Olmis di Diu - A. Beline

Cuant che o ai cjatât tal messâl il non di Marie Goretti, mi à parût di tornâ indaûr di secui. Ma cheste fantaçute di dodis agns, nassude a Corinaldo di Ancone, trasferide a Ferriere di Conca, Latine, cu la sô famee cjamade di lavôr e di miserie, che e preferis pierdi la vite ma no la virtût e e mûr a Nettuno ai 6 di lui dal 1902 perdonant al so sassin, ese propit chê Marie Goretti che dutis lis sezions di Azion Catoliche le vevin come protetore e spieli, dutune cun Domeni Savio pai fruts? Là ese lade a finî dute chê eopee, cuntun esercit, anzit une falange di volontaris pronts a rinunciâ a ogni tentazion, seduzion e ocasion par salvâ chê castitât che ducj felevave e che nô no savevin nancje ce robe ch’e jere? Ma pardabon si tratavie di une forme educative positive, juste, liberadorie, o no jerie invezit une ideologjie fanatiche, une fobie stupide e periculose, che e invelegnave la nestre infanzie e e inturgulave il nestri cîl seren?

La storie gloriose e tragjiche di cheste frute le contavin in ogni ocasion drete e stuarte e ducj si saveve che il pari al jere muart tai palûts, che la mari Sunte si jere cjatade cuntune geade di mularie e che Marie, ancjemò te etât dai zûcs, e veve scugnût fâ di femine di cjase e di mari dai canais plui piçui. E si contave di chê altre famee, tacade cu la lôr. Di chel zovin, Alessandro Serenelli, restât cence mari, ch’al veve pierdût il cjâf par jê e le tignive di voli, biel che la passion, ta chês zornadis infogadis e eternis, e covave simpri plui prepotente. A un cert pont si jere fat fuart e le veve brincade ma jê i veve dit ch’al jere pecjât e lui, par pôre di jessi pandût, le veve curtissade e ridusude in fin di vite. E Marie, te sô lungje angonie, i veve perdonât, murint di sante e puartant une spere di cîl su la palût, come ch’al diseve un film in blanc e neri mâl fat e plen di retoriche. Po l’evoluzion in positîf de tragjedie. Alessandro Serenelli, dopo di vê passât 28 agns di preson, al va a domandâi il perdon a la gnagne Sunte e si ritire in convent, a espiâ par une vite la matetât di un moment. Al sarà presint ancje lui, la sere dai 24 di jugn dal 1950, tai sflandôrs dal An sant, in place san Pieri a la canonizazion di cheste stele sflandorose impiade sul cîl fumul de zoventût, esponude a ducj i pericui, sore dut a chei dal cuarp. Un event epocâl, une fole mai viodude, une esaltazion uniche dai valôrs cristians e de purece.

A distance di mieç secul, dut chest nus semee lontan e strani. Di fat la devozion par Marie Goretti e je calade e lade sparint. La sielte di une coerence cussì radicâl e va siguramentri rispietade e il perdon al propi carnefiç al è un at di santitât splendide. Si trate, magari cussì no, di une situazion ripetude in ogni secul e in ogni continent. No vino vût, za cualchi an, il câs dolorôs di Désirée Piovanelli? Si domandisi però trop che al à pesât e condizionât l’ambient antropologjic e culturâl. Di une bande e di chê altre. Grande pôre e à di jessi stade tant in Marie che tal zovin Alessandro, solitari e sierât. Plui che violent, al jere imbranât. Plui che sporcacjon, al leve cirint afiet e nol jere bon di domandâlu parcè che nissun no i al veve insegnât. Se al ves frenade la sô brame e smolade la sô inibizion, al varès podût scomençâ un rapuart che ju varès menâts a meti sù famee e une grande famee. Viodi, in chel curtilon di campagne, un om e une femine contornâts di fruts, a frontâ insieme la fadie e la gjonde, varessial forsit dade mancul glorie al Signôr? Si scuegnial propit simpri e dome murî par onorâ il Diu de vite? Dutis strambetâts che mi vegnin tal cjâf in chescj dîs di caligo.