La ristampe di “Canti sacri aquileiesi della tradizione orale” a cure di Pellegrino Ernetti, jessût te riviste Jucunda Laudatio 1978-1979, ma cumò esaurît.

Tra i tancj lavôrs di Antoni Beline e je ancje cheste “Storie Sacre”, che e presente i in rime fats plui emblematics de Bibie, tant dal Vieri che dal Gnûf Testament. Un libri biel par grancj e piçui, di viergi a cjase e in parochie a dutrine. Il libri al ven coredât di ilustrazions preparadis di Emanuela Riccioni.

Pre Tite Galeri 1812-1881: salacôr no tancj a san cui ch’al è, ma tancj a cognossin lis sôs poesiis, cualchidune deventade vilote o cjant di glesie. “Dopo in cà che ti sospiri…”, “A vô nestre gran Regjine…” Gabriele Zanello al à preparade la sô tesi di lauree su chest autôr. Par fâ onôr a pre Tite e a Gabriele che lu à studiât o publichìn “Autografi di G.B.Gallerio 1812-1881”

Presentazion
La rapresentazion de Passion di Gjesù e à, in Europe, une lungje tradizion. Ancje tal Cjanton dai Grisons (Svizare) e vignive presentade periodicamentri a partî soredut dal XVII secul. L’ultime volte e fo tal 1882 a Lumbrein (Val Lumnezie, Grisons). Intant i timps a gambiavin e il spetacul, imbombât di teologjie e spiritualitât baroche, nol corispuindeve plui a lis gnovis sensibilitâts estetichis, a lis gnovis esigjencis che a vignivin indenant tal frontâ tematichis religjosis, e nancje a lis gnovis cognossincis tant storichis che teologjichis su la figure e il mes dal Nazaren.
Tal 2001 il grop di teatri Cuschnaus/Murissen (Val Lumnezie) al decidè, sot la guide di Erwin Caduff, di riproponi la viere tradizion e di rapresentâ la Passion di Gjesù intune gnove vieste par podê rispuindi cun plui fedeltât tant a la vision storiche dai fats di doimil agns indaûr, come ancje al ûs e abûs che la storie ind à fat sore fint ai dîs di vuê. Cun chest sprit Erwin Caduff al à cjapât contat cun Ursicin G.G. Derungs che al à preparât chest test in lenghe romancie
Tal avost dal 2003 la Passion e je stade rapresentade a Vella (Val Lumnezie). La popolazion di dute la valade (uns 500 personis) a àn acetât di dâ une man in diviersis mansions e compits, realizant un spetacul straordenari che in dute la Svizare e no dome, si à fevelât.
Il test al fo voltât daurman par talian e po ancje par furlan. In cheste triple vieste al ven presentât chest volum.

Colegât al Messâl di prossime e suspirade aprovazion e publicazion, o vin in cûr di preparâ un sussidi di “Cjants liturgjics” cun melodiis patriarcjinis par che il predi tes celebrazions liturgjichis al feveli di mancul e al cjanti di plui.

Da l’ore che si à rimetude in pins la sagre di Sant Ermacure e Furtunât pai 12 di lui come avôt di dut il Friûl (agns ‘70 dal secul passât) si puartave in Aquilee simpri un ciclostilât par che i fedêi a seguissin la messe. Cumò o vin stampât un biel librut, che al da plui dignitât a la solene celebrazion.

Ancje tal cors dal an sociâl 2004-2005 O continuìn cui incuintris culturâi che si tegnin mês par mês a Vençon, te sale Bertrant. I incuintris a son tignûts di personis competentis e inamoradis de culture, dal Friûl. Il sens al è chel di cjatâ te dimension religjose une strade sigure pe dignitât, pe libertât, pe justizie a pro di ogni om e di ducj i popui, seont il mes biblic e evangjelic.