Intant che us augurìn un bon proseguiment tal an gnûf, ancje us invidìn al incuintri di Vençon di Domenie ai 29 di zenâr dal 2012 «I cjastelîrs: olmis di antighe int in Europe e in Friûl» Relatôr: prof. Angelo Floramo. L’incuintri al començarâ in Domo as 3.00 dopo di misdì cul cjant dai Gjespui e al continuarâ cu le relazion te sale Patriarcje Bertrant inte canoniche.
Al rive Nadâl ma i regai de justizie e de pâs no son par nô: il Stât talian no nus permet di cjacarà in public la nestre lenghe; la Glesie taliane no dà il permes al nestri Messâl Furlan. Prein par che i nestris sorestans si inacuarzin che o esistin ancje nô
O vin il plasê di invidaus al incuintri di Vençon che al sarâ, dopo Gjespui in Domo as 3.00 dopomisdì: Domenie ai 4 di dicembar dal 2011 in canoniche as 3.30 te sale Patriarcje Bertrant il prof. Franc Fari de Universitât dal Friûl al fevelarà de: Dimension spirituâl intal çurviel uman.
O vin il plasê di invidaus al incuintri di Vençon che al sarâ, dopo Gjespui in Domo as 3.00 dopomisdì: Domenie ai 20 di chest mês di novembar dal 2011, il prof. Agnul Vianello de Universitât dal Friûl al presentarà: DAL CREAZIONISIM A LA EVOLUZION DE CREAZION. Il regâl de sience a la fede.
Al è rivât il moment di incuintrâsi. Si cjatarìn domenie 6 di novembar dal 2011 as 3.00 dopo di misdì a Samardencje sore Tarcint in place devant de glesie par fâ insieme IL TROI DE MEMORIE un percors in companie di 120 anconis li che la int di Samardencje e conte de storie, de culture, de mitologjie furlane, di mistîrs, usancis e vite di paîs.
Al sarà nestre guide il mestri Aldo Micco. In câs di ploe, in alternative, si darìn dongje a Nimis te glesie di S. Gjervâs li che bons. Rizieri De Tina nus presentarà storie e art di chê impuartante glesie romaniche
In ocasion de zornade europeane des lenghis, lunis ai 26 di Setembar a 8 e mieze di sere (20.30) alì de Ostarie A le Patrie dal Friûl, in place a Cjampfuarmit, la riviste in lenghe furlane La Patrie dal Friûl (www.lapatriedalfriul.org) e presente cu la colaborazion de Cjase pe Europe di Glemone un incuintri dal titul Fevelâ furlan al è fevelâ european.
Ospits de serade, moderade di Christian Romanini, a saran Marco Stolfo, curadôr de publicazion multimedial (libri + cdrom) plurilengâl Il Tratât di Lisbone. Argoments e documents pe integrazion europeane, e Silvio Moro, President de Cjase pe Europe di Glemone (www.casaxeuropa.org), editôr de opare.
Il volum si vierç cui intervents di Silvio Moro, Roberto Molinaro (Assessôr regjonâl ae istruzion) e Lucio Battistotti (Diretôr de Rapresentance in Italie de Comission europeane), al è bilengâl (furlan/talian) e al è articolât in cinc sezions tematichis.
La prime e je dedicade al Tratât di Lisbone. Chest argoment al ven frontât di Claudio Cressati, che al insegne li de Universitât dal Friûl e al è President de Academie europeiste dal Friûl-VJ, e dal Vicepresident de Cjase pe Europe, Renato Damiani.
Inte seconde la atenzion e je concentrade su tutele des minorancis e integrazion continentâl cuntun articul di Marco Stolfo, che al è dotôr di ricercje in Storie dal federalisim e de unitât europeane e su cooperazion trasfrontaliere, Euroregjons e Grups europeans di cooperazion teritoriâl, cui contribûts di Marco Stolfo e Leopoldo Coen de Universitât dal Friûl.
La publicazion e va indevant cun altris intervents che a permetin di cognossi miôr la storie dal procès di integrazion dal continent e lis azions de UE in diviers setôrs.
Il Cdrom zontât al è complementâr aes pagjinis dal volum, no dome pe forme multilengâl (dut al è disponibil intes cuatri lenghis de regjon: furlan, sloven, todesc e talian), ma ancje pal contignût multidissiplinâr. Par ognidun dai argoments frontâts intes sezions dal libri, di fat, e je metude a disposizion une selezion di fonts documentâls e bibliografichis e di colegaments a pagjinis o sîts internet di interès specific. Riferiments e links a son organizâts par aree tematiche e a son colegâts ai ristrets dai contribûts publicâts intal volum.
«Si trate dal prin di diviers apontaments che o fasarìn ogni mês: nus à someât significatîf vierzi cuntune serade dedicade a la Europe juste te zornade che la Europe e celebre lis lenghis» e spieghe la redazion da La Patrie dal Friûl «za di cualchi an o puartìn indevant il nestri impegn mensîl pe riviste adun cun seradis sul teritori e par chest o ringrazìin i titolârs de ostarie di Cjampfuarmit nestre omonime che nus àn dade massime disponibilitât, metint a disposizion la lôr sale pes cunvignis».
Il mensîl in lenghe furlane La Patrie dal Friûl al à presentât Vinars ai 16 di Setembar aes 6 di sere in Sale Ajace dal Comun di Udin il speciâl su la leture continue de Bibie fate dai 3 ai 9 di Avrîl dal 2011 «La storie, la int, lis emozions dal event culturâl plui grant dal 2011 in Friû»
Chest an 2011 a Friuli Doc il calendari dai events si è insiorât de presentazion dal numar speciâl de storiche riviste in lenghe furlane “La Patrie dal Friûl” (www.lapatriedalfriul.org) che al fevele dal grant event de leture continue de Bibie par furlan davuelte dai 3 ai 9 di Avrîl di chest an.
Il mensîl al è vignût fûr intun formât particolâr, di fat: 16 pagjinis cui contignûts solits e un numar in bande di 16 pagjinis dulà che si contin «la storie, la int, lis emozions» de leture cun nons, curiositâts e intervistis ai protagoniscj, massime la int, dal aveniment.
Un numar di meti vie, duncje, par visâsi di cheste grande ocasion culturâl che e à rivât a vê une rispueste di popul grandonone, esaurint subit i puescj a disposizion tant che letôr e cun tancj di lôr che a varessin vût gole di partecipâ restâts fûr.
Dopo dai salûts istituzionâi di Furio Honsell sindic dal Comun di Udin, Pieri Fontanini president de Provincie di Udin e Lorenzo Zanon president de ARLeF (Agjenzie Regjonâl pe Lenghe Furlane), a son intervignûts Dree Venier curadôr dal numar speciâl, pre Roman Michelot “La ereditât di pre Checo e pre Toni” e Angelo Floramo “Tal Nûfcent furlan”.
Al à moderât l’incuintri Christian Romanini. Lis conclusions a son stadis di Dree Valcic diretôr de La Patrie dal Friûl “Par un Friul plui furlan”.
Dree Venier intal editoriâl di presentazion al scrîf «Ancjemò une volte il popul furlan al à dimostrât di tignî ae sô culture, cui fats. Dut chest al à vût dome une atenzion momentanie: finît l´event, subit al è colât il cidinôr. (…) La Patrie dal Friûl e à invezit volût celebrâ cuntun speciâl di pueste lâevent culturâl plui impuartant che si è davuelt in Friûl dal 2011 (celebrazions pai 150 agns dal Stât talian comprindudis, si intint)».
O vivìn dongje di tieris che nus presentin incjants di valadis, di boscs e di paîs; o sin circondâts di lûcs cjariâts di memoriis, di art e di storie; cjapìn locasion par cognossi miôr lis ricjecis spirtuâls e culturâls dal Patriarcjât e de nestre glesie mari di Aquilee.
Chest an lincuintri culturâl nus menarà in Carinzie e Tirôl e al sarà sabide 24 di setembar 2011.
Al è impuartant metisi in note il plui prest pussibil; par prenotâsi, dâ jù cognon, non e numar di telefon o di celulâr.
O passarìn une biele zornade in companie
PROGRAM
Si partìs dal plaçâl des scuelis di Vençon as 8:30 di buinore; il rientri al sarà tor siet sore sere.
Primis fermadis a Lavan e sul cjistiel di Lienz li che o visitarìn il Museu e si fermarìn a gustâ.
Tal dopo di misdì o viodarìn i scavos archeologjics e il museu di Aguntum.
MODALITÂTS DI ISCRIZION
Pe adesion, telefonâ entri joibe 15 a:
pre Sef Cjargnel, plêf di Guart 0433.60358
o a bons. Roberto Bertossi, canoniche di Veçon 0432.985032
o a pre Roman Michelotti, canoniche di Vilegnove 0432.956010
o a pre Tonin Cappellari, canoniche di Ruvigne 0432.957268
La basiliche mari di Aquilee nus spiete ancje chest an 2011 pal avôt dal Friûl. Al celebrarà bons. Basili Danelon, vicjari gjenerâl de diocesi di Concuardie-Pordenon, adun cui predis di Glesie Furlane.
Chest an lincuintri lu organizìn dutune cu le ARLeF, Agjenzie Regjonâl pe Lenghe Furlane che e je stade protagoniste dal grant event de leture continuade de Bibie scomençade ai 3 e finide ai 9 di Avrîl e cul mensîl La Patrie dal Friûl. Pe ocasion si ricuardaran pre Checo Placerean e pre Antoni Beline, tradutôrs de Bibie.
Cun di plui la zornade si cjame di un gust particolâr ancje par vie di doi ospits speciâi che a insioraran l’incuintri.
Prin al sarà Gabriele Pelizzari, autôr dal libri Il Pastore ad Aquileia. La trascrizione musiva della catechesi catecumenale nella cattedrale di Teodoro, opare monumentâl che e presente une aprofondide leture dai mosaics. L’autôr aes 5, prin di Messe, al compagnarà la visite dai paviments de basiliche, fasintnus cognossi i contignûts dai siei studis.
Il secont ospit al sarà il coro Vôs di Vilegnove che al compagnarà la Messe e che chest an al à a pene cjantât a Rome, puartant la lenghe furlane dentri de Basiliche di Sant Pieri.
Daspò de Messe si fermarìn in compagnie par un ghiringhel alì dal ristorant Ai Patriarchi par continuâ la fieste.
Università degli Studi di Udine Facoltà di Lingue e Letterature straniere. Venerdì 17 giugno 2011, alle ore 17,30 presso la Sala Convegni di Palazzo Antonini in via Petracco 8, Udine, presentazione del libro di Gabriele Pelizzari IL PASTORE AD AQUILEIA La trascrizione musiva della catechesi catecumenale nella cattedrale di Teodoro
Saluti delle Autorità:
Magnifica Rettrice dellUniversità di Udine Prof.ssa Cristiana Compagno
Preside della Facoltà di Lingue e Letterature Straniere Prof.ssa Antonella Riem
Relatori:
NICOLA GASBARRO
dell’Università degli Studi di Udine Facolta’ di Lingue e Letterature Straniere Dipartimento di Scienze Filosofiche e Storico Sociali
REMO CACITTI
dell’Università degli Studi di Milano Facoltà di Lettere e Filosofia Dipartimento di Scienze della Storia e della Documentazione storica
MARIA SILVIA LUSUARDI SIENA
dell Università Cattolica del Sacro Cuore di Milano
Facoltà di Lettere e Filosofia
Istituto di Archeologia
Alla notizia della visita di Benedetto XVI ad Aquileia e a Venezia per il 7 e 8 maggio prossimi anche a Glesie Furlane è stata posta la domanda rituale: Cosa vi aspettate da questa visita del papa?
Il prossim incuintri di Glesie Furlane al sarà a Vençon domenie prin di mai.
As 5.30 sore sere te Sale Patriarcje Bertrant lî de canoniche si cjacararà su doi libris di pre Antoni Beline: la professore Silvana Fachin Schiavi su Struture e/o culture – La culture fûr dal popul e je inlusion e pecjât; Dree Valcic al presentarà: Amôr di Patrie – Editoriâi 1979-1983 Prin volum. Moderatôr dal incuintri: Christian Romanini redatôr de La Patrie dal Friûl.
As 7.00, in Domo, la Messe tal cuart aniversari di pre Antoni.
O sin propit contents de grande adesion di tancj furlans, passe 1600 di lôr, che àn volût jessi cun nô ta cheste iniziative, ne curte ne lizêre, par lei in public la Bibie voltade di pre Checo Placereani e di pre Toni Beline.
Laveniment al meti in lûs, se mai al coventas, limpuarance fondamentâl, vitâl, insostituibil che la lenghe furlane e à pe comunitât furlane.
Cuanche i furlans a àn loportunitât, la possibilitât, la furtune di une lôr iniziative gjenuine, autentiche, autonome, tal sens di podesi esprimi cu la lôr lenghe, cu la lôr sensibilitât e origjinalitât, o, come che si dîs herzenssprache, te lenghe dal cûr, si sint un popul chal esist e cal esist di protagonist che al crôt al avignî.
AQUILEE, sabide 19 di març dal 2011 a 10,00 di buinore te Sale Romane in place dal Cjapitul, presentazion dal libri: IL PASTORE AD AQUILEIA La trascrizione musiva della catechesi catecumenale nella cattedrale di Teodoro di Gabriele Pelizzari.
Salût dal arcivescul di Gurize bons. Dino De Antoni
Relazion di Remo Cacitti de Universitât di Milan. Al sarà present lautôr.
Tal incuintri di Glesie Furlane e La Patrie dal Friûl di domenie ai 20 di Fevrâr dal 2011 a Vençon al è stât fat bon il document: FRIÛL: 145 – 93 AGNS DA LITALIE!
O vin il plasê di invidâus al incuintri di Vençon di domenie 14 di fevrâr. As 3.00 dopomisdì: Gjespui in Domo, as 3.30 te Sale Patriarcje Bertrant p. Emidio Papinutti al presentarà: IL PROCESSIONÂL DI CIVIDÂT E LA ATUALIZAZION DAL PATRIMONI MUSICÂL AQUILEIÊS.
Stin simpri insieme te pâs e tal afiet savint che i muarts no bandonin i vîfs e i vîfs midiant dal Signôr si impensin dai muarts. Ta cheste comunion dai sants saludìnsi e restìn tacâts par judâsi a vivi in eterni. Mandi pre Pauli
(dal Testament spirtuâl)
Ven a lei ancje tu. 0432/555979 al è il numar par metisi in note.
i fasin apel a ducj par che a partecipin in maniere ative al event de leture de Bibie par furlan, in program dai 3 ai 9 di Avrîl dal 2011.
A coventin passe 1300 volontaris.
Si pues notâsi, tant che letôr singul o tant che grup di letôrs, sedi par telefon, tacant di miercus ai 2 di Fevrâr, clamant il numar 0432/555979 dal lunis al vinars des 10.00 aes 13.00 e des 17.00 aes 20.00, o pûr scrivint ae direzion bibie@regione.fvg.it (al sarès miôr ancje scrivi in maniere di lassâ i recapits e la disponibilitât).
Il numar al è valit ancje par domandâ informazions e sclariments.
Al sarès biel une fuarte partecipazion par un segnâl une vore fuart a pro di chest event che al è sedi di fede sedi di culture.
Nol è mai stât fat intune lenghe minorizade e il Friûl al à une ocasion pardabo inimpuartante par dimostrâ il valôr de sô identitât.
O sperìn di podê contâ su di vuatris ancje par cheste ocasion.
Il prossim incuintri di Glesie Furlane al sarà domenie ai 20 di Fevrâr dal 2011 a Vençon.
As 3.00 dopo di misdì Gjespui cjantât in Domo;
As 3.30 te Sale Patriarcje Bertrant, in canoniche:
1) La presentazion dal libri PA SOPRAVIVENCE, NO PA LANARCHIE Forme di autogestione nel Friuli terremotato: lesperienza della tendopoli di Godo (Gemona del Friuli) di Igor Londero edito da FORUM Editrice Universitaria Udinese.
Relatôr il prof. Remo Cacitti de Universitât dai Studis di Milan; testemoneancis di Gianni Gubiani e di pre Tonin Cappellari.
Al sarà presint lautôr.
Il prossim incuintri di Glesie Furlane al sarà domenie ai 23 di Zenâr dal 2011 a Vençon. As 3.00 dopo di misdì Gjespui cjantât in Domo; as 3.30 te Sale Patriarcje Bertrant, in canoniche, il prof. Remo Cacitti de Universitât dai Studis di Milan al tignarâ une conference sul cantin: Mysterium semplicitis: il misteri de semplicitât e il puest dal cristian intal mont.
«I cristians a vivin te lôr patrie ma come forescj; a partecipin a dut come citadins e a stan sot a dut come forescj. Ogni tiere foreste e je par lôr patrie e ogni patrie e je tiere foreste. Si maridin come ducj e a fasin fruts, ma no bandonin la lôr fiolance. A metin in comunion la taule, ma no il jet. Si cjatin inte cjar ma no vivin seont la cjar. A passin la vite su la tiere, ma a son citadins dal cîl. A ubidissin a lis leçs stabilidis, epûr la lôr vite a va plui in là de leç» de Letare a Diognêt.
Al è stât spedît di pôc lanuari 2010 Patrie dal Friûl di Glesie Furlane. La riviste, rivade zaromai al cuint an, si presente cuntune vore di novitâts. Za de cuviertine si pues capî che la gnove impostazion, sot de vôs GLESIE IN FRIÛL, e je che di contâ lis ativitâts e la cronache de Glesie che e je in Friûl. Cussi ancje pai studis, documents, riflessions, propuestis e esperienzis che vescui, predis e laics a puartin indenant e a metin in vore pe vite eclesiâl e civîl.
E contarâ argoments cualificants de vite eclesiâl e civîl che a cirin di lâ a font des idrîs culturâls e religjosis dal Friûl, par conciliâ in maniere armoniche la fede cu la identitât culturâl e cun dut ce che al rivuarde la dimension religjose te culture furlane
Anuari 2010, Glesie in Friûl – I Part
Il prossim incuintri di Glesie Furlane al sarà domenie ai 23 di Zenâr dal 2011 a Vençon. As 3.00 dopo di misdì Gjespui cjantât in Domo; as 3.30 te Sale Patriarcje Bertrant, in canoniche, il prof. Remo Cacitti de Universitât dai Studis di Milan al tignarâ une conference sul cantin: Mysterium semplicitatis: il misteri de semplicitât e il puest dal cristian intal mont.
«I cristians a vivin te lôr patrie ma come forescj; a partecipin a dut come citadins e a stan sot a dut come forescj. Ogni tiere foreste e je par lôr patrie e ogni patrie e je tiere foreste. Si maridin come ducj e a fasin fruts, ma no bandonin la lôr fiolance. A metin in comunion la taule, ma no il jet. Si cjatin inte cjar ma no vivin seont la cjar. A passin la vite su la tiere, ma a son citadins dal cîl. A ubidissin a lis leçs stabilidis, epûr la lôr vite a va plui in là de leç» de Letare a Diognêt.
O publichin l’intervent di bons. Duili Cuargnâl su le cuestion dal Messâl par furlan, come segno di plene adesion di Glesie Furlane a ce che al à scrit.
Al è un intervent unevore puntûal come che al sâ fâ bons.
Duili che al à ancje presiedude la comission interdiocesane pe traduzion in lenghe furlane dai libris liturgjics.
L’articul al è jessût su La Vite Catoliche dai 20 di Novembar dal 2010 te rubriche agâr.
O vin il plasê di invidâus domenie 28 di chest mês par un incuintri a Vençon.
As 3.00 dopo di misdì: Gjespui cjantât in domo. Al sarà presint bons. Dree Bruno Mazzocato
Arcivescul di Udin.
As 3.30 in canoniche te sale Patriarcje Bertrant il dotôr Gabriele Pelizzari al presentarà: I ultims studis su la vicende storiche dal apuestul Dree.
O varìn locasion par gjoldi di une gnove publicazion de Opera omnia finanziade de Provincie di Udin: AMÔR DI PATRIE editoriâi 1979-1983 Prin volum, di Antoni Beline
Solenitât dai Sants Ermacure e Furtunât
La basiliche mari di Aquilee nus spiete ancje chest an pal avôt dal Friûl
domenie 18 di chest mês as 6.00 sore sere.
Si cjatarìn cui nestris Sants e cu la nestre int
par cjapâ dignitât e fiducie dongje dal Signôr.
Daspò de Messe si fermarìn in companie par un ghiringhel.
Zuan Pieri Biasatti, dean
Lis resons che nus sburtin a vivi cun profit lavôt dai Sants Ermacure e Furtunât a son tantis e di ordin diferent, come che diferentis a son lis dimensions e lis dibisugnis dal om.
A son lis resons de fede che e je un don di Diu ma che si incjarne tai lûcs e te storie di un popul.
Ma Aquilee e je ancje la lidrîs dal nestri jessi furlans. Se jessi furlans e jessi cristians a àn par nô une sorte di comunance di timp e di lûc, par nô fede e culture, religjon e identitât no son une cuintreposizion ma doi aspiets di une uniche realtât, che e va salvade, valorizade, vivude in armonie. Par podê jessi nô stes e par podê judâ il mont, cence jessi glotûts dal vilagjo globâl, là che ducj si riscje di jessi compagns tal nuie.
pre Checo Placerean
An 933 de Patrie
259 in spiete che al sedi
ripristinât il Patriarcjât
17 de Bibie al popul
Il tierç libri de “Opare Omnia” di pre Antoni Beline “Riflessions di un predi cjargnel” al è stât mandât ancje al vescul di Rome il Pape Benedet XVI par che i dedi une man te Sô opare pastorâl.
Cussì o sin contents che ancje il vescul di Rome, Joseph Ratzinger, al vedi mût di lei chestis pagjinis e di cognossi, almancul un freghenin, un predi, fi dal Friûl e de Glesie di Aquilee, che al à lassât e al lassarà a dilunc il segno de sô presince te storie de nestre Glesie e dal nestri popul.
O crodìn che chest librut, scrit ai 29 di setembar dal 1974 che o vin publicât te version furlane e ta chê origjinâl taliane, cuntune grampute di articuluts sul stes argoment come zonte, nol à pierdût il so valôr in tune situazion come chê che o vivin tant in certis analisis che al faseve, che tai tentatîfs di soluzion che al proponeve.
Cheste la letare di ringraziament.
Glesie Furlane e à il plasê di invidâti a Vençon domenie 20 di jugn.
As 3.00 dopo misdì al sarà il Gjespui in Domo, as 3.30 te Sale Patriarcje Bertrant il dot. Gabriele Pelizzari al presentarà:
Feminis, perseguitâts e biâts te plui antighe iconografie cristiane.
Cuntun riviodisi
Il Dean
Zuan Pieri Biasatti
Signôr, no sta cjastiâ i puars cul gjavâur la sperance e la gole di cirî.
Dome viôt di lôr, parcè che a son simpri a riscjo. Chel che al è tal scûr, al va par dut là che al cjate lusôr, usance lis paveis che a svolin viers la lûs e a restin brusadis.
Signôr, no sta cjastiâ la eterne inlusion dai paurs cun eternis delusions.
pre A. Beline, Cirint lis olmis di Diu, 2.
Tal tierç aniversari che pre Antoni Beline nus à lassâts lu vin ricuardât domenie 25 di avrîl a Vençon. Si sin cjatâts tal Domo e daspò, cjantant lis litaniis dai sants, sin lâts viers la glesie di S. Catarine pe Messe partecipât a la Rogazion di S. Marc.
Inte ocasion Mauro Della Schiava, al à presentade in struc la sô tesi di lauree “Restâ cu la int-l’esperience di Glesie Furlane”
In ocasion dal tierç aniversari de muart di pre Antoni Beline, inte glesie di Visepente, jê stade fate une Messe, precedude di une ore di leturis di Salms e di cjantìs. Insom, in struc, al è stât fat un tic di belanç di ce che si è daùr a fa, in chest ultin an, par ciri di ricuardà pre Antoni.
Al à presiedude la Messe pre Romano Michelotti concelebrade cun pre Dolfo e cul diacun Fiorino.
Inte ocasion pre Tonin Cappellari al à presentàt la gnove publicazion de Opera omnia: “Riflessions di un predi cjargnel”.
Vinars ai 9 di avrîl tal Domo di San Zorç Messe grande in mari lenghe te ricorence de fieste nazionâl dal Friûl.
Nella foto: pre Luca Anzilutti (Torviscosa), pre Romano Michelotti (Villanova di San Daniele), pre Livio Carlino (San Giorgio di Nogaro), pre Antonio Cappellari (Ragogna) e pre Ercole Colautto (Porpetto)…ha accompagnato la liturgia il Coro Parrocchiale con la Messa di Pentecoste di Don oreste Rosso.
