religjosis e linguistichis dal Friûl.

Une atenzion che no cjale dome a la storie vint come riferiment il patrimoni inestimabil dal Patriarcjât di Aquilee, ma ancje al dì di vuê cuntun voli a lis gnovis tecnologjiis.

Cun cheste atenzion propit par mantignî une azion leade ai timps de societât moderne, Glesie furlane e à realizât un program radiofonic cul titul “Lis flabis di Fedro voltadis pai furlans di pre Antoni Beline”, une schirie di leturis radiofonichis in 16 pontadis che a laran indevant ogni sabide fint a Nadâl 2009.

Il progjet al è realizât cence contribûts publics in colaborazion cun Radio FM Comunicar e il program “Fuarce Furlans” (che si pues scoltâ ancje in streaming su http://www.fuarcefurlans.com.ar/) fat de radio dai furlans di Colonia Caroya te provincie di Cordoba in Argjentine.

La trasmission e je stade ideade di Christian Romanini che le à realizade cun Venusia Dominici e Sonia Romanini pes vôs e cul jutori tecnic di Luca Peresson e Claudio Roya: il program al ven trasmetût sedi in direte in FM in Argjentine e in streaming sul sît http://www.fuarcefurlans.com.ar/ ogni sabide te suaze dal program “Fuarce furlans” che al tache aes 5 dopomisdì (ore furlane). La repliche e je ogni lunis a 1 dopomisdì su lis frecuencis di Radio Onde Furlane (FM 90.0 MhZ) e dut l’archivi des pontadis si cjate on line: http://www.fuarcefurlans.com.ar/ .

Ma la atenzion a lis gnovis tecnologjiis che a permetin di scoltâ la radio in dutis lis bandis dal mont no si ferme chi: Glesie furlane, dongje dal sît isituzionâl (www.glesiefurlane.org) e je rivade ancje su Facebook, il plui cognossût social network dal moment “I confins fisics no esistin plui: il Friûl al va pensât no dome come la nestre Patrie cul teritori che o cognossìn, ma propit parcè che ator pal mont a son tancj i fîs e i nevôts di furlans, che tai agns a àn scugnût partî, al devente inevitabil resonâ intune prospetive “glocâl”, ven a stâi “pensâ globâl fevelant locâl”. Il Friûl al è duncje chel lûc, reâl e virtuâl, li che si fevele par furlan: che al sedi chi in Patrie, o in Argjentine o in Canadà o in cualsisedi altre bande dal mont e di Internet” e dîs Glesie Furlane.

Venerdì 23 ottobre alle ore 18,30. La S.V. è invitata all’incontro presso la Sala Biblioteca Antica del Collegio “G. MARCONI” a PORTOGRUARO – Via Seminario, 34 «L’espiscopato di mons. Francesco Isola. La ricostruzione dei fatti del 3 novembre 1915 a Portogruaro: l’invasione del palazzo vescovile»

Porteranno il saluto:

S.E. Mons. Ovidio Poletto, Vescovo della Diocesi di Concordia-Pordenone; Mons. Roberto Bertossi, di Glesie Furlane; Mons. Orioldo Marson, Presidente della Fondazione “G. Marconi” e Rettore del Collegio

Ne parleranno:

Prof.ssa Liliana Ferrari – Università di Trieste – Presidente Istituto di Storia Sociale e Religiosa di Gorizia e il dott. Cristiano Donato autore della ricerca.

Coordina l’incontro il prof. Ruggero Simonato, insegnante

in occasione della presentazione del libro L’EPISCOPATO DI FRANCESCO ISOLA NELLA DIOCESI DI CONCORDIA (1898-1919) di Cristiano Donato edito da Glesie Furlane in collaborazione con l’Istituto di Storia Sociale e Religiosa di Gorizia e il sostegno della Diocesi di Concordia-Pordenone

Glesie Furlane in acuardi cul Cumun di Codroip e presente la gnove edizion dal libri di pre Antoni Beline «TRILOGJIE TORMENTADE» “premi S. Simon 1999”. L’invît al è par martars 27 di otubar a lis 20.30 te Biblioteche “G. Pressacco” di Codroip in vie 29 ottobre.

Intervents: Zuan Pieri Biasatti, Dean di Glesie Furlane; Pieri Fontanini, President de Provicie di Udin. Progjet “Pre Antoni Beline: un profete pal Friûl di doman” Protocol di intese pe publicazion de “Opera Omnia”; Vittorino Boem, Sindic di Codroip. Relazion di pre Tonin Cappellari, Plevan a Ruvigne

Obietîf di Glesie furlane (www.glesiefurlane.org) al è chel di cognossi, studiâ, promovi, valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie. Propit par cheste azion che e à chê di puartâ a une dimension plui umane e incjarnade la opare di evanzelizazion, la associazion e à cjapât cun plasê la pussibilitât di partecipâ a la prossime edizion di Friuli Doc (dai 17 ai 20 di Setembar 2009). Une ocasion nassude grazie al intervent de Provincie di Udin, in particolâr par mert dal President Pietro Fontanini e dal Assessôr al Turisim Franco Mattiussi, e cu la colaborazion de associazion “Strada del Vino” di Aquilee.

Tal spazi dedicât si podaran cjatâ i libris editâts di chest grup di cristians e furlans che a cirin di lâ a font des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di “inculturazion de fede” o di “vanzelizazion de culture”. Il grup, nassût viers i agns ’70, sul sburt dal Concili Vatican II (1962-1965), dai prins pas de Teologjie de liberazion e tal contest politic-culturâl de cussience autonomistiche furlane, al à come figure carismatiche iniziâl il professôr pre Checo Placerean (1920-1986).

L’apontament al è duncje di joibe ai 17 fin domenie ai 20 di Setembar sot dal tendon di place Venerio, daûr de glesie di Sant Francesc, dulà che i visitadôrs a podaran cjatâ ancje i libris di pre Antoni Beline (1941-2007), ma no dome, domandant informazions e podint cognossi miôr cheste associazion che e cjale al avignî dal Friûl di vuê cence dismenteâ il patrimoni inestimabil che al ven da la tradizion dal Patriarcjât di Aquilee.

Ai 2 di Avost dal 1338 il Patriarcje di Aquilee Bertrant di Saint Geniès al consacrave il Domo di Vençon (foto di Aldo Taboga, www.natisone.it). Come ogni an Glesie furlane e celebre la messe par ricuardâ no dome l’event, ma ancje un dai Patriarcjis plui impuartant di Aquilee. Dopo de messe e sarà ancje la sugjestive procession pes viis dal paîs.

L’apontament al è par domenie ai 2 di Avost a lis 7 di sere tal Domo di Vençon (UD)

Se o podês, slargjait l’invît a lis vuestris amiis e ai vuestris amîs.

Il grop di Glesie Furlane us invide te basiliche mari di Aquilee pe Messe grande di avôt dal Friûl domenie 19 di lui as 6.00 sore sere.

O prearìn pal nestri popul, o cjaparìn coragjo tal Signôr.

Dopo Messe, si starà un moment in companie par un ghiringhel.

A ducj chei ch’e son gloriôs di jessi fîs de S. Mari Glesie di Aquilee

SABIDE AI 20 DI JUGN

O vin la pussibilitât di fâ une visite guidade a lis BASILICHIS PALEOCRISTIANIS TIPOLOGJIE AQUILEIESE de Carintie, ch’e fasin test de ativitât missionarie de nestre Glesie.

O VIODARIN

› Sîts archeologjics che nus cjacarin dal inizi de liende cristiane tes nestris tieris;

› e, insieme: puescj di bielece paesaggistiche cree e di gran prêsi culturâl.

MODALITÂTS DI ISCRIZION

Dâ l’adesion (ancje telefoniche) entri il 16 di jugn a:

– pre Sef Cargnello, plêf di Guart 0433/60358

– pre Renzo Dentesano, plêf di Guart 0433/60358

– pre Roman Michelotti, canoniche di Vilegnove 0432/956010

– pre Tonin Cappellari, canoniche di Rivigne 0432/957268

– bons. Roberto Bertossi, canoniche di Vençon 349/8024017

NB

1) Dâsi in note il prin pussibil, par sparagnâ problemas dal ultin moment.

2) Se, cause pocje adesion, no si rivas a fâ une coriere, si fâs il viaç in cumitive di macignis, cui stes oraris.

3) Il presint al sarà intôr dai 50 euros a persone.

PROGRAM

Partence di Vençon a lis 8.00 di buinore.

In matinade: visite ai scavos des Basilichis sul Hemmaberg (Globasnitz)

› Gustà tun ristorant dal puest

Tal dopomisdì: visite a lis Basilichis di (Teurinia) – Sankt Peter in Holz.

Progjet «Pre Antoni Beline: un profete pal Friûl di doman». Presentât domenie ai 26 di avrîl 2008 a Vençon, in ocasion de Messe pe ricorence dal secont aniversari de muart, il prin scrit de OPERA OMNIA di pre Toni: «De Senectute» inedit. Al’ere presint il president de Provincie di Udin, on. Pieri Fontanini.

Cjale…

Ai 23 di Avrîl passâts, a Palaç Belgrât a Udin, al è stât fat bon un protocol di intese jenfri la Provincie di Udin e Glesie Furlane par meti adun une racuelte complete dai scrits di pre Antoni Beline. Il progjet al è di Glesie furlane, e la Provincie di Udin i vignarà incuintri cuntun contribût di cinc agns pe realizazion di «Pre Antoni Beline: un profete pal Friûl di doman». Vâl a dî, la racuelte e la publicazion dal patrimoni leterari di Pre Antoni Beline intune edizion complete e organiche. L’impegn, fat bon dal President de Provincie Pieri Fontanini e sotscrit dal president di Glesie Furlane Zuan Pieri Biasatti, al sarà di 80 mil euros pe publicazion di nûf oparis di Pre Antoni Beline: «Sul at di voltâ pagjine», «Par amôr o par fuarce?», «Eutanasie di un Patriarcjât», «Amôr di patrie», «Fortunât il popul che il Signôr al è il so Diu», «Rogazions», «Cirint lis olmis di Diu – V», «Trilogjie» e «De Senectute».

Propit chest ultin scrit, inedit, al è stât presentât domenie ai 26 di avrîl a Vençon.

A doi agns de muart di pre Antoni Beline, domenie 26 di avrîl, as sîs sore sere in domo a Vençon si cjatìn pe presentazion de opare inedite “De senectute” e pe Messe di anniversari.

Di plui bandis si sburte par che lis oparis di pre Antoni, massime chês plui impuartantis, a vegnin voltadis par talian. Par cumò, cence volê condizionâ il timp e l’avignî, la posizion di Glesie Furlane e di Patrie dal Friûl e je cheste:

Cjale…

Letare dal plevan di Vilegnove di Motta di Livence, diocesi di Ceneda (Vittorio Veneto), pre Vittorio Battistuzzi, che al domande di no ricevi plui la pueste di Glesie Furlane parceche Lui al è «italiano, nato in Veneto da famiglia di profonde radici venete, le cui generazioni si perdono nella bella storia d’Italia… perchè sono fiero di essere italiano e parlare la nostra bella lingua».

Cjale…

Slargjant lis iniziativis par che la culture e la lenghe furlane e flurissin simpri miôr, il libri Cjant Patriarcjin de tradizion orâl di pre ‘Sef Cjargnel al è stât mandât ancje al vescul di Rome il Pape Benedet XVI e al Segretari di Stât Gardenâl Tarcisio Bertone. Chestis 2 letaris nus ringraziin pal lavôr che o stin fasint e nus sburtin a continuâ su la strade de valorizazion dal patrimoni culturâl, religjôs e lenghistic de Patrie.

Cjale…

Relazion tal incuintri dât dongje dal “Istitût Ladin Furlan pre Checo Placerean”

a Codêr ai 5 di dicembar dal 2008.

Cjale…

Si cjatin a Vençon domenie 7 di dicembar. A lis 3.00 dopo misdì, Gjespui cjantât in Domo.

Subit dopo inte Sale Patriarcje Bertrant: PUEDIE NASSI UNE GNOVE SORNADE PE GLESIE?

Riflessions a 20 agns di un document censurât.

Intervents: pre Tonin Cappellari, prof. Maria Cristina Bartolomei, pre Nicolino Borgo e Federico dai Ros.

Si cjatin a Vençon domenie 19 di otubar. A lis 3.00 dopo misdì, Gjespui cjantât in Domo. Subit dopo inte Sale Patriarcje Bertrant: FRA FEDE E STORIE: LA NASSITE DI UNE GRANDE RELIGJON Presentazion dal libri di C. Augias – R. Cacitti

Plui il timp al passe e plui la vôs di pre Antoni e cjape fuarce. La ultime biele gnove e ven di Palaç Belgrât, sede de Provincie di Udin, li che ai 24 di Setembar il president on. Pieri Fontanini al à ricevût une delegazion di Glesie Furlane, vuidade di Zuan Pieri Biasat, dean de associazion. Cun lui a jerin ancje il vicepresident bons. Roberto Bertossi, pre Roman Michelot, president de clape di culture “La Patrie dal Friûl”, Christian Romanini, in rapresentance de redazion de riviste e pre Tonin Cjapielâr, segretari di Glesie Furlane.

Dopo une prime presentazion gjenerâl su la ativitât resinte dai doi sodalizis che pre Antoni Beline al è stât la vuide carismatiche, il dean di Glesie furlane al è jentrât tal detai dal progjet di realizazion de Opera Omnia dal predi e inteletuâl furlanist, specificant che il progjet al viodarâ une racuelte sistematiche e complete di siei scrits, intervents, riflessions, omeliis, intervistis. “No je une iniziative che e ponte a une museificazion de memorie di pre Antoni” al è stât specificât “ma la intenzion di proponi il pinsîr di un om che al à simpri cirût di atualizâ il so messaç, rivant adore simpri a fevelâ al om di vuê”. E je stade ancje riclamade cun fuarce ancje la sielte di continuâ, pal moment, a publicâ i scrits di pre Antoni dome par furlan, par onorâlu e continuâ la sô vore tal so spirt, come che al jere stât za declarât tal comunicât di Glesie furlane, jessût ai 14 di Lui dal 2008 (viôt il comunicât intîr su La Patrie dal Friûl – n. 7 Lui 2008, n.d.r.).

“Al è un dovê pe Provincie di Udin” al à confermât il President Fontanini “La opare di pre Antoni e merte atenzion e cheste iniziative e varà la poie di cheste aministrazion”.

Cumò Glesie furlane e reste in spiete di jessi tornade a contatâ di bande dai Uficis provinciâi par formalizâ l’acuardi plurienâl che al sarà a la fonde di chest progjet di racuelte di dute la produzion di pre Antoni Beline.

Si cjatin domenie ai 13 di lui a lis 7 sore sere te Basiliche Mari di Aquilee.

La liturgjie e sarà compagnade dal Coro Vôs di Vilegnove.

Dopo Messe si cjatisi un moment par un ghiringhel.

Intervent di pre Romano Michelotti al Centro Balducci di Çuian tignût ai 18 di jungn dal 2008 sul cantin “RICONOSCIAMO I NOSTRI PROFETI E CAMMINIAMO CON LORO” Presentâde la figure di pre Antoni come predi, om di glesie, di vanzeli, di fede, pastôr, tant a dî te sô funzion primarie.

Cjale…

Memorie pe Honoris causa” tignude a Udin te sede de Universitat dal Friûl Facoltât di Siencis de Formazion ai 22 di mai dal 2008 – Pierantoni BELINE, predi e inteletuâl furlan. Memoreazion de vite e des oparis.

Cjale…

UNIVERSITÂT DAL FRIÛL – FACOLTÂT DI SIENCIS DE FORMAZION

in colaborazion cun

GLESIE FURLANE

La divulgazion culturâl e linguistiche realizade a mieç di une largje opare leterarie, massime il test biblic voltât par furlan, e la ativitât di insegnat che al à intuît il valôr di une scuele in armonie cul teritori a àn motivât la propuete di conferî la lauree onoris causa a Pierantoni Beline. A un an de sô muart, la cunvigne e intint meti in lûs cierts aspiets che a rivuardin la figure dal predi e dal inteletuâl furlan e cun di plui il so impegn inte societât civîl e religjose dal Friûl.

Joibe, ai 22 di Mai 2008, aes 9,30 inte Sale des Cunvignis di Palaç Antonini vie Petracco 8, a Udin

Salût dal Preside de facoltât Franco Fabbro

Roberto Dapit – Parcè une lauree honoris causa a Pierantoni Beline

Remo Cacitti – De Plêf a la paroikia: l’itinerari cristian di pre Antoni Beline

Rinaldo Fabris – Pa peraule di Diu inte lenghe dai oms

Federico Rossi – Autonomie: percors di libertât

Interviste a Pierantoni Beline (videoproiezion)

Coordinât di

Roberto Bertossi

Roberto Dapit

Franco Fabbro

Si cjatin domenie ai 27 di avrîl a lis 6 sore sere tal domo di Vençon

MEMORIE DI PRE ANTONI BELINE A UN AN DE SÔ MUART

– Testemoneancis: la famee, il paîs, il Friûl, la glesie

– S. Messe

GLESIE FURLANE Patriarcjât di Aquilee

in colaborazion cun

UFICI CATECHISTIC DIOCESAN DI UDIN

A organizin un incuintri par joibe ai 13 di Març dal 2008 a lis 6 sore sere te sale Pauli Diacun dal Centri Paulin di Aquilee in vie Trep, 3 a Udin pe presentazion dal libri

STORIE SACRE

di Antoni Beline

a intervignaran:

bons. Lucio Soravitto vescul di Adria-Rovigo

prof.e Silvana Schiavi Fachin esperte di educazion plurilengâl

Manuela Riccioni autore des ilustrazions