Vuê ai 6 di Mai, aniversari dal Taramot dal 1976, in ocasion de cunvigne di Maian, dedicade a pre Meni Zannier e inmaneade de Societât Filologjiche Furlane dentri de Setemane de Culture Furlane, ancje la nestre associazion e je stade invidade a puartâ un ricuart.
Chi o publichìn l'intervent dal nestri segretari Christian Romanini:
Al è cun grant plasê e onôr, ma ancje cun emozion particolâr, che vuê mi cjati chi cun voaltris a ricuardâ pre Meni Zannier.
A non di Glesie Furlane, dal nestri president bons. Roberto Bertossi e gno personâl us puarti il salût e l'agrât par vênus invidâts a intervignî e par vê sielte cheste date par cheste cunvigne: “Rivade la sere al polse il Friûl, te vite si spere un cîl cence nûl. Ma a colp une scosse e fâs tremâ il mont: la tiere e je rosse cul cîl si confont…” al scriveve intune maraveose poesie pre Meni cualchi setemane dopo di chel 6 di Mai dal 1976.
La nestre, par cui che nol sa, e je une associazion di cristians e furlans che a cirin di lâ a fonts des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di "inculturazion de fede" o di "vanzelizazion de culture".
Un troi segnât tai agns Setante su la sperance che al veve regalât il Concili Vatican II, cuant che ancje la glesie romane, iluminade di chel sant om che al jere pape Zuan XXIII, e veve viert a dutis lis lenghis dal mont par che a puartassin la peraule dal Signôr a ducj i popui te lôr marilenghe. Stant che o sin dongje des Pentecostis, al è just ricuardâsi di chest: magari cussì no, in Friûl chest messaç di sperance al jere stât in part tradît parcè che, lassant il latin, la jerarchie de glesie e veve pensât che la lenghe dal popul di doprâ e veve di jessi il talian, cuant che invezit la plui part de int e fevelave tai nestris paîs par furlan. No vin di dismenteâsi che ancje tal 'seminari di chei agns al jere improibît fevelâ par furlan, e chest al procurave, il plui des voltis, un slontament dal cleric, predi di doman, dal so popul, de sô lenghe e de sô culture, calcolant chest patrimoni come une robe di butâ vie.
Par fortune, a son stâts predis che invezit a àn viodude la impuartance dal nestri patrimoni storic, culturâl, origjinâl musicâl e linguistic. E pre Meni Zannier al è stât un di chescj, ancje se il so percors culturâl personâl nol è stât dentri di Glesie Furlane, ma plui individuâl.
O disarai di plui: pre Meni, mancjât ai 11 di Zenâr dal 2017, dopo passe 60 agns di messe, al veve capît il valôr dai nestris tesaurs dîs agns prime dal Concili Vatican II, viert tal 1962 e sierât tal 1965. Di fat, e dopo di me i relatôrs di vuê nus spiegaran miôr, la Scuele Libare Furlane e je stade inviade di pre Meni za dal 1952.
No vuei jentrâ tai detais sientifics de poetiche di pre Meni e de sô produzion leterarie, ma mi limiti a marcâ trê robis.
La prime e je che pre Meni, e o sotlinei il PRE, al è autorevul rapresentant di chei predis che par agnorums a son stâts i unics “inteletuâi organics” te societât dal Friûl. Ce vuelial dî? Tai nestris paîs la int, che fin a cualchi an indaûr no podeve studiâ, e veve tal predi un riferiment no dome religjôs, ma ancje culturâl. Pre Meni al à interpretât cun dedizion, costance e coerence cheste funzion.
La seconde robe che o vuei dîus e partìs propit de coerence: o savìn che lis lenghis a son vivis e a cambiin tal timp. Lui al à scomençât il so percors di leterât par furlan in agns no facii pe lenghe furlane. Tai agns o sin passâts di une lenghe dal popul, ma improibide, a une lenghe ricognossude ancje des istituzions, prime de Regjon cu la Leç Regjonâl dal 1996 e dopo ancje dal Stât cu la Leç votade dal Parlament tal 1999. Par cheste cressite che e à puartade la nestre lenghe a jessi tutelade, a son rivadis ancje normis e regulis gnovis, che però pre Meni al criticave. Cheste posizion critiche si pues no condividile, come che personalmentri o pensi, ma le rispieti par rispiet dal lavôr e dal percors che pre Meni al à puartât indevant par dute le vite e che al à metût simpri a disposizion de int e dal Friûl. Mi auguri che cumò che nol è plui cun noaltris la sô produzion leterarie no coli in dismintie e che si cjati la maniere par rindi onôr a chest grant inteletuâl.
La tierce robe che o vuei dî e je propit leade ae valorizazion di chest om, predi e leterât. No comenti il fat che a son stadis lis universitât di Innsbruck e Salisburc a candidâlu dôs voltis pal premi Nobel tai agns Otante, candidature rivade de Austrie e no de Italie. Mi limiti a ricuardâ un fat plui resint: cuant che o ai let de propueste di intitulâ a pre Meni la biblioteche comunâl di Maian mi à cjapât une emozion fuartonone. E le ai condividude a colp, propit pes motivazions che si diseve prime. Un inteletuâl che al à regalât al Friûl tant, al è just che al sedi ricuardât cu la intitulazion di un puest dulà che vuê il savê nol è dome lassât tes scansiis dai libris: vuê la biblioteche, massime intun paîs come che a son i nestris, e je deventade il lûc dal studi, ma ancje dal cjatâsi, dal confrontâsi, dal fâ comunitât. Insome, un lûc vîf e no podìn no complimentâsi par cheste sielte.
O sieri cuntun ricuart personâl stant che jessint cressût a Maian ancje jo o ai vude la fortune di cognossi di persone pre Meni. La nestre cognossince e je nassude midiant de Pro Majano che e publiche la riviste Majano Nuova e e je lade indevant cul timp ancje cuant che dopo o soi jentrât in Aministrazion comunâl. La ultime volte che si sin viodûts al è stât in ocasion de ultime edizion dal Premi Merit Furlan. Lui al jere president de Jurie e dal 2016 chest Premi al è stât assegnât al nestri za president pre Roman Michelot.
Ma di là di chescj moments uficiâi dulà che pre Meni al jere simpri a disposizion par un confront mai banâl, lu ricuardi par un consei che mi à dât. Cuant che dal 2006 o ai scomençât la mê ativitât di gjornalist, o soi stât contatât di pre Antoni Beline, altri grant inteletuâl furlan che chest an a son dîs agns che al è mancjât. Mi proponeve di cjatâsi par scomençâ a scrivi su La Patrie dal Friûl. La clamade di pre Antoni mi veve metût sogjezion e o ai domandât proprit a pre Meni un consei. Cence nissun dubi mi à conseât di cjapâ cheste strade che mi puartât a cognossi ancje il grup di Glesie Furlane, une esperience che mi à fat cressi une vore come cristian e come furlan. Par chest e tant altri, come che al varès di fâ dut il Friûl, o dîs GRAZIE PRE MENI.
