Olmis di Diu - A. Beline

A an vût dit, int plui esperte di me, che al bastarès salvâ il discors de mont (Mt 5-7) par vê dut il vanzeli in struc. E di chest discors dolç e radicâl, consolant e rivoluzionari, bastarès salvâ lis Beatitudinis, che a son il cûr dal cûr.
E je une liste di int che, ta la mentalitât corint di vuè, ma ancje in chê de ete di Crist, no fâs nissune invidie. Par solit la int ju cjale cun indiference; cualchidun si sburte fint al dûl, ma o crôt che nissun nol vedi gole di simiotâju. Epûr i puars, i avilîts, i bogns e i monts, chei che a perdonin e a scombatin pe pâs, contents ancje di cjapâ mortificazions e vilaniis, a son “furtunâts”.
Furtunâts o furbos? Salacôr ancje furbos, ma di une furbetât ledrose, come che e je ledrose e alternative la vision de vite che al à Crist rispiet a la nestre. Une furbetât che e riscje il dut par dut, ma dut suntune promesse, lassant l’ûf sigûr pe gjaline in forsit. Crist ju clame “beâts”; nô o saressin plui sui “biâts” o biadaçs, i ultins di chest mont che a saran i prins in chel altri, ma par cumò ultins.
E fra i ultins che a an dirit di jessi prins, fra i biâts che a varessin di sei beâts, o fâs il sacrilegjo di completâ la liste di Crist cuntun’altre beatitudine: la precarietât.
I precaris a esistin ancje inte ministrazion dal stât ma par solit a rivin a la pension. Chei precaris che o dîs jo a son chei che no puedin programâ nuie e a vivin dì par dì no par vocazion di bintars ma parcè che la vite stesse no ur dà nissune sigurece. Une volte, inte lôr puaretât, i nestris vecjos a podevin ancje fâ cuatri conts, clucî une cualchi sperance, smicjâ cualchi progjet o afâr. Se no vevin bêçs, a vevin salût, in plui a vevin il capitâl dai fîs e soredut a vivevin tun sisteme di sigurecis, che ur permeteve di cjalâ indenant o almancul di poiâ i pîts sul sigûr.
Vuê dut chest al è gambiât. Nol esist, ni a nivel personâl ni coletîf, ni locâl ni internazionâl, un pont di riferiment culturâl, economic, psicologjic. Se a’nd è, a son contraditoris e no valin ni par dutis lis personis ni par ducj i moments. Si è come suntune barcje, là che si pò sperâ di no lâ sot ma no si pò fâ di mancul di niçulâsi e di vê il cjâf che al zire. I viei a an vût i lôr problemis, ma nô no vin di sintî nissun sens di inferioritât intai lôr confronts, parcè che vuê i fastidis a son plui e lis sodisfazions mancul.
Il vanzeli, tal invidânus a vivi dì par dì cence deventâ mats pal doman, nus puarte come spieli i ucei dal cîl che no seselin e lis rosis dal prât che no tiessin. No ai nissune pore a puartâ, come spieli, tante int, di ogni etât, che ogni dì e à di frontâ une gnove aventure. Un vecjo dibessôl, un pari e une mari cuntun fî disabil, une femine cul pês de cjase dut su lis sôs spalis, un invalit, un che al à l’abonament pal ospedâl e pal miedi, un fantat za inviât sul troi de vedranance, un paîs di anzians cence ostariis e buteghis e comoditâz e fruts, ce inlusions puedino fâsi? Se a rivin a no disperâsi, a no pierdi la voe di fâ, a cjatâ inte grame monotonie une cualchi serenitât, no sono di dirit te liste dai “furtunâts”? Une liste che si slungje simpri di plui, cu la complessitât di vuê. Il spalancâ ogni dì il barcon suntun mont che no ti ufrissarà nuie nol è mancul grant e significatîf de salmodie che e travane i cops centenaris di un convent.