Olmis di Diu - A. Beline

Al è di bant platâ il cjâf sot des alis usance i struz o fâ fente di nuie. Lis iniziativis di chescj mês par dâ une soluzion a situazions fûr di regule, almancul seont i schemis culturâi e la dutrine gjuridiche e morâl, a àn inviade une lote e une cuintriposizion de plui acanidis e periculosis che si puedi inmagjinâ e augurâsi. Parcè che si riscje di dividi un paîs za dividût e di fâ passâ par amorâi chei che si batin pe gnove legjislazion e par fanatics chei che a sostengin lis resons contrariis. E ancje tal mont catolic la division e la confusion a regnin sovranis.
Nol è facil conciliâ lis esigjencis sacrosantis dal dirit e de morâl, fondadis su motivazions colaudadis, e lis problematichis impelentis che i gnûfs stîi di vite e di rapuarts nus presentin simpri plui dispes. Vino di sierâsi a difese ostinade dal esistent, boicotant e condanant ogni tentatîf e mediazion? Vino di butâ vie un valôr fondant de nestre societât, cul riscjo di cjatâsi cence nissune roste? Par chel che al po valê il pinsîr di un puar curât di campagne, o disarès prin di dut di dâsi une calmade di une bande e di chê altre e di relativizâ i fats, cence viodi la fin dal mont di une bande e la libertât assolude di chê altre. A di chei, po, che a spartissin il don de fede, o disarès di lâ a lei e a tornâ a lei chel toc splendit e comovent di Zuan 8, 1-11, là che o cjatìn une indicazion teoriche e metologjiche precise furnide di chel che al reste il prin e unic mestri e il model par un cristian. Mi riferis al câs de femine cjatade in plen adulteri e, seont la leç ebraiche, distinade a une muart dolorose e infamant come la lapidazion, e al mût che Crist al rive a salvâ la leç cence tradî la persone.
Ai fariseos che i ricuardin la leç di Mosè, dade di Diu e duncje sante, Crist nol met in discussion il principi, ch’al reste salt in dut il so valôr. Dome che al è un principi, une robe astrate, in alt, come lis stelis pal viandant di gnot, che però si cjate a cjaminâ cajù. La leç e je sante e degne di rispiet, ma la persone no je mancul sante e mancul degne di rispiet. Anzit, la persone e passe denant de leç, parcè che “la sabide e je fate pal om e no l’om pe sabide” (Mc 2, 27). Ma il Signôr al va plui in là. Se ancje la femine e merte la condane, cui esal tant just e in grât di condanâle? Denant di tantis situazions delicadis e iregolârs, si sint simpri di plui, tai documents de gjerarchie, il no rissolût de glesie. Facilmentri a àn reson di condanâ. Ma lôr sono tant sants e a puest di podê tirâ il prin clap? Se la glesie catoliche e je, o si crôt, a puest te ortodossie, puedie sintîsi a puest te ortoprassi, tal compuartament concret? Po stâi che i oms di religjon a sedin a puest (sperìn!) in fat di morâl sessuâl, ma sono a puest par chel che al riguarde une tentazion ben plui galiote e diaboliche, come chê dal podê, dal ingrumâ bêçs, dal morosâ cui grancj?
Par chel mi sint di invidâ, come Crist, la gjerarchie a palesâ il so pinsîr cun clarece e moderazion, ma a meti in prin plan la persone, cul so valôr insostituibil, savint che “la glorie di Diu al è l’om vivent” (S. Ireneu).
Mi plasarès che, te prossime pasche, cuant che la cristianitât e celebre la resurezion e ancje un cûr resurît e un stîl plui spirtuâl e mancul gjuridic, plui comprensîf e mancul astrat, il pape o i gardenâi o i vescui tes lôr catedrâls, impen di bati e ribati simpri chê, a vignissin fûr cu la grande novitât dal perdon. Che a disesssin a ducj chei che a patissin pe lôr situazion scomude o penose o ingredeade: “Nancje jo no ti condani!”. No si trate di lâ cuintri de leç, ma di superâ la leç cun chel perdon che ducj o vin dibisugne.